ខ្មែរខំស្រាយជម្លោះបោះឆ្នោត ដោយគ្មាន«បិតាផ្សះផ្សារជាតិ» និងអន្តរការីបរទេស
ចុះផ្សាយនៅថ្ងៃ៖
ស្តាប់ - ១២:២៤
គណបក្សប្រជាជនកម្ពុជា និងគណបក្សសង្គ្រោះជាតិ គឺតែពីរបក្សនេះគត់ ដែលបានទទួលទំនុកចិត្តពីប្រជាជន ឱ្យដឹកនាំប្រទេស ក្នុងការបោះឆ្នោតរើសតំណាងរាស្ត្រ សម្រាប់នីតិកាលទី៥នៃរដ្ឋសភា នៅថ្ងៃទី២៨ ខែកក្កដា ឆ្នាំ២០១។ ក្រោយមក អ្នកនយោបាយបានធ្វើកិច្ចការជាច្រើន៖ ឈ្លោះគ្នា ចរចាគ្នា ប្រើកម្លាំង និងសម្ពាធដាក់គ្នា តាំងពីជំនួបក្រុមបច្ចេកទេស ដល់ជំនួបកំពូល ដោយឆ្លងកាត់បាតុកម្ម ការវាយឱ្យរបួស ការបាញ់សម្លាប់ ការចាប់ដាក់គុក និងការរកអន្តរាគមន៍ពេញមួយឆ្នាំ ព្រោះតែហេតុផលរៀងៗខ្លួន។ ទើបតែមុននេះពីរថ្ងៃ គូទំនាស់បានរកឃើញហេតុផលរួមមួយគឺ«ការគោរពផលប្រយោជន៍ដ៏ឧត្តុង្គឧត្តមរបស់ប្រទេសជាតិ និងប្រជារាស្ត្រ»។ ថ្ងៃនេះ អ្នកនយោបាយខ្មែរប្រជុំគ្នាទៀត ដើម្បីបញ្ចប់បញ្ហាបោះឆ្នោត ដែលតែងបានកើតឡើងជាធម្មតាតាំងពីឆ្នាំ១៩៩។ ដោយគ្មាន នរោត្តម សីហនុ ឬអន្តរការីបរទេស ដូចក្នុងអាណត្តិមុនៗ លទ្ធផលនៃជំនួបកំពូលថ្ងៃទី២២ ខែកក្កដា ឆ្នាំ២០១៤នេះ បើមិនមែនជាមោទនភាពទេ មានតែភាពអាម៉ាស់ ដែលនឹងត្រូវចារឹកក្នុងប្រវត្តិនៃការបោះឆ្នោតនៅកម្ពុជាក្រោយសង្គ្រាម។
