សមត្ថកិច្ចបង្ក្រាបបាតុកម្មនៅមុខស្ថានទូតវៀតណាម
ក្រុមប៉ូលិស និងកងសន្តិសុខរាប់សិបនាក់បានរារាំងនិងបង្ក្រាបជាច្រើនលើកលើក្រុមបាតុករដែលបានព្យាយាមប្រមូលផ្តុំតវ៉ានៅមុខស្ថានទូតវៀតណាម។ ក្រុមបាតុករជាយុវជនព្រះសង្ឃពលរដ្ឋខ្មែរកម្ពជាក្រោម រួមទាំងសកម្មជនគណបក្សសង្គ្រោះជាតិ បានទាមទារឲ្យអ្នកនាំពាក្យស្ថានទូតវៀតណាមប្រចាំកម្ពុជា សុំទោសចំពោះការអះអាងថាទឹកដីខ្មែរកម្ពុជាក្រោមជាកម្មសិទ្ធិរបស់វៀតណាមយូរហើយ មិនមែនទើបតែអាណានិគមបារាំងកាត់ចេញពីកម្ពុជានៅថ្ងៃទី៤មិថុនាឆ្នាំ១៩៤៩នោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
នេះជាការប៉ះទង្គិចរុញច្រានដេញវាយដោយហិង្សារបស់កងកម្លាំងសន្តិសុខខណ្ឌចំការមនទៅលើក្រុមបាតុករជាក្រុមយុវជនព្រះសង្ឃពលរដ្ឋខ្មែរកម្ពជាក្រោមរួមទាំងសកម្មជនគណបក្សសង្គ្រោះជាតិកាលពីព្រឹកថ្ងៃទី៨កក្កដានេះនៅមុខស្ថានទូតវៀតណាមក្នុងទីក្រុងភ្នំពេញ។
ការប៉ះទង្គិចបានកើតឡើងជាច្រើនលើក ខណៈដែលអាជ្ញាធរសមត្ថកិច្ចកងសន្តិសុខខណ្ឌចំការមន បានដាក់របាំងបិទផ្លូវឈររារាំងនិងបណ្តេញបាតុករមិនឲ្យប្រមូលផ្តុំធ្វើបាតុកម្មតវ៉ានៅមុខស្ថានទូតវៀតណាមឡើយ។ អាជ្ញាធរសមត្ថកិច្ចបានលើកហេតុផលថា ការជួបជុំនោះនាំឲ្យប៉ះពាល់ដល់អធិបតេយ្យភាពឯករាជ្យភាពរបស់ស្ថានទូតវៀតណាម និងប៉ះពាល់សណ្តាប់ធ្នាប់សាធារណៈ កកស្ទះចរាចរណ៍ និងអាចប៉ះពាល់ដល់ទំនាក់ទំនងការទូតរវាងកម្ពុជានិងវៀតណាម។
ប៉ុន្តែក្រុមបាតុករនៅតែបន្តប្រមូលផ្តុំនៅក្បែរស្ថានទូតវៀតណាម។ ក្រុមបាតុករដែលជា
យុវជនព្រះសង្ឃពលរដ្ឋខ្មែរកម្ពុជាក្រោម សកម្មជនគណបក្សសង្គ្រោះជាតិ និងមានទាំងលោកម៉មសូណង់ដូផង បានស្រែកទាមទារឲ្យអ្នកនាំពាក្យស្ថានទូតវៀតណាមសូមទោសចំពោះការលើកឡើងរបស់ខ្លួនដែលថា ទឹកដីកម្ពុជាក្រោមជារបស់វៀតណាមយូរមកហើយមិនមែនទើបតែបារាំងកាត់ចេញពីកម្ពុជា ប្រគល់ឲ្យវៀតណាមគ្រប់គ្រងនៅថ្ងៃទី៤មិថុនាឆ្នាំ១៩៤៩នោះទេ។
ប៉ុន្តែ ប្រវត្តិសាស្ត្របានកត់ត្រាហើយត្រូវបានគេផ្សព្វផ្សាយយូរឆ្នាំមកហើយថា ទឹកដីខ្មែរកម្ពុជាក្រោមត្រូវបានអាណានិគមបារាំងកាត់ចេញពីកម្ពុជា ប្រគល់ឲ្យវៀតណាមគ្រប់គ្រងនៅថ្ងៃទី៤ខែមិថុនាឆ្នាំ១៩៤៩។
យ៉ាងណាក៏ដោយ ការប្រមូលផ្តុំតវ៉ានៅព្រឹកថ្ងៃទី៨កក្កដានេះ ត្រូវបានបង្ក្រាបដោយហិង្សា។ តែមិនមានអ្នករបួសធ្ងន់ធ្ងរ ឬក៏មានបាតុករត្រូវចាប់ខ្លួននោះទេ។ ប៉ុន្តែក្នុងពេលវាយបង្ក្រាបនោះ កងកម្លាំងសន្តិសុខបានឆក់យកអាយភេត ម៉ាស៊ីនថត និងទូរស័ព្ទរបស់បាតុករ និងរបស់អ្នកកាសែតមួយចំនួន។
រហូតដល់ម៉ោងជិត១២ថ្ងៃត្រង់ បាតុករបានរំសាយ។ លោកម៉ៅ ពិសេស ប្រធានសហព័ន្ធនិស្សិតបញ្ញាវ័ន្តកម្ពុជា ដែលបានដឹកនាំការជួបជុំតវ៉ានៅមុខស្ថានទូតវៀតណាម បញ្ជាក់ថាបាតុករទុកពេលឲ្យអ្នកនាំពាក្យស្ថានទូតវៀតណាម លោកត្រឹង វ៉ាន់ថុង ៣ខែ ដើម្បីឲ្យគាត់ឆ្លើយតប ទទួលស្គាល់ប្រវត្តិសាស្ត្រពិតនៃទឹកខ្មែរកម្ពុជាក្រោម។ បើនៅតែមិនឆ្លើយតបទេ នោះបាតុករនឹងដាក់ញត្តិហើយកៀងគរធ្វើបាតុកម្មម្តងទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ