គណបក្សជាប់ឆ្នោតទាំងពីរ ព្រមព្រៀងរៀបចំជំនួបកំពូលនៅថ្ងៃទី២២កក្កដា
គណបក្សប្រជាជនកម្ពុជា និងគណបក្សសង្គ្រោះជាតិ បានព្រមព្រៀងគ្នា រៀបចំឲ្យមានជំនួបកំពូលរវាងថ្នាក់ដឹកនាំនៃគណបក្សទាំងពីរ នៅថ្ងៃទី២២ ខែកក្កដា ឆ្នាំ២០១៤ វេលាម៉ោង ៩ ព្រឹក នៅវិមានព្រឹទ្ធសភា។ ជាកិច្ចប្រជុំចរចា ដើម្បីពិភាក្សាលម្អិតរកដំណោះស្រាយនយោបាយរួម ឈានទៅបញ្ចប់សភាពការណ៍តានតឹងបច្ចុប្បន្ន។ នេះបើតាមសេចក្តីប្រកាសរួម។
ចុះផ្សាយនៅថ្ងៃ៖
សេចក្តីប្រកាសព័ត៌មាន របស់គណបក្សប្រជាជនកម្ពុជា និងគណបក្សសង្គ្រោះជាតិ ចុះថ្ងៃទី២០ ខែកក្កដា ឆ្នាំ២០១៤ បង្ហាញថា ជំនួបកំពូលនាព្រឹកថ្ងៃអង្គារស្អែកនេះ នឹងធ្វើឡើង ក្នុងស្មារតីបង្រួបបង្រួមជាតិ ផ្សះផ្សាជាតិ និងឯកភាពជាតិ ដោយឈរលើការគោរពផលប្រយោជន៍ដ៏ឧត្តុង្គឧត្តមរបស់ប្រទេសជាតិ និងប្រជារាស្ត្រ។
សេចក្តីប្រកាសព័ត៌មានរួមដដែល បានគូសបញ្ជាក់ថា គណបក្សប្រជាជនកម្ពុជា និងគណបក្សសង្គ្រោះជាតិ បានឯកភាពគ្នា ដោះស្រាយបញ្ចប់បញ្ហានយោបាយ ដែលកើតមានក្រោយការបោះឆ្នោតជ្រើសតាំងតំណាងរាស្ត្រ នីតិកាលទី៥ នៃរដ្ឋសភា នាថ្ងៃទី២៨ ខែកក្កដា ឆ្នាំ២០១៣ រហូតដល់បច្ចុប្បន្ននេះ ដោយផ្អែកលើមូលដ្ឋាន នៃការព្រមព្រៀងគ្នាជាគោលការណ៍រវាងលោក ហ៊ុន សែន និងលោក សម រង្ស៊ី កាលពីថ្ងៃទី៩ ខែមេសា ឆ្នាំ២០១៤៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ