មេបក្សប្រឆាំងទាំងពីរ រងអត្ថាធិប្បាយអវិជ្ជមានពីមិត្តនៅក្នុងហ្វេសប៊ុក
ទំព័រហ្វេសប៊ុករបស់មេដឹកនាំគណបក្សប្រឆាំងទាំងពីរ បានទទួលយ៉ាងក្រាសក្រែលនូវអត្ថាធិប្បាយមិនពេញចិត្តពីគ្រប់ទិសទី បន្ទាប់ពីគណបក្សសង្គ្រោះជាតិចុះកិច្ចព្រមព្រៀងរួមជាមួយគណបក្ស ប្រជាជនកម្ពុជា ក្រោយកិច្ចប្រជុំ កាលពីថ្ងៃអង្គារ ដើម្បីបំបែកភាពទាល់ច្រកខាងនយោបាយ។ អ្នកនាំពាក្យគណបក្សប្រឆាំងចាត់ទុកថាប្រជាពលរដ្ឋ នៅមិនទាន់យល់ពីសារៈសំខាន់ ហើយត្រូវការពេលវេលាដើម្បីពន្យល់ពួកគេបន្ថែមទៀត។
ចុះផ្សាយនៅថ្ងៃ៖
ស្តាប់ - ០២:៥១
ប៉ុន្មានម៉ោងក្រោយពីចេញសេចក្តីប្រកាសរួម ដែលជាលទ្ធផលនៃកិច្ចប្រជុំកំពូល រវាងមេដឹកនាំគណបក្សជាប់ឆ្នោតទាំងពីរទំព័រហ្វេសប៊ុកដែលមានឈ្មោះ និងរូបថតលោក សម រង្សី និង លោក កឹម សុខា ប្រធាន និងអនុប្រធានគណបក្សសង្គ្រោះជាតិ រងការវាយប្រហារយ៉ាងខ្លាំងពីអត្ថាធិប្បាយមិនសប្បាយចិត្តពីសំណាក់មិត្តក្នុងបណ្តាញសង្គម ដែលមានទំនាក់ទំនងជាមួយមេដឹកនាំបក្សប្រឆាំងទាំងពីរ។
មានពាក្យពេជន៍ជាច្រើនរាប់សិប ត្រូវបានគេធ្វើអត្ថាធិប្បាយទៅលើហ្វេសប៊ុកលោក សម រង្សីនិងលោក កឹម សុខា ដូចជា« CPP ជាវាំងននបិទបាំងការឈ្លានពានរបស់យួន ឯCNRPវិញបានចូលខ្លួនធ្វើជាកញ្ចក់រៃបាន់បិទបាំង អំពើរអាក្រក់របស់CPP» «សូមកុំដើរជាន់ដានចាស់របស់ហ្វ៊ុនស៊ិនប៉ិច!» «កុំបន្ទោសគាត់ គួរបន្ទោសខ្លួនឯងជិះទូកមិនមើលឲ្យហើយម្តេចដល់ កណ្តាលទន្លេទើបដឹងទូកធ្លាយ»។ រួមនឹងអត្ថាធិប្បាយអាក្រក់ៗជាច្រើនទៀតដែលខ្លះបានប្រើប្រាស់ពាក្យពេជន៍អសុរសផងដែរ។
ជាមួយគ្នានេះ ក៏មានអត្ថាធិប្បាយគាំទ្រដល់មេបក្សប្រឆាំងទាំងពីផងដែរ ឬក៏អត្ថាធិប្បាយបែបលួងចិត្តដូចជា «ខ្ញុំសង្ឃឹមថាការបញ្ចប់ភាពជាប់គាំងផ្នែកនយោបាយនេះ នឹងជួយអោយប្រទេសមានសុខសន្តិភាពប្រជាជនអាចបន្តរបរទទួលទានបានដូចធម្មតាវិញ និងសេដ្ឋកិច្ចរីកចម្រើន។ប៉ុន្តែខ្ញុំ សង្ឃឹមថា គណបក្សសង្គ្រោះជាតិនឹងនៅតែជាឆ្អឹងជំទាស់នឹង CPP រាល់ភាពមិនប្រក្រតី ដើម្បីផលប្រយោជន៍ជាតិ និងរាស្ត្រ ជាដើម។»
ជុំវិញការធ្វើអត្ថាធិប្បាយមួយអស់ដៃរបស់មិត្តនៅក្នុងបណ្តាញទំនាក់ទំនងសង្គមរបស់លោកសម រង្សី និងលោក កឹម សុខា នាពេលនេះលោក យឹម សុវណ្ណ អ្នកនាំពាក្យគណបក្សសង្គ្រោះជាតិ មានប្រតិកម្មទទូចឲ្យប្រជាពលរដ្ឋមានការអត់ធ្មត់ រង់ចាំមើលលទ្ធផលចុងក្រោយនៃការអនុវត្តកិច្ចព្រមព្រៀង ដែលនឹងស្តែងចេញនូវការចង់បានរបស់ប្រជាពលរដ្ឋ។
ចំណុចសំខាន់ៗមួយចំនួន ត្រូវបានលោក យឹម សុវណ្ណ លើកឡើងថាសង្គ្រោះជាតិមានឱកាសចូលរួមនោះ គឺការកែទម្រង់គ.ជ.ប ការធ្វើបញ្ជីឈ្មោះអ្នកបោះឆ្នោតថ្មី មានប្រព័ន្ធផ្សព្វផ្សាយវិទ្យុ និងទូរទស្សន៍ ប្រព័ន្ធត្រួតពិនិត្យតុល្យភាពអំណាច រវាងរដ្ឋសភា និងរដ្ឋាភិបាល និងកិច្ចការជាច្រើនទៀត ដែលគណបក្សប្រឆាំងនេះត្រូវបំពេញលើសពីកិច្ចព្រមព្រៀងចំណុចគោលៗ ដែលគណបក្សសង្គ្រោះជាតិ ត្រូវការពេលពន្យល់លម្អិតអ្នកគាំទ្ររបស់ខ្លួនបន្ថែមទៀត។
លោកប៉ែន ពុទ្ធសភា អ្នកកាន់ហ្វេសប៊ុករបស់មេបក្សប្រឆាំងលោក សម រង្សី បានថ្លែងថា អត្ថាធិប្បាយបានធ្លាក់មកគ្រប់ច្រកល្ហក ទាំងក្នុងស្រុក និងក្រៅស្រុក ក៏ប៉ុន្តែនោះជាសេរីភាពរបស់ពួកគេ។
ជាមួយគ្នានេះ អ្នកនាំពាក្យអង្គភាពព័ត៌មាន និងប្រតិកម្មរហ័ស នៃទីស្តីការគណរដ្ឋមន្ត្រី លោក ទិត្យ សុធា សុំមិនធ្វើអត្ថាធិប្បាយទៅលើអត្ថាធិប្បាយនានាលើទំព័រហ្វេសប៊ុកមេដឹកនាំគណបក្សប្រឆាំងទាំងពីរ ក៏ប៉ុន្តែលោកអំពាវនាវថា គួរតែអ្នកឡើងតាមបណ្តាញសង្គមទាំងអស់គប្បីរក្សាភាពបង្រួបបង្រួមជាតិ នៅក្នុងកាលៈទេសៈបច្ចុប្បន្ន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ