អ្នកភូមិឡពាងតវ៉ាជាថ្មីរឿងដីធ្លី ចំពេលវត្តមានតំណាងអង្គការសហប្រជាជាតិនៅកម្ពុជា
ប្រជាពលរដ្ឋមកពីស្រុកកំពង់ត្រឡាច ខេត្តកំពង់ឆ្នាំងប្រមាណជា៧០នាក់ បានឡើងមកទីក្រុងភ្នំពេញជាថ្មីម្តងទៀត ដើម្បីដាក់ញត្តិទៅកាន់ខុទ្ទកាល័យលោកនាយករដ្ឋមន្ត្រី ហ៊ុន សែន និងក្រសួងយុត្តិធម៌ ដើម្បីស្នើសុំឲ្យស្ថាប័នទាំងពីនេះអន្តរាគមន៍ដល់ពួកគាត់នៅក្នុងជម្លោះដីធ្លីដ៏រាំរៃជាមួយក្រុមហ៊ុន KBC ដែលពួកគាត់ចោទប្រកាន់ថាបានរំលោភយកដីប្រជាជនជាង១៤០ហិចតា។បន្ទាប់ពីនេះពួកអ្នកភូមិក៏បានត្រៀមដាក់ញត្តិទៅកាន់លោក សូរិយា ប្រាសាទ ស៊ូប៊ែឌី ផងដែរនៅរសៀលនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
ជាថ្មីម្តងទៀតប្រជាពលរដ្ឋរស់នៅក្នុងភូមិឡពាង ស្រុកកំពង់ត្រឡាច ខេត្តកំពង់ឆ្នាំងចំនួន៧៨គ្រួសារដែលមានទំនាស់រឿងដីធ្លីជាមួយក្រុមហ៊ុនKBC បាននាំគ្នាដាក់ញត្តិតវ៉ាកាលពីព្រឹកមិញទៅកាន់ខុទ្ទកាល័យលោកនាយករដ្ឋមន្ត្រី ហ៊ុន សែន និង ក្រសួងយុត្តិធម៌។
ការដាក់ញត្តិនេះ បានធ្វើឡើងដំណាលគ្នាទៅនឹងការគ្រោងដាក់ញត្តិផងដែរទៅកាន់អ្នករាយការណ៍ពិសេសរបស់អង្គការសហប្រជាជាតិលោក សូរិយា ប្រសាទ ស៊ូប៊ែឌី នៅរសៀលនេះ ខណៈលោកកំពុងមានវត្តមាននៅក្នុងប្រទេសកម្ពុជានៅឡើយ។
លោក រាជ សីមា តំណាងប្រជាពលរដ្ឋមួយរូប បានថ្លែងថាពួកគាត់បានស្នើសុំអន្តរាគមន៍ជាថ្មីពីប្រមុខរដ្ឋាភិបាលខ្មែរ បន្ទាប់ពីបណ្តឹងជាច្រើនជាង១០០បណ្តឹងកន្លងមក ស្តីពីការរំលោកយកដីពីក្រុមហ៊ុន KBC មិនត្រូវបានគេដោះស្រាយ។
អ្នកភូមិឡពាងលោក រាជ សីមា អះអាងថា ដីរបស់ពួកគេត្រូវអាជ្ញាធរឃុបឃិតលួចធ្វើប្លង់លក់ចាប់តាំងពីឆ្នាំ ២០០៣មក ដោយបច្ចុប្បន្ននេះប៉ះពាល់ដល់ប្រជាពលរដ្ឋចំនួន៨៩គ្រួសារ ហើយសម្រាប់លើកនេះ គឺជាឱកាសល្អមួយ ដែលពួកគាត់បានសុំអន្តរាគមន៍ជាថ្មីពីប្រមុខរដ្ឋាភិបាលខ្មែរ ស្របគ្នានិងវត្តមានរបស់លោក ស៊ូប៊ែឌីនៅក្នុងប្រទេសកម្ពុជា។
តំណាងអ្នកភូមិម្នាក់ទៀតគឺ អ្នកស្រី អ៊ំ សុភី ដែលបានយកញ្ញតិទៅដាក់នៅខុទ្ទការល័យ លោក ហ៊ុន សែន ដោយផ្ទាល់ថ្លែងថា តំណាងខុទ្ទកាល័យ និងតំណាងក្រសួងយុត្តិធម៌ បានទទួលរួចហើយ។ មិនមានការឆ្លើយតបភ្លាមៗពីខុទ្ទកាល័យលោកនាយករដ្ឋមន្ត្រីនៅឡើយ ក៏ប៉ុន្តែលោក សម ប្រជាមានិត្យ អ្នកនាំពាក្យក្រសួងយុត្តិធម៌បានប្រាប់វិទ្យុបារាំងអន្តរជាតិ RFI នៅថ្ងៃនេះថា រដ្ឋមន្ត្រីក្រសួងយុត្តិធម៌បានពិនិត្យរឿងនេះជាបន្ទាន់ហើយបញ្ជូនទៅកាន់នាយកដ្ឋានរដ្ឋប្បវេណីដើម្បីដោះស្រាយបន្ត។
ទោះយ៉ាងនេះក្តីក្រុមអ្នកតវ៉ានៅមិនទាន់មានការជឿជាក់មាំទាំនៅឡើយថាដំណោះស្រាយនឹងអាចកើតមានឡើងប្រសិនបើរដ្ឋាភិបាលមិនមានការតាំងចិត្តស្របទៅនឹងកំណែទម្រង់ដីធី្លរបស់ខ្លួនដែលបានប្រកាសនៅក្នុងអាណត្តិទៅ៥នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ