រដ្ឋាភិបាលគ្រោងដំឡើងពន្ធផលិតផលថ្នាំជក់ ចាប់ពីខែកក្កដាតទៅ
ចាប់ពីថ្ងៃទី១ ខែកក្កដាតទៅ រដ្ឋាភិបាលកម្ពុជានឹងដំឡើងពន្ធផលិតផលថ្នាំជក់ពី១០ ទៅ១៥ភាគរយ បន្ថែមពីលើពន្ធពី២០ទៅ២៥ភាគរយ ដែលមានស្រាប់។ នេះជាការប្រកាសឲ្យដឹង របស់មន្ត្រីក្រសួងសេដ្ឋកិច្ច និងហិរញ្ញវត្ថុនៅថ្ងៃពុធទី ៤មិថុនានេះ នៅក្នុងសិក្ខាសាលាស្តីពីការអនុវត្តន៍អនុសញ្ញា ការត្រួតពិនិត្យថ្នាំជក់ ដែលបានធ្វើឡើង នៅសណ្ឋាគារសាន់វ៉េ ក្នុងទីក្រុងភ្នំពេញ។ ការដំឡើងពន្ធលើផលិតផលថ្នាំជក់ ត្រូវគេរំពឹងថានឹងជួយកាត់បន្ថយអត្រាស្លាប់ដោយសារផ្សែងបារី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៥
ចាប់ពីខែកក្កដាខាងមុខនេះតទៅ តម្លៃបារីដែលដាក់លក់ម៉ៅលើទីផ្សារ នឹងឡើងខ្ពស់ជាងមុន ពី១០ទៅ១៥ភាគរយបន្ថែមទៀត ពីព្រោះតែរដ្ឋាភិបាល ចាប់ផ្តើមដំឡើងពន្ធខ្ពស់ជាងមុន។ លោកស្រី ងួន សុខា រដ្ឋលេខាធិការក្រសួងសេដ្ឋកិច្ច និងហិរញ្ញាវត្ថុ បានឲ្យដឹងថា ការដំឡើងពន្ធផលិតផលថ្នាំជក់ នឹងធ្វើឡើងចាប់ពីថ្ងៃទី ០១ ខែកក្កដា ឆ្នាំ២០១៤ខាងមុខនេះ។ តំណាងក្រសួងសេដ្ឋកិច្ច និងហិរញ្ញវត្ថុដដែល បានបន្ថែមថា ការដំឡើងពន្ធថ្នាំជក់ គឺជាយុទ្ធសាស្ត្រឈ្នះៗ ដល់រដ្ឋាភិបាលកម្ពុជា។ ឈ្នះៗ ព្រោះថាចំណូលពន្ធរដ្ឋ នឹងកើនឡើង ហើយជំងឺ និងការស្លាប់ នឹងថយចុះ។
ដំណឹងស្តីពីការដំឡើងពន្ធថ្នាំជក់ ត្រូវបានប្រកាសឲ្យដឹង នៅក្នុងសិក្ខាសាលាស្តីពីការអនុវត្តន៍អនុសញ្ញា ការត្រួតពិនិត្យថ្នាំជក់ ដែលបានធ្វើឡើងនៅសណ្ឋាគារសាន់វ៉េក្នុងទីក្រុងភ្នំពេញ នៅថ្ងៃទី៤មិថុនានេះ។ លោកស្រី ងួន សុខា បញ្ជាក់ថា ការដំឡើងពន្ធលើផលិតផលថ្នាំជក់ គឺដើម្បីទប់ស្កាត់តម្រូវការនៃការជក់បារី ព្រោះថាបើថ្នាំជក់ មានតំលៃថ្លៃ នោះប្រជាជនក្រីក្រ ឬ យុវជន ដែលពុំមានលទ្ធភាពធូរធារ នឹងមិនអាចទិញផលិតផលទាំងនោះ មកទទួលទានបាននោះទេ។
ចំណែកលោក Dong H Anh ប្រធានអង្គការសុខភាពពិភពលោក WHO ប្រចាំកម្ពុជា ក៏បានមានប្រសាសន៍ នៅក្នុងអង្គសិក្ខាសាលានោះថា ការដំឡើងពន្ធថ្នាំជក់ គឺជាវិធានការដ៏មានប្រសិទ្ធភាពបំផុត។ លោក Dong H Anh ក៏បានសំណូមពរឲ្យរដ្ឋាភិបាលបន្តដំឡើងពន្ធថ្នាំជក់ ប្រសិនបើការដំឡើងលើកដំបូង មិនទទួលបានជោគជ័យ។
លោកវេជ្ជបណ្ឌិត មុំ គង់ នាយកប្រតិបត្តិអង្គការចលនាដើម្បីសុខភាពកម្ពុជា បានធ្វើបទបង្ហាញ ដោយអះអាងថា កម្ពុជា ជាប្រទេសមួយ ដែលយកពន្ធថ្នាំជក់ទាបជាងគេបំផុត បើធៀប ទៅនឹងប្រទេសក្នុងតំបន់អាស៊ានដូចគ្នា។ តាមការស្រាវជ្រាវ លោកវេជ្ជបណ្ឌិត មុំ គង់ បានបង្ហាញថា ប្រជាពលរដ្ឋកម្ពុជា ៨១ភាគរយ ចង់ឲ្យរដ្ឋាភិបាលដំឡើងពន្ធថ្នាំជក់ ដើម្បីបានថវិកាបន្ថែម សម្រាប់អភិវឌ្ឍជាតិ។
តាមអនុសាសន៍របស់ធនាគារពិភពលោក អត្រាពន្ធថ្នាំជក់ធៀបនឹងតំលៃលក់រាយ គួរតែពី ៦៦ភាគរយ ទៅ ៨០ភាគរយ។ ហើយតាមគោលការណ៍ណែនាំ សម្រាប់អនុវត្តមាត្រា៦ នៃអនុសញ្ញា ស្តីពីការត្រួតពិនិត្យថ្នាំជក់ អត្រាពន្ធថ្នាំជក់ គួរតែ ៧០ភាគរយ។ កម្ពុជា បានយកពន្ធ ត្រឹមតែពី ២០ ទៅ២៥ភាគរយប៉ុណ្ណោះពីផលិតផលថ្នាំជក់។ ហើយប្រទេសថៃក្បែរខាង បានយកពន្ធថ្នាំជក់ រហូតដល់ ៧០ភាគរយ។
សូមបញ្ជាក់ថា ប្រជាជនកម្ពុជាជិត ១ម៉ឺននាក់ ក្នុងចំណោមប្រជាជន ៦លាននាក់ នៅលើពិភពលោក បានស្លាប់ជារៀងរាល់ឆ្នាំ ដោយសារការប្រើប្រាស់ថ្នាំជក់។ ក្នុងនោះ ក៏មានអ្នកស្លាប់ដោយសារការស្រូបផ្សែងបារី ៦សែននាក់ផងដែរ។ ទឹកប្រាក់ ១០០លានដុល្លា ក៏ត្រូវបានចំណាយសំរាប់ទិញបារី នៅកម្ពុជា ហើយការចំណាយសម្រាប់ព្យាបាល និងថែទាំជំងឺ ដែលបណ្តាលមកពីថ្នាំជក់ គឺមានទំហំធំជាងការចំណាយលើការទិញបារី។ ដូច្នេះ ការដំឡើងពន្ធថ្នាំជក់ត្រូវគេរំពឹងថា អាចជួយកាត់បន្ថយបញ្ហាទាំងនេះបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ