កំណែទម្រង់បោះឆ្នោត ត្រូវការឆន្ទៈអ្នកនយោបាយខ្លាំងជាងជំនួយបច្ចេកទេស!
ចុះផ្សាយនៅថ្ងៃ៖
ស្តាប់ - ០៥:០៨
ការមកដល់កម្ពុជារបស់អ្នកជំនាញការជប៉ុនដើម្បីសិក្សាអំពីលទ្ធភាពជួយដល់កំណែទម្រង់ការបោះឆ្នោតនៅកម្ពុជាគឺជាដំណឹងល្អមួយ។ ដំណឹងល្អដោយសារថាជំនួយនេះត្រូវនឹងសេចក្តីត្រូវការជាក់ស្តែងរបស់កម្ពុជា។ ម្យ៉ាងទៀត ទាំងគណបក្សកាន់អំណាចទាំងគណបក្សប្រឆាំងសុទ្ធតែបានអះអាងថាខ្លួនត្រូវការធ្វើកំណែទម្រង់ការបោះឆ្នោតជាចាំបាច់។ ដូច្នេះ គេអាចនិយាយបានថាពេលវេលានៃកំណែទម្រង់បោះឆ្នោតបានមកដល់ហើយ។ ប៉ុន្តែ លទ្ធផលនៃកំណែទម្រង់នេះសម្រេចបានកម្រិតណាវាអាស្រ័យជាសំខាន់ទៅលើឆន្ទៈអ្នកនយោបាយខ្មែរច្រើនជាងជំនួយផ្នែកបច្ចេកទេស។
ប្រទេសមួយដែលក្រីក្រនិងមានហេដ្ឋារចនាសម្ព័ន្ធសង្គមទន់ខ្សោយគ្រប់វិស័យដូចជាកម្ពុជាត្រូវការចាំបាច់ណាស់នូវជំនួយពីសហគមន៍អន្តរជាតិ។ ជារឿយៗកម្ពុជាតែងដង្ហោយរកជំនួយ រីឯសហគមន៍អន្តរជាតិក៏តែងតែឆ្លើយតបជានិច្ចដែរ។ សមិទ្ធផលទាំងឡាយដែលកម្ពុជាមានពេលនេះ(ទាំងហេដ្ឋារចនាសម្ព័ន្ធរូបវ័ន្តនិងទាំងធនធានបញ្ញា) ពិតជាមិនអាចកាត់ផ្តាច់បានឡើយពីកិច្ចខិតខំប្រឹងប្រែងរបស់ខ្មែរខ្លួនឯងផងនិងពីជំនួយរបស់បរទេសផង។
វត្តមានរបស់អ្នកជំនាញការបោះឆ្នោតជប៉ុននៅលើទឹកដីកម្ពុជានាពេលនេះក៏ជាការឆ្លើយតបនឹងការអំពាវនាវរបស់កម្ពុជាដែរ។ គេនៅចាំបានថា កាលពីថ្ងៃទី ១៤ តុលាឆ្នាំ ២០១៣ កន្លងទៅ គណបក្សប្រជាជនកម្ពុជាបានប្រកាសជាឱឡារិកអំពីចេតនាធ្វើកំណែទម្រង់ការបោះឆ្នោត។ មិនត្រឹមតែប៉ុណ្ណោះទេ លោកនាយករដ្ឋមន្ត្រី ហ៊ុន សែន ក៏បានអំពាវនាវដោយផ្ទាល់ ទៅកាន់ប្រទេសជប៉ុនដើម្បីឲ្យប្រទេសនេះជួយកម្ពុជាក្នុងកំណែទម្រង់បោះឆ្នោតនេះផងដែរ។
ការអំពាវនាវនេះហាក់មិនមែនជាការចៃដន្យទេពីព្រោះកម្ពុជាកំពុងជួបវិបត្តិនយោបាយក្រោយការបោះឆ្នោតដែលកើតឡើងដោយសារការប្រឆាំងជំទាស់លទ្ធផលពីសំណាក់គណបក្សប្រឆាំង។ ម្យ៉ាងទៀត រហូតមកទល់ពេលនេះ បញ្ហាចម្រូងចម្រាស់ទាក់ទងនឹងការបោះឆ្នោតជាពិសេសការតវ៉ាប្រឆាំងលទ្ធផលបោះឆ្នោតនៅតែជាបច្ចុប្បន្នភាពក្តៅគគុកមួយដដែលសម្រាប់ប្រទេសកម្ពុជា។ ជារៀងរាល់លើក ឲ្យតែបោះឆ្នោតរួច ប្រទេសនេះមិនដែលបានស្គាល់ភាពស្ងប់ស្ងាត់ម្តងណាទេ។ ដើមហេតុសំខាន់បំផុតនៃជម្លោះបោះឆ្នោតគឺបណ្តាលមកពីការមិនទុកចិត្តលើអាជ្ញាកណ្តាលនេះឯង។
អ៊ីចឹងហើយបានជាការមកដល់កម្ពុជារបស់ក្រុមអ្នកស្រាវជ្រាវកំណែទម្រង់បោះឆ្នោតជនជាតិជប៉ុននៅពេលនេះបានទទួលការសាទរពីគ្រប់មជ្ឈដ្ឋាន។ សាទរពីព្រោះតែគេរំពឹងថា ជប៉ុនអាចជួយបញ្ហានេះបាន។ យ៉ាងណាក៏ដោយចុះ ការជួយជ្រោមជ្រែងពីសំណាក់សហគមន៍អន្តរជាតិជារឿងសំខាន់មួយហើយ ប៉ុន្តែ អ្វីដែលសំខាន់ជាងនេះទៅទៀតនោះគឺឆន្ទៈរបស់អ្នកនយោបាយខ្មែរខ្លួនឯងឯណេះទេ។ ដូចពាក្យចាស់បុរាណពោលថា មុននឹងស្រែកឲ្យគេជួយ មនុស្សត្រូវចេះជួយខ្លួនឯងជាមុនសិន។
នៅកម្ពុជា កង្វះឆន្ទៈរបស់អ្នកនយោបាយនិងកង្វះកិច្ចខិតខំប្រឹងប្រែងជួយខ្លួនឯងត្រូវគេមើលឃើញថាគឺជាបញ្ហាធំធេងមួយមិនថាក្នុងវិស័យនយោបាយ សង្គមកិច្ច សេដ្ឋកិច្ច ឬក៏វិស័យផ្សេងទៀតឡើយ។ ក្នុងស្ថានភាពនេះ ទោះជាមានជំនួយពីបរទេសច្រើនយ៉ាងណាក៏ដោយ មិនអាចជំរុញការអភិវឌ្ឍប្រទេសនេះឲ្យលឿនទៅមុខបានដែរ។
លើសពីនេះទៅទៀត កម្ពុជាហាក់កំពុងកើតជំងឺពឹងផ្អែកលើជំនួយបរទេសយ៉ាងខ្លាំងទៅវិញ។ ជំងឺនេះប្រសិនបើមិនប្រញាប់ព្យាបាលទេ កម្ពុជាច្បាស់ជាមិនងាយងើបចេញពីភាពក្រីក្របានឡើយ។
និយាយពីកំណែទម្រង់ការបោះឆ្នោតវារឹតតែទាមទារនូវឆន្ទៈខ្ពស់របស់អ្នកនយោបាយថែមទៀតពីព្រោះកំណែទម្រង់មួយនេះជាប់ទាក់ទងទៅនឹងការប្រជែងអំណាច។ ហេតុដូច្នេះហើយបានជាការប្រកាសធ្វើកំណែទម្រង់ការបោះឆ្នោតរបស់គណបក្សប្រជាជនកម្ពុជាបានធ្វើឲ្យអ្នកខ្លះសាទរ តែអ្នកខ្លះទៀតមិនភ្ញាក់ផ្អើលពីព្រោះកំណែទម្រង់ជាច្រើនដែលគណបក្សនេះធ្លាប់បានប្រកាសច្រើនតែមិនសូវមានប្រសិទ្ធភាព។ មូលហេតុសំខាន់មួយគេមើលឃើញជាទូទៅគឺ កង្វះឆន្ទៈពិតប្រាកដនេះឯង។
យ៉ាងណាក៏ដោយចុះ ទាំងអស់គ្នាគួរចូលរួមនិងជួយជំរុញកំណែទម្រង់បោះឆ្នោតជាជាងការធ្វើបុរេវិនិច្ឆ័យដោយមិនផ្តល់ឱកាសដើម្បីសាកល្បង។ ឥឡូវនេះ ប្រទេសជប៉ុនបានឆ្លើយតបយ៉ាងរួសរាន់ទៅនឹងការអំពាវនាវរបស់កម្ពុជា។ ម្យ៉ាងទៀត សូមកុំភ្លេចថា ជប៉ុនអាចជួយកម្ពុជាបានទាំងផ្នែកបច្ចេកទេសនិងហិរញ្ញវត្ថុ។ ដូច្នេះ នេះពិតជាឱកាសល្អមួយដែលខ្មែរត្រូវចាប់យកដើម្បីជំរុញឲ្យមានកំណែទម្រង់ការបោះឆ្នោតពិតប្រាកដមួយនៅកម្ពុជា។
មិនថាតែជប៉ុនទេ ប្រទេសជាច្រើនទៀតក៏នៅតែរង់ចាំជួយកម្ពុជាដែរ។ ដូច្នេះ អ្វីដែលនៅលស់គឺឆន្ទៈដ៏ពិតប្រាកដរបស់ភាគីខ្មែរតែប៉ុណ្ណោះ។ ប្រសិនបើអ្នកនយោបាយខ្មែរបោះបង់របៀបធ្វើនយោបាយដោយប្រើល្បិចកលនិងគំនុំសងសឹក ហើយបែរមកតម្កល់ភាពសុខសាន្តរបស់ប្រទេសជាតិនិងប្រជាជនជាធំ កំណែទម្រង់បោះឆ្នោតពិតជាអាចធ្វើបានដោយមិនលំបាកឡើយ។ និយាយដោយខ្លី នៅក្នុងកំណែទម្រង់ការបោះឆ្នោត កម្ពុជាត្រូវការឆន្ទៈអ្នកនយោបាយខ្លាំងជាងជំនួយបច្ចេកទេសទៅទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ