បេសកកម្មគណៈប្រតិភូពាណិជ្ជកម្មជោគជ័យ ក្រុមហ៊ុនអាមេរិកចំនួន៣ នឹងមកសិក្សាពីលទ្ធភាពនៃការធ្វើពាណិជ្ជកម្មនៅកម្ពុជា
ក្រោយបេសកកម្មគណៈប្រតិភូពាណិជ្ជកម្មទៅកាន់សហរដ្ឋអាមេរិក កាលពីខែមិថុនាកន្លងទៅ ក្រុមហ៊ុនអាមេរិកចំនួន៣ នឹងមកសិក្សាពីលទ្ធភាពនៃការធ្វើពាណិជ្ជកម្មនៅកម្ពុជា។ នេះបើតាមលោកស៊ុន ចាន់ថុល រដ្ឋមន្ដ្រីក្រសួងពាណិជ្ជកម្ម ដែលបានថ្លែងនៅក្នុងសន្និសីទកាសែត នៅស្ថានទូតអាមេរិកប្រចាំទីក្រុងភ្នំពេញ នាព្រឹកថ្ងៃចន្ទ ទី៧កក្កដានេះ។
ចុះផ្សាយនៅថ្ងៃ៖
ស្តាប់ - ០២:១៩
ក្រុមហ៊ុនអាមេរិកចំនួន៣ នឹងមកសិក្សាពីលទ្ធភាពនៃការធ្វើពាណិជ្ជកម្មនៅកម្ពុជា។ ក្រុមហ៊ុនទាំង៣នោះ គ្រោងវិនិយោគលើវិស័យផ្សេងៗគ្នា គឺវិស័យកាត់ដេរ វិស័យថាមពល និងវិស័យបច្ចេកវិទ្យា។ ក្នុងនោះ ក្រុមហ៊ុន១ នឹងមកធ្វើទស្សនកិច្ចនៅកម្ពុជានៅសប្ដាហ៍ក្រោយ និងក្រុមហ៊ុន២ទៀត នឹងមកធ្វើទស្សនកិច្ចនៅកម្ពុជានៅខែសីហាខាងមុខនេះ។ រដ្ឋមន្ដ្រីក្រសួងពាណិជ្ជកម្ម លោកស៊ុន ចាន់ថុល បានថ្លែងយ៉ាងដូច្នេះ នៅក្នុងសន្និសីទកាសែត នៅស្ថានទូតអាមេរិកប្រចាំក្រុងភ្នំពេញ នាព្រឹកថ្ងៃចន្ទទី៧កក្កដានេះ។
ចំណាប់អារម្មណ៍ និងការមកដល់នៃក្រុមហ៊ុនអាមេរិកទាំង៣នេះ ធ្វើឡើងបន្ទាប់ពីគណៈប្រតិភូពាណិជ្ជកម្ម បានជួបជាមួយពាណិជ្ជករជាច្រើន នៅសហរដ្ឋអាមេរិក កាលពីពាក់កណ្ដាលខែមិថុនាកន្លងទៅ។ បេសកកម្មគណៈប្រតិភូពាណិជ្ជកម្ម ៥ថ្ងៃនៅអាមេរិក កាលពីខែមិថុនានោះ ដឹកនាំដោយរដ្ឋមន្ដ្រីក្រសួងពាណិជ្ជកម្ម លោកស៊ុន ចាន់ថុល និងលោក William Todd ឯកអគ្គរដ្ឋទូតអាមេរិកប្រចាំទីក្រុងភ្នំពេញ។
ថ្លែងនៅក្នុងសន្និសីទកាសែតនៅព្រឹកថ្ងៃចន្ទនេះដែរ លោក William Todd ឯកអគ្គរដ្ឋទូតអាមេរិកប្រចាំកម្ពុជា បានលើកឡើងថា ការធ្វើពាណិជ្ជកម្មនៅកម្ពុជា នៅតែមានបញ្ហាប្រឈម ទាំងបញ្ហាហេដ្ឋារចនាសម្ព័ន្ធ ទាំងបញ្ហាថាមពល និងពិសេសនោះ គឺបញ្ហាអំពើពុករលួយ។
ទាក់ទងនឹងបញ្ហាប្រឈមដែលបានលើកឡើងនោះ លោកស៊ុន ចាន់ថុល បានឆ្លើយតបថា កម្ពុជាបានទទួលស្គាល់នូវបញ្ហាទាំងនោះ និងកំពុងតែខិតខំដោះស្រាយ។ បើតាមលោករដ្ឋមន្ដ្រី ក្រសួងពាណិជ្ជកម្មបានធ្វើកំណែទម្រង់ប្រព័ន្ធធ្វើការ កាត់បន្ថយការជួបមុខគ្នារវាងមន្ដ្រីក្រសួង និងពាណិជ្ជករ ដោយងាកមកទាក់ទងគ្នាតាមសារអេឡិចត្រូនិក ឬអ៊ីមែលវិញ។ ការណ៍នេះ ត្រូវបានលោកស៊ុន ចាន់ថុល អះអាងថា អាចកាត់បន្ថយអំពើពុករលួយ ដែលជាបញ្ហាប្រឈមនោះបាន។ ចំពោះហេដ្ឋារចនាសម្ព័ន្ធ លោករដ្ឋមន្ដ្រីក៏បានលើកឡើងពីគម្រោងពង្រីកកំពង់ផែស្វយ័តក្រុងភ្នំពេញផងដែរ។ ប៉ុន្តែការងារនេះត្រូវប្រើពេលបន្តិច។
សូមជម្រាបថា ទំហំពាណិជ្ជកម្មទ្វេភាគីរវាងកម្ពុជា និងអាមេរិក នៅឆ្នាំ២០១៣ មានចំនួនជាង៣ពាន់លានដុល្លារអាមេរិក និងត្រូវគេរំពឹងថា នឹងកើនឡើងថែមទៀត នៅឆ្នាំ២០១៤នេះ។ ៣៣ភាគរយ នៃផលិតផលនាំចេញសរុបរបស់កម្ពុជា គឺទៅកាន់សហរដ្ឋអាមេរិក ដែលធ្វើឲ្យអាមេរិក ក្លាយជាទីផ្សារធំបំផុតតែមួយគត់ សម្រាប់កម្ពុជា នាពេលសព្វថ្ងៃនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ