ប្រធានអង្គការលីកាដូទំនងជាត្រូវបានជ្រើសរើសជាសមាជិកទី៩នៃ គ.ជ.ប
បេក្ខភាពបុគ្គលទី៩ដែលនឹងក្លាយជាសមាជិកគណកម្មាធិការជាតិរៀបចំការបោះឆ្នោតត្រូវបានបង្ហើបជាបណ្តើៗហើយនៅថ្ងៃនេះ។ ទោះបីជាមេដឹកនាំគណបក្សជាប់ឆ្នោតទាំងពីរបានលាក់ពីឈ្មោះសមាជិកនោះក៏ដោយ ក៏ប៉ុន្តែលោកស្រី ពុង ឈីវហ្គេច ប្រធានអង្គការលីកាដូបានបង្ហាញពីទំនាក់ទំនងជាមួយមេដឹកនាំគណបក្សទាំងពីរ ពីការស្នើសុំលោកស្រីសម្រាប់តំណែងនេះ ក៏ប៉ុន្តែអ្វីៗច្បាស់ការនឹងត្រូវប្រកាសនៅថ្ងៃស្អែក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:០៣
បេក្ខជនទី៩ ដែលនឹងត្រូវជ្រើសរើសឡើង ដើម្បីបញ្ចូលទៅក្នុងសមាសភាពគណកម្មាធិការជាតិរៀបចំការបោះឆ្នោតថ្មី ត្រូវបានបង្ហើបឲ្យហើយនៅព្រឹកថ្ងៃចន្ទនេះ ទំនងជាលោកស្រី ពុង ឈីវហ្គេច ប្រធានអង្គការការពារសិទ្ធិមនុស្សលីកាដូ។ សាមីខ្លួនផ្ទាល់ លោកស្រីពុង ឈីវហ្គេច ក៏មិនបានបដិសេធការដៅឈ្មោះលោកស្រីជាបេក្ខភាពនៅក្នុងគណៈកម្មការ ដែលកន្លងមកមានភាពចំរូងចំរាស់ដ៏ខ្លាំងបំផុតនៅក្នុងប្រវត្តិនៃការបោះឆ្នោតរបស់ប្រទេសកម្ពុជា។
លោកស្រី ពុង ឈីវហ្គេច អាយុ៧១ឆ្នាំ ដែលមានងារជាវេជ្ជបណ្ឌិតផងនោះ បានប្រាប់វិទ្យុបារាំង RFI នៅថ្ងៃនេះថា លោកស្រីកំពុងតែឆ្លើយឆ្លងលិខិតទៅកាន់មេដឹកនាំគណបក្សជាប់ឆ្នោតទាំងពីរ ដោយលោកស្រីបញ្ជាក់ថា នៅមិនទាន់ជាផ្លូវការនៅឡើយ។
យោងតាមកិច្ចព្រមព្រៀងរវាងគណបក្សប្រជាជនកម្ពុជា និងគណបក្សសង្គ្រោះជាតិ កាលពីថ្ងៃទី២២កក្កដា កន្លងទៅនេះ សមាសភាព គ.ជ.ប ថ្មីដែលមាន៩រូបនោះ នឹងត្រូវជ្រើសរើសពីគណបក្សជាប់ឆ្នោតទាំងពីរ ៤នាក់ម្ខាង ហើយបុគ្គលទី៩គឺត្រូវជ្រើសរើសតាមការយល់ព្រមរវាងគណបក្សទាំងពីរ។
ទាក់ទងទៅនឹងបញ្ហានេះដែរ លោកនាយករដ្ឋមន្ត្រី ហ៊ុន សែន បានថ្លែងប្រាប់អ្នកកាសែតបន្ទាប់ពីការប្រកាសសុពលភាពតំណាងរាស្ត្រដល់លោក សម រង្សី ប្រធានគណបក្សសង្គ្រោះជាតិនៅព្រឹកថ្ងៃទី២៨កក្កដានេះថា លោករក្សាសិទ្ធិដល់បុគ្គលទី៩ដែលនឹងឆ្លើយតបជាផ្លូវការ។
ជាមួយគ្នានេះ លោក សម រង្សី ប្រធានគណបក្សសង្គ្រោះជាតិដែលមានវត្តមាននៅរដ្ឋសភាដែរនោះ បានថ្លែងនៅចំពោះមុខអ្នកសារព័ត៌មានស្រដៀងនឹងលោកនាយករដ្ឋមន្ត្រីដែរ ដោយរង់ចាំការសម្រេចរបស់សមីជន។
ដោយឡែក ចំពោះការបង្ហាញបេក្ខជនរបស់គណបក្សនីមួយៗ ម្ខាង៤នាក់នោះ ទៅក្នុង គ.ជ.ប មេដឹកនាំគណបក្សទាំងពីរ អះអាងដូចគ្នា មិនអាចបង្ហើបពីបេក្ខភាពទាំងនេះបាននៅឡើយទេ។ ក៏ប៉ុន្តែតាមការប្រកាសឲ្យដឹងពីគណបក្សប្រឆាំងកន្លងមក សមាសភាពមន្ត្រីជាន់ខ្ពស់ចំនួន២រូបរបស់គណបក្សនេះ នឹងត្រូវបញ្ចូលទៅក្នុងសមាសភាព គ.ជ.ប ក្នុងនោះមានលោកគួយ ប៊ុនរឿន បេក្ខជនតំណាងរាស្ត្រគណបក្សសង្គ្រោះជាតិមណ្ឌលកំពង់ចាម ដែលអាសនៈរបស់លោកត្រូវប្រគល់ឲ្យប្រធានបក្ស លោក សម រង្សី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ