សហជីពទទូចឲ្យអ្នកបញ្ជាទិញបង្កើនអន្តរាគមន៍បន្ថែមទៀតដើម្បីដោះលែងអ្នកជាប់ឃុំ
សហជីពចង់ឲ្យអ្នកបញ្ជាទិញផលិតផលសម្លៀកបំពាក់ពីប្រទេសកម្ពុជាចូលឲ្យជ្រៅទៅក្នុងការទាមទារឲ្យរដ្ឋាភិបាលដោះស្រាយឲ្យបានឆាប់និងមានប្រសិទ្ធិភាពនូវការទាមទាររបស់កម្មករសហជីព ដោយផ្តោតសំខាន់ទៅលើការដោះលែងអ្នកជាប់ឃុំ២៣នាក់។នៅក្នុង ជំនួបជាមួយតំណាងរដ្ឋាភិបាលកម្ពុជាកាលពីម្សិលមិញក្រុមអ្នកបញ្ជា ទិញបានបង្ហាញពីកង្វល់យឺតយ៉ាវក្នុងការទទួលទំនិញពីកម្ពុជានិង គំរាមកាត់បន្ថយការទិញ។
ចុះផ្សាយនៅថ្ងៃ៖
ស្តាប់ - ០២:២៤
មេដឹកនាំសហជីពមួយចំនួនបានបង្ហាញនូវការរារែកក្នុងការទទួលយកនូវលទ្ធផលនៃជំនួបរវាងក្រុមអ្នកបញ្ជាទិញផលិតផលសម្លៀកបំពាក់ពីប្រទេសកម្ពុជាដែលបានជជែកគ្នាជាមួយនឹងតំណាងរដ្ឋាភិបាលកាលពីម្សិលមិញ។ លោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា ស៊ីខៅឌូ ដែលសមាជិករបស់លោក និងលោករងបណ្តឹងនិងជាប់ឃុំឃាំងច្រើនជាងគេនោះថ្លែងថា អ្នកបញ្ជាទិញគួរតែអនុវត្តភ្លាមៗនូវលក្ខខណ្ឌរបស់ពួកគេដែលបានស្នើទៅរដ្ឋាភិបាលកន្លងមក ក្នុងករណីដែលមិនមានភាពជឿនលឿនណាមួយ ក្នុងការដោះស្រាយបញ្ហាចំបងៗ។លោកពិព័ណ៌នាថា ទីផ្សារហាក់ដូចជានៅមានឥរិយាបទពិធីការនៅឡើយ។
កាលពីរសៀលម្សិលមិញ ក្រុមអ្នកបញ្ជាទិញសម្លៀកបំពាក់រួមមានតំណាងក្រុមហ៊ុន Puma, Levi, H&M និង Gape បានព្រមានថានឹងអាចកាត់បន្ថយការបញ្ជាទិញទំនិញវាយនភ័ណ្ឌពីប្រទេសកម្ពុជា ប្រសិនបើមិនមានយន្តការដោះស្រាយធ្វើឲ្យប្រសើរឡើងនៅក្នុងទំនាក់ទំនងវិជ្ជាជីវៈ។ ការថ្លែងដូច្នេះគឺបានធ្វើឡើងបន្ទាប់ពីគណៈប្រតិភូអ្នកបញ្ជាទិញមួយក្រុម បានជួបពិភាក្សាជាមួយលោកឧបនាយករដ្ឋមន្ត្រី គាត ឈន់ និងជាប្រធានគណៈកម្មការស្រាវជ្រាវប្រាក់ឈ្នួល ដែលមានការចូលរួមពីតំណាងក្រសួងពាក់ព័ន្ធនានា។
ចំណុចសំខាន់ៗចំនួនបីត្រូវបានក្រុមអ្នកបញ្ជាទិញលើកឡើងនៅចំពោះមុខតំណាងរដ្ឋាភិបាលរួមមាន ការចរចាប្រាក់ឈ្នួលអប្បបរមា ការបង្កើតច្បាប់ស្តីពីសហជីព និងការផ្តល់សេវាកម្មយុត្តិធម៌ទៅដល់កម្មករ២៣នាក់ដែលបានចាប់ខ្លួន។
លោក ហេង សួ អ្នកនាំពាក្យក្រសួងការងារ ដែលបានថ្លែងប្រាប់អ្នកយកព័ត៌មានបន្ទាប់ពីជំនួបរយៈពេលជាងពីរម៉ោងថា អ្នកបញ្ជាទិញមានការត្អូញត្អែរពីការយឺតយ៉ាវក្នុងការទទួលបានការផ្គត់ផ្គង់ទំនិញពីប្រទេសកម្ពុជា។ប្រការនេះត្រូវគេគិតទៅដល់ការកើតឡើងចលនាកូដកម្ម បាតុកម្មរបស់កម្មករកន្លងមក ដែលរដ្ឋាភិបាលចោទប្រកាន់ថាខុសច្បាប់ហើយមានបង្រ្កាបនិងចាប់ខ្លួន រួមទាំងជម្រុញឲ្យមេសហជីពនានាប្រឈមនឹងពាក្យបណ្តឹង និងត្រូវចងដោយបំរាមតុលាការ។
សូមបញ្ជាក់ថាអ្នកសហជីពបានស្នើសុំអន្តរាគមន៍ពីអ្នកបញ្ជាទិញ និងសហជីពអន្តរជាតិ
Industri All ឲ្យដាក់គំនាបទៅលើរដ្ឋាភិបាលកម្ពុជាបន្ទាប់ពី ពូកគេរងការចាប់ខ្លួន និងមានបណ្តឹងតុលាការ បន្ទាប់ពីមានព្រឹត្តិការទាមទារប្រាក់ឈ្នួលអប្បបរមា១៦០ដុល្លារ ដែលនាំឲ្យមានមនុស្សស្លាប់និងរបួសកាលពីដើមខែមករាមកនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ