សហគមន៍បឹងកក់ និងបុរីកីឡា តវ៉ារកដំណោះស្រាយនៅមុខសាលារាជធានីភ្នំពេញ អ្នកបុរីកីឡាពីរនាក់ដួលសន្លប់
ប្រជាសហគមន៍តំបន់បឹងកក់ និងបុរីកីឡា បានមកជួបជុំគ្នានៅមុខសាលារាជធានីភ្នំពេញ តាមការគ្រោងទុក នៅព្រឹកថ្ងៃចន្ទនេះ ដើម្បីទាមទារឲ្យអាជ្ញាធរពន្លឿនការដោះស្រាយ បញ្ចប់ជម្លោះដីធ្លីរ៉ាំរ៉ៃនៅតំបន់បឹងកក់។ ក្រោយពីបានចូលទៅជួបជាមួយតំណាងសាលាក្រុង អ្នកភូមិបឹងកក់ និងបុរីកីឡា បានសម្រេចរំសាយការជួបជុំហើយ នៅម៉ោងជិត១២ថ្ងៃត្រង់នេះ ដើម្បីរង់ចាំមើលដំណោះស្រាយ ដែលសាលាក្រុងភ្នំពេញសន្យាថា នឹងចាប់អនុវត្តជាបន្តបន្ទាប់នៅក្នុងសប្ដាហ៍នេះ។ នៅក្នុងការតវ៉ានោះ អ្នកបុរីកីឡាពីរនាក់ក៏បានដួលសន្លប់ផងដែរ។
ចុះផ្សាយនៅថ្ងៃ៖
ស្តាប់ - ០២:០៣
ភាពយឺតយាវ មិនគោរពពាក្យសន្យារបស់សាលារាជធានីភ្នំពេញ ធ្វើឲ្យអ្នកភូមិបឹងកក់ និងបុរីកីឡាជិត១០០នាក់ មកជួបជុំតវ៉ា លើចញ្ចើមផ្លូវ ទល់មុខសាលារាជធានីភ្នំពេញ។ លោកស្រី ទេព វណ្ណី តំណាងអ្នកភូមិបឹងកក់ មានប្រសាសន៍ប្រាប់វិទ្យុបារាំងអន្ដរជាតិថា សាលារាជធានីបានសន្យាជាមួយអ្នកភូមិកាលពីពាក់កណ្ដាលខែមិថុនាកន្លងទៅ ថានឹងដោះស្រាយ ផ្ដល់បណ្ណកម្មសិទ្ធិជូនអ្នកភូមិបឹងកក់៤០គ្រួសារទៀត នៅពាក់កណ្ដាលខែកក្កដា។ ប៉ុន្តែរហូតមកទល់ថ្ងៃទី២៨កក្កដាទៅហើយ នៅមិនទាន់មានការដោះស្រាយណាមួយនៅឡើយទេ។
ក្រៅពីទាមទារឲ្យពន្លឿនការដោះស្រាយតាមសន្យា ក្រុមអ្នកភូមិក៏ទាមទារឲ្យសាលារាជធានីភ្នំពេញ រៀបចំកំណត់ព្រំដីទំហំ១២,៤៤ហិកតារបស់អ្នកភូមិ ឲ្យដាច់ស្រឡះពីដីក្រុមហ៊ុនស៊ូកាកូអ៊ីន។ នេះបើតាមលោកស្រី ទេព វណ្ណី។
បន្ទាប់ពីធ្វើការតវ៉ានៅលើចិញ្ចើមផ្លូវ ទល់មុខសាលារាជធានីភ្នំពេញអស់មួយរយៈ តំណាងអ្នកភូមិចំនួន១៣នាក់ ត្រូវបានអនុញ្ញាតឲ្យចូលជួបជាមួយលោកមាន ចន្ទយ៉ាដា ដែលជានាយករងរដ្ឋបាលសាលារាជធានី។ ជាលទ្ធផល សាលារាជធានីភ្នំពេញបានសូមទោសអ្នកភូមិចំពោះការយឺតយ៉ាវ និងបានសន្យាថា ដំណើរការដោះស្រាយផ្ដល់បណ្ណកម្មសិទ្ធិដីធ្លីជូនប្រជាពលរដ្ឋទាំង៤០គ្រួសារ នឹងចាប់ផ្ដើមពីសប្ដាហ៍នេះតទៅ។ សប្ដាហ៍នេះ សាលារាជធានីភ្នំពេញនឹងអញ្ជើញមួយគ្រួសារមកដោះស្រាយ ហើយនៅសប្ដាហ៍ក្រោយ នឹងអញ្ជើញ១៤គ្រួសារទៀត។ ចំណែកអ្នកសេសសល់ សាលារាជធានីភ្នំពេញនឹងដោះស្រាយផ្ដល់បណ្ណកម្មសិទ្ធិដីជូន ជាបន្តបន្ទាប់។ ក្រុមអ្នកភូមិ បានរំសាយការជួបជុំតវ៉ាហើយ នៅម៉ោង១២ថ្ងៃត្រង់ ថ្ងៃចន្ទទី២៨កក្កដានេះ។ នេះបើតាមការឲ្យដឹងពីលោកស្រី ទេព វណ្ណី។
សូមជម្រាបជូនថា ការតវ៉ានៅព្រឹកថ្ងៃចន្ទនេះ មិនមានការបិទផ្លូវទេ។ យ៉ាងណាក៏ដោយ ស្ដ្រីបុរីកីឡា២នាក់បានដួលសន្លប់ បន្ទាប់ពីមានការរុញច្រានពីសំណាក់កងសន្តិសុខខណ្ឌដូនពេញ។ ក្រុមអ្នកភូមិចោទថា កងសន្តិសុខ បានប្រើប្រាស់ដំបងឆក់ស្ដ្រីបុរីកីឡាទាំងពីរនាក់នោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ