ថ្នាក់ដឹកនាំកំពូលគណបក្សទាំងពីរ កំពុងជជែកបញ្ចប់បញ្ហា ដែលពុំទាន់យល់ស្រប លើវិសោធនកម្មរដ្ឋធម្មនុញ្ញ ស្តីពី គ.ជ.ប
រហូតដល់ព្រឹកសៅរ៍នេះ លោកសម រង្ស៊ី បានឲ្យដឹងថា លោកបានទាក់ទងតាមទូរស័ព្ទជាមួយថ្នាក់ដឹកនាំកំពូលគណបក្សប្រជាជនកម្ពុជា ដើម្បីជជែក ឈានទៅបញ្ចប់បញ្ហា ដែលក្រុមការងារគណបក្សទាំងពីរ ពុំទាន់បានឯកភាពគ្នា លើសេចក្តីព្រាងវិសោធនកម្មរដ្ឋធម្មនុញ្ញ។ នោះគឺពាក់ព័ន្ធនឹងស្វ័យភាពការងាររបស់សមាជិកគ.ជ.ប និងពាក្យពេចន៍មួយចំនួនទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១១
ប្រធានគណបក្សសង្គ្រោះជាតិ លោក សម រង្ស៊ី បានឲ្យដឹងនៅព្រឹកថ្ងៃសៅរ៍នេះថា ថ្នាក់ដឹកនាំកំពូល ពោលគឺលោក និងលោកសខេង កំពុងជជែកបន្តលើអ្វីដែលក្រុមការងារពុំទាន់ឯកភាពគ្នា។ ក្នុងនោះ លោកបានជួបតាមទូរស័ព្ទ ដើម្បីបញ្ចប់បញ្ហា លើសំណុចសេសសល់ ក្នុងសេចក្តីព្រាងរដ្ឋធម្មនុញ្ញ។ នោះគឺពាក្យពេចន៍ និងរៀបចំឃ្លោឃ្លា ឲ្យបានត្រឹមត្រូវ។ តែមិនមែនជាការងារធំដុំទេ។
លោកសម រង្ស៊ី បានអះអាងថា ថ្នាក់ដឹកនាំកំពូលគណបក្សទាំងពីរ បានជជែកគ្នាហើយ តែពេលនេះ លោកមិនអាចលាតត្រដាងទេ។
ក្រុមការងារវិសោធនកម្មរដ្ឋធម្មនុញ្ញ រវាងគណបក្សប្រជាជនកម្ពុជា និងគណបក្សសង្គ្រោះជាតិ ដឹកនាំដោយលោក ប៉ែន បញ្ញា និងលោក អេង ឆៃអ៊ាង បន្ទាប់ពីកិច្ចប្រជុំរយៈពេល ៣ម៉ោង កាលពីរសៀលថ្ងៃទី១សីហា បានឯកភាពលើវិសោធនកម្មមាត្រា ៧៦ និងការបង្កើតជំពូកថ្មី ទាក់ទងនឹងអង្គការរៀបចំការបោះឆ្នោត គជប ដែលមាន ២ មាត្រា កំណត់ពីតួនាទី និងអាណត្តិរបស់គ.ជ.ប។ តែក្រុមការងារគណបក្សទាំងពីរ មិនបានកំណត់ឲ្យសមាជិកគជបថ្មី មានអភ័យឯកសិទ្ធិដូចតំណាងរាស្ត្រនោះទេ។ រីឯស្វ័យភាពការងាររបស់គ.ជ.ប ក៏ត្រូវក្រុមការងារចម្រុះ ទុកជូនថ្នាក់ដឹកនាំគណបក្សទាំងពីរ ជាអ្នកសម្រេច។
នៅព្រឹកថ្ងៃសៅរ៍នេះ លោក អេង ឆៃអ៊ាង ប្រធានក្រុមការងារគណបក្សសង្គ្រោះជាតិ បានឲ្យដឹងថា សេចក្តីព្រាងវិសោធនកម្មរដ្ឋធម្មនុញ្ញ នៅសល់តែពីពីរចំណុចប៉ុណ្ណោះ ដែលពុំទាន់ឯកភាព នោះគឺស្វ័យភាពការងារ និងពាក្យពេចន៍មួយចំនួន។ ចំណុចទាំងពីរនោះ ថ្នាក់ដឹកនាំកំពូល អាចជជែកគ្នាតាមទូរស័ព្ទ នឹងសម្រេចបានហើយ ដោយមិនចាំបាច់ដល់ថ្នាក់ប្រជុំទល់មុខគ្នាទៀតទេ។
យ៉ាងណាក៏ដោយ នៅព្រឹកថ្ងៃសៅរ៍នេះ លោកសមរង្ស៊ី បានបដិសេធមិនបញ្ជាក់ថា ពេលណា ដែលគណបក្សសង្គ្រោះជាតិ ចូលធ្វើសច្ចាប្រណិធាន ស្បថក្នុងព្រះបរមរាជវាំង និងចូលប្រជុំរដ្ឋសភា នោះទេ។ លោកសមរង្ស៊ី លើកឡើងថា ពេលចប់ការធ្វើវិសោធនកម្មរដ្ឋធម្មនុញ្ញនេះហើយ ទើបគណបក្សសង្គ្រោះជាតិ ប្រកាសថា ត្រូវធ្វើអ្វីបន្តទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ