តំណាងរាស្ត្រជាប់ឆ្នោតគណបក្សប្រឆាំង ចូលធ្វើសច្ចាប្រណិធាននៅម៉ោង៤ល្ងាច ថ្ងៃអង្គារ ទី៥សីហា
នៅទីបំផុត តំណាងរាស្ត្រជាប់ឆ្នោតគណបក្សសង្គ្រោះជាតិ នឹងអញ្ជើញចូលធ្វើសច្ចាប្រណិធាននៅថ្ងៃអង្គារ ទី៥សីហាស្អែកនេះ នៅក្នុងព្រះបរមរាជវាំង ចំពោះមុខព្រះមហាក្សត្រ។ នេះបើតាមលិខិតសម្ដេចចៅហ្វាវាំង ផ្ញើជូនរដ្ឋសភាជាតិ នៅល្ងាចថ្ងៃចន្ទនេះ។ អ្នកវិភាគឯករាជ្យ បានសម្ដែងក្ដីអបអរចំពោះការវិវត្តចុងក្រោយនេះ និងបានស្នើឲ្យគណបក្សទាំងពីរធ្វើការរួមគ្នាដើម្បីដោះស្រាយបញ្ហាសង្គម បើទោះបីជាមានការរកាំរកូសយ៉ាងណាក្ដី។
ចុះផ្សាយនៅថ្ងៃ៖
ស្តាប់ - ០២:១៦
នៅម៉ោង៤រសៀល ថ្ងៃអង្គារទី០៥សីហា ឆ្នាំ២០១៤ គឺជាងមួយឆ្នាំក្រោយការបោះឆ្នោតជាតិ អាណត្តិទី៥ ប្រជាពលរដ្ឋកម្ពុជា នឹងបានឃើញតំណាងរាស្ត្រជាប់ឆ្នោតគណបក្សសង្គ្រោះជាតិទាំង៥៥រូប ចងក្បិនពណ៌ស្វាយ ពាក់អាវកុត ឬអាវប៉ាក់ពណ៌ស អញ្ជើញចូលក្នុងព្រះបរមរាជវាំង ដើម្បីធ្វើសច្ចាប្រណិធាន នៅលើព្រះទីនាំងទេវាវិនិច្ឆ័យ។
លិខិតចុះថ្ងៃទី៤ខែសីហារបស់ព្រះបរមរាជវាំង ដែលឆ្លើយតបមកកាន់រដ្ឋសភាកម្ពុជា បានឲ្យដឹងថា ពិធីសច្ចាប្រណិធាន ជូនអ្នកតំណាងរាស្ត្រចំនួន៥៥រូប មកពីគណបក្សសង្គ្រោះជាតិ នៅថ្ងៃទី៥សីហា ស្អែកនេះ នឹងត្រូវប្រព្រឹត្តទៅក្រោមព្រះរាជាធិបតីភាពរបស់ព្រះមហាក្សត្រកម្ពុជា។ បើតាមលិខិតដដែល ការរៀបចំពិធីសច្ចាប្រណិធាននេះ គឺធ្វើឡើងដោយយោងតាមព្រះរាជតម្រិះដ៏ខ្ពង់ខ្ពស់របស់ព្រះករុណា ព្រះបាទ សម្ដេច ព្រះបរមនាថ នរោត្តម សីហមុនី ព្រះមហាក្សត្រកម្ពុជា និងលិខិតចុះថ្ងៃទី៤ខែសីហា របស់អគ្គលេខាធិការដ្ឋានរដ្ឋសភា។
លោកស្រី ជា វណ្ណាត អ្នកវិភាគឯករាជ្យ បានសម្ដែងក្ដីអបអរចំពោះការចូលធ្វើសច្ចាប្រណិធានរបស់តំណាងរាស្ត្រគណបក្សសង្គ្រោះជាតិទាំង៥៥រូប។ លោកស្រី ជា វណ្ណាត លើកឡើងថា នេះគឺជាពេលវេលាដ៏ល្អសម្រាប់គណបក្សជាប់ឆ្នោតទាំងពីរនៅកម្ពុជា ចាប់ដៃគ្នាធ្វើការដើម្បីបម្រើប្រទេសជាតិ ដោះស្រាយបញ្ហាសង្គម និងទាក់ទាញវិនិយោគិនបរទេសឲ្យចូលមកកម្ពុជាកាន់តែច្រើនជាងនេះទៅទៀត។ ការធ្វើការរួមគ្នា បើតាមអ្នកវិភាគឯករាជ្យរូបនេះ គឺតែងតែជួបប្រទះបញ្ហារកាំរកូសខ្លះ ប៉ុន្តែលោកស្រីជា វណ្ណាតសង្ឃឹមថា គណបក្សទាំងពីរ នឹងជជែកពិភាក្សាជាមួយគ្នា ដើម្បីដោះស្រាយបញ្ហាអាចនឹងកើតមានឡើងនាពេលអនាគត។
សូមជម្រាបជូនថា នៅថ្ងៃទី៤សីហានេះ លោកសម រង្ស៊ី ប្រធានគណបក្សសង្គ្រោះជាតិ បានផ្ញើលិខិតមួយច្បាប់ជូនលោកហេង សំរិន ប្រធានរដ្ឋសភាជាតិ។ ជាលិខិតដែលស្នើសុំចាត់ចែងរៀបចំឲ្យបេក្ខជនជាប់ឆ្នោតតំណាងរាស្ត្ររបស់ខ្លួន បានចូលធ្វើសច្ចាប្រណិធាននៅចំពោះមុខព្រះភ័ក្ត្រព្រះមហាក្សត្រ។ ភ្លាមៗនោះ អគ្គលេខាធិការដ្ឋានរដ្ឋសភា ក៏បានសរសេរលិខិតមួយច្បាប់ ផ្ញើជូនសម្ដេចចៅហ្វាវាំង ដោយបានស្នើសុំឲ្យរៀបចំពិធីសច្ចាប្រណិធាន ជូនតំណាងរាស្ត្រគណបក្សសង្គ្រោះជាតិចំនួន៥៥រូប។ តំណាងរាស្ត្រទាំង៥៥រូបរបស់គណបក្សប្រឆាំង ដែលត្រូវបានប្រកាសសុពលភាពកាលពីថ្ងៃទី២៣ខែកញ្ញាឆ្នាំ២០១៣ ប៉ុន្តែពុំទាន់បានចូលធ្វើសច្ចាប្រណិធានចូលកាន់តំណែងនៅឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ