ទូតកម្ពុជាជួបអគ្គលេខាធិការក្រសួងការបរទេសថៃ រឿងបញ្ជូនពលករ
អ្នកនាំពាក្យក្រសួងការបរទេសកម្ពុជា បញ្ជាក់ថា ឯកអគ្គរាជទូតកម្ពុជាប្រចាំទីក្រុងបាងកក បានជួបពិភាក្សាការងារចាំបាច់មួយចំនួន ដែលទាក់ទងទៅនឹងបច្ចុប្បន្នភាពនៃការបញ្ជូនពលករខ្មែរខុសច្បាប់ មកប្រទេសវិញ។ ក៏ប៉ុន្តែកម្ពុជាមិនបានកោះហៅតំណាងរាជទូតថៃនៅភ្នំពេញជួបជជែកគ្នាម្តងទៀតឡើយ បន្ទាប់ពីជំនួបកាលពីសប្តាហ៍មុន។ ជាមួយគ្នានេះ នាយករដ្ឋមន្ត្រីស្តីទីកម្ពុជា លោក ស ខេង បានហៅការបញ្ជូនពលករខ្មែរមកប្រទេសវិញនាពេលនេះថា ធ្វើឡើងដោយតក់ក្រហល់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
តាមគម្រោង ឯកអគ្គរាជរដ្ឋទូតកម្ពុជាប្រចាំនៅប្រទេសថៃ ត្រូវមានជំនួបសំខាន់មួយជាមួយតំណាងក្រសួងការបរទេសថៃនៅរសៀលថ្ងៃអង្គារ។ លោក កុយ គួង អ្នកនាំពាក្យក្រសួងការបរទេសកម្ពុជា បានបញ្ជាក់ប្រាប់វិទ្យុបារាំងអន្តរជាតិ RFI ថាពិតជាមានជំនួបនោះមែនរវាងឯកអគ្គរាជទូតកម្ពុជាប្រចាំក្រុងបាងកក ជាមួយនឹងអគ្គលេខាធិការក្រសួងការបរទេសថៃនៅវេលាម៉ោង២រសៀល។
ដោយឡែកចំពោះប្រធានបទនៃជំនួបនោះ មិនត្រូវបានបង្ហើបឲ្យដឹងឡើយ ក៏ប៉ុន្តែលោក កុយ គួង ថ្លែងថាអាចជជែកគ្នាជុំវិញបញ្ហាពលករខ្មែរ ដែលថៃបញ្ជូនមកប្រទេសវិញនៅពេលនេះ។
ជាការកត់សម្គាល់ជំនួបបែបការទូតនៃតំណាងប្រទេសទាំងពីរបានធ្វើឡើងបន្ទាប់ពីការបញ្ជូនពលករខ្មែរមកប្រទេសវិញពីភាគីថៃ បានកើនឡើងជិត ២សែននាក់ គ្រាន់តែរយៈពេលកន្លះខែកន្លងទៅនេះ។
ជាមួយគ្នានេះ អ្នកនាំពាក្យក្រសួងការបរទេសកម្ពុជា លោក កុយ គួង បន្តថារដ្ឋាភិបាលកម្ពុជាមិនមានគម្រោងថ្មីណាមួយផ្សេងទៀតកោះហៅឯកអគ្គរាជទូតថៃប្រចាំនៅភ្នំពេញដើម្បីសាកសួរឡើយ។ កាលពីសប្តាហ៍មុន ក្រសួងការបរទេសកម្ពុជាតាមរយៈអ្នកនាំពាក្យបានចេញលិខិតបំភ្លឺចំនួនពីរ បន្ទាប់ពីជំនួបបន្ទាន់មួយជាមួយតំណាងទូតថៃនៅកម្ពុជា ស្តីពីការចាប់បញ្ជូនពលករខ្មែរមកស្រុកវិញ។ នៅក្នុងជំនួបនោះ ភាគីកម្ពុជាបានស្នើឲ្យភាគីថៃគោរពគោលការណ៍មនុស្សធម៌ ក្នុងការចាប់បញ្ជូនពលករខុសច្បាប់កម្ពុជា។
នៅថ្ងៃនេះដែរ លោក ស ខេង នាយករដ្ឋមន្ត្រីស្តីទីក៏បានសម្តែងនូវការមិនពេញចិត្តចំពោះភាគីថៃដែលបានបញ្ជូនពលករខ្មែរមកប្រទេសវិញដោយមិនផ្តល់ដំណឹងមុន។ ពីខេត្តតាកែវនៅក្នុងឱកាសចែកសញ្ញាប័ត្រដល់និស្សិតនៅសាលាឯកជនមួយ លោក ស ខេង ថ្លែងថា អ្នកដឹកនាំយោធាថៃបានចាប់បញ្ជូនពលករមិនស្របច្បាប់យ៉ាងតក់ក្រហល់ ដោយគ្មានការជូនដំណឹងនិងពិភាក្សាជាមួយកម្ពុជា ឬយ៉ាងហោចណាស់ ជាមួយបណ្តារខេត្តជាប់ព្រំដែនក៏ទេដែរ។
នាយករដ្ឋមន្ត្រីស្តីទី ក៏បានសម្តែងការសោកស្តាយពីការបាត់បង់ជីវិតរបស់ពលករខ្មែរ ដែលជួបគ្រោះថ្នាក់ចរាចរតាមផ្លូវ ដែលជាបច្ច័យនៃការចាប់បញ្ជូនមកកាន់ប្រទេសពួកគេផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ