តើបង់ពន្ធបានទទួលផលប្រយោជន៍អ្វីមកវិញ?
ចុះផ្សាយនៅថ្ងៃ៖
ស្តាប់ - ០៤:២៦
នៅក្នុងរយៈពេលប៉ុន្មានឆ្នាំចុងក្រោយនេះ គេសង្កេតឃើញថា ប្រភេទពន្ធជាច្រើនត្រូវបានបង្កើតឡើងនៅកម្ពុជា ដូចជា ពន្ធលើប្រាក់បៀវត្ស និងពន្ធលើអចលនទ្រព្យ ជាដើម។ នេះនៅមិនទាន់គិតពីពន្ធចាស់ៗ ដូចជា ពន្ធលើយានយន្ត និងពន្ធលើការធ្វើអាជីវកម្ម ជាដើម ដែលមានស្រាប់ពីមុន។ កាតព្វកិច្ចជាប់ពន្ធថ្មីៗជាច្រើនបែបនេះធ្វើឲ្យអ្នកខ្លះចោទជាសំណួរថា តើហេតុអ្វីបានជាគេត្រូវបង់ពន្ធ? តើពលរដ្ឋម្នាក់ៗទទួលបានផលប្រយោជន៍អ្វី ពីការបង់ពន្ធនេះ?
បើនិយាយតាមលក្ខណៈសង្គមសាស្រ្ត និងទស្សនវិជ្ជានយោបាយ យើងត្រូវបង់ពន្ធ ពីព្រោះ នេះគឺជាកាតព្វកិច្ចរបស់យើងគ្រប់គ្នា ក្នុងនាមជាពលរដ្ឋនៃប្រទេសមួយ។ កាតព្វកិច្ចបង់ពន្ធនេះ មានសម្រាប់ពលរដ្ឋគ្រប់ប្រទេសទាំងអស់ មិនថាតែនៅកម្ពុជា ឬនៅប្រទេសណាផ្សេងទៀតទេ។
តាមការពិត កាតព្វកិច្ចបង់ពន្ធនេះមានប្រវត្តិដ៏ចំណាស់រាប់ពាន់ឆ្នាំមកហើយ ពោលគឺ ចាប់តាំងពីការបង្កើតរដ្ឋដំបូង កាលពីប្រមាណជា ៦ពាន់ឆ្នាំមុនម៉្លេះ។ បើនិយាយឲ្យចំទៅ ការបង់ពន្ធ គឺជាមូលដ្ឋានគ្រឹះនៃការបង្កើតរដ្ឋ តាំងពីដំបូង គឺ រដ្ឋមានកាតព្វកិច្ចរក្សាសណ្តាប់ធ្នាប់ និងការពារសន្តិសុខរបស់ប្រជាជន ព្រមទាំងធានានូវសេវាសាធារណៈសម្រាប់សហគមន៍ ចំណែកពលរដ្ឋវិញមានកាតព្វកិច្ចបង់ពន្ធជូនរដ្ឋ។
និយាយពីការបង់ពន្ធ គេគួរធ្វើការបែងចែក រវាងការបង់អាករ ដូចជា ការបង់ថ្លៃទឹក ថ្លៃភ្លើង ឬថ្លៃប្រមូលសម្រាម ជាដើម ដែលជាការបង់ថ្លៃទៅលើសេវាណាមួយជាក់លាក់ និងការបង់ពន្ធទូទៅ ដូចជា ការបង់ពន្ធលើយានជំនិះ ពន្ធលើប្រាក់បៀវត្ស ពន្ធលើតម្លៃបន្ថែម ពន្ធលើប្រាក់ចំណេញរបស់ក្រុមហ៊ុន ឬពន្ធលើអចលនទ្រព្យ ជាដើម ដែលមិនមែនជាការបង់ថ្លៃទៅលើសេវាណាមួយជាក់លាក់។ ប្រភេទពន្ធទូទៅនេះហើយ ដែលអាចឲ្យអ្នកបង់ពន្ធចោទជាសំណួរថា តើបង់ពន្ធនេះបានប្រយោជន៍អ្វី?
តាមការពិតការបង់ពន្ធ វាគឺជាការចូលរួមចំណែកក្នុងថវិកាជាតិ ដើម្បីឲ្យរដ្ឋមានលុយយកទៅចំណាយ ដោយមិនចាំបាច់បោះពុម្ពលុយ ដែលអាចបង្កឲ្យមានបញ្ហាអតិផរណា។ សម្រាប់កម្ពុជា ការបង្កើនចំណូលពីការបង់ពន្ធ គឺជាគន្លឹះដ៏សំខាន់មួយ ដើម្បីឈានទៅបញ្ឈប់ការពឹងផ្អែកលើជំនួយពីបរទេស។
សម្រាប់អ្នកបង់ពន្ធ ថ្វីដ្បិតតែពន្ធនេះមិនមានការកំណត់អំពីសេវាណាមួយជាថ្នូរមកវិញជាក់លាក់ក៏ពិតមែន ក៏ប៉ុន្តែ គេអាចទទួលបានផលប្រយោជន៍ជាច្រើន ដោយផ្ទាល់ ឬដោយប្រយោល ពីការបង់ពន្ធនេះ ពីព្រោះថា លុយដែលបានពីការបង់ពន្ធនេះនឹងត្រូវយកទៅចំណាយទៅលើការបើកប្រាក់បៀវត្សដល់មន្រ្តីរាជការស៊ីវិល និងកងកម្លាំងប្រដាប់អាវុធ ដែលជាអ្នកទទួលបន្ទុកផ្តល់សេវារដ្ឋបាល ការពារសន្តិសុខ សណ្តាប់ធ្នាប់ និងការពារអធិបតេយ្យភាព និងបូរណភាពទឹកដីរបស់ប្រទេស។
បើនិយាយពីការរស់នៅប្រចាំថ្ងៃវិញ ពលរដ្ឋម្នាក់ៗអាចទទួលបាននូវផលប្រយោជន៍ពីការបង់ពន្ធ ហើយពេលខ្លះទាំងមិនដឹងខ្លួន គឺតាមរយៈសេវាសាធារណៈ ឬហេដ្ឋារចនាសម្ព័ន្ធ ដែលគេប្រើប្រាស់ជារៀងរាល់ថ្ងៃ ដូចជា ស្ពាន ថ្នល់ សាលារៀន មន្ទីរពេទ្យ ។ល។ និង។ល។ ដើម្បីធានានូវសេវាសាធារណៈអស់ទាំងនេះ ដូចជា ការសាងសង់ ជួសជុលថែទាំ ស្ពាន ថ្នល់ អគារសាលារៀន និងមន្ទីរពេទ្យ, ការបើកប្រាក់បៀវត្សដល់គ្រូបង្រៀន និងគ្រូពេទ្យ រដ្ឋត្រូវការចំណាយលុយ ហើយប្រភពចំណូលដ៏ធំបំផុតនៃថវិការបស់រដ្ឋ គឺបានមកពីការបង់ពន្ធ។
អ្នកបង់ពន្ធខ្លះអាចនឹងរអ៊ូថា ផលប្រយោជន៍ដែលខ្លួនទទួលបានមានចំនួនតិច បើធៀបនឹងទំហំពន្ធដែលខ្លួនបានបង់។ ក៏ប៉ុន្តែ គេក៏មិនត្រូវភ្លេចដែរថា ការបង់ពន្ធមិនមែនធ្វើឡើងដោយសំឡឹងតែផលប្រយោជន៍ដែលត្រូវទទួលបានមកវិញនោះទេ។ គោលការណ៍ដ៏សំខាន់មួយ នៃការបង់ពន្ធ គឺ “សាមគ្គីភាព” និង “សមធម៌”។ បន្ទុកបង់ពន្ធត្រូវតែសមាមាត្រទៅតាមលទ្ធភាពរបស់ពលរដ្ឋម្នាក់ៗ ក៏ប៉ុន្តែ សេវាសាធារណៈដែលកើតចេញពីការបង់ពន្ធនេះត្រូវបានជាប្រយោជន៍ដល់សមូហភាពទាំងមូល។ អ្នកដែលរកចំណូលបានច្រើនត្រូវបង់ច្រើន ហើយបើទោះបីជាផលប្រយោជន៍ដែលគេទទួលបានមកវិញ មានតិចជាងទំហំពន្ធដែលគេបានបង់ ក៏ប៉ុន្តែ គេបានចូលរួមចំណែកជួយដល់ពលរដ្ឋដែលខ្វះខាត។
ក៏ប៉ុន្តែ នេះគឺជាគោលការណ៍។ រីឯនៅក្នុងការអនុវត្តជាក់ស្តែងវិញ ជាពិសេស នៅក្នុងប្រទេសកម្ពុជា គេអាចយល់បានពីគំនិតរបស់ប្រជាពលរដ្ឋខ្លះ ដែលមិនសូវមានទឹកចិត្តបង់ពន្ធ ដោយសារតែគេគិតថា លុយដែលគេបង់ពន្ធនេះមិនប្រាកដថាបានចូលទៅក្នុងថវិការដ្ឋទាំងអស់នោះទេ ដោយមួយផ្នែកអាចនឹងត្រូវជ្រុះចូលទៅក្នុងហោប៉ៅរបស់មន្រ្តីពុករលួយ។ ក្នុងពេលជាមួយគ្នា សេវាសាធារណៈ ដែលរដ្ឋត្រូវផ្តល់ជាតម្លៃតបស្នងដល់ការបង់ពន្ធ ក៏មិនត្រូវបានធានាឲ្យបានម៉ត់ចត់។ នៅសាលា ការអប់រំមិនសូវមានគុណភាព។ នៅតាមមន្ទីរពេទ្យរដ្ឋភាគច្រើន បើអ្នកជំងឺគ្មានលុយឲ្យគ្រូពេទ្យ មិនអាចទទួលបានការព្យាបាលម៉ត់ចត់។ បើនិយាយពីសេវាកម្មពន្លត់អគ្គិភ័យ មន្រ្តីពន្លត់អគ្គិភ័យខ្លះ ទារយកលុយពីជនរងគ្រោះជាមុនសិន ទើបព្រមបាញ់ទឹកពន្លត់ភ្លើង។ ចំពោះមន្រ្តីសាធារណៈវិញ ជាពិសេស មន្រ្តីជាន់ខ្ពស់ មានអ្នកខ្លះនាំគ្នាតាំងខ្លួនជាចៅហ្វាយរបស់ប្រជាពលរដ្ឋ ក្នុងពេលដែលពួកគេទទួលប្រាក់ខែពីថវិការបស់រដ្ឋ ដែលមានន័យថាជាថវិកាដែលបានពីការបង់ពន្ធរបស់ប្រជាជន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ