សមាគមខ្មែរកម្ពុជាក្រោម នឹងប្រារព្ធខួប៦៥នៃការបាត់បង់ទឹកដី នៅថ្ងៃ៤មិថុនា
អង្គការ-សមាគមខ្មែរកម្ពុជាក្រោមចំនួន១២ បានជួបប្រជុំគ្នានៅថ្ងៃសៅរិ៍នេះ ដើម្បីត្រៀមរៀបចំប្រារព្ធខួបលើកទី៦៥នៃការបាត់បង់ទឹកដីកម្ពុជាក្រោម ថ្ងៃទី៤មិថុនាឆ្នាំ១៩៤៩-៤មិថុនាឆ្នាំ២០១។ ការប្រារព្ធខួបនៃការបាត់បង់ទឹកដីខ្មែរកម្ពុជាក្រោមនឹងធ្វើឡើង ខណៈដែលសមាគមខ្មែរកម្ពុជាក្រោមមួយ ដែលដឹកនាំដោយលោក គឹម វណ្ណឆេង នឹងមិនបានចូលរួម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២២
តាមគំរោង ការប្រារព្ធខួបនេះ នឹងរៀបចំធ្វើឡើងនៅលើសួនច្បារមុខវត្តបុទុមវត្តី ក្នុងក្រុងភ្នំពេញ ដោយមានការរាប់បាត្រព្រះសង្ឃចំនួន១៩៤៩អង្គ តំណាងអោយឆ្នាំដែលប្រទេសបារាំងបានកាត់ទឹកដីកម្ពុជាក្រោមចំនួន២១ខេត្ត ទៅអោយប្រទេសវៀតណាមគ្រប់គ្រង នៅថ្ងៃទី៤មិថុនាឆ្នាំ១៩៤៩។ នេះបើតាមការបញ្ជាក់ពីលោក ថាច់ សេដ្ឋា ប្រធានសមាគមខ្មែរកម្ពុជាក្រោម។
លោក ថាច់ សេដ្ឋា ដែលបានកោះប្រជុំជាមួយអង្គការ-សមាគមខ្មែរកម្ពុជាចំនួន១១ទៀតនៅថ្ងៃសៅរិ៍នេះ បានអោយដឹងថា ក្រៅពីការរាប់បាត្រព្រះសង្ឃចំនួន១៩៤៩អង្គហើយ ការប្រារព្ធខួបនៃការបាត់ បង់ទឹកដីកម្ពុជាឆ្នាំនេះ ក៍មានការរៀបចំវេទិកាសាធារណៈសំដែងមតិផងដែរ។
ការប្រារព្ធខួបនៃការបាត់បង់ទឹកដីកម្ពុជាក្រោមថ្ងៃទី៤មិថុនាឆ្នាំ១៩៤៩ តែងតែប្រារព្ធធ្វើឡើងជារៀងរាល់ឆ្នាំ សំរាប់ប្រជាពលរដ្ឋខ្មែរកម្ពុជាក្រោមដែលកំពុងរស់នៅក្នុងប្រទេសកម្ពុជា ក្នុងបំណងដើម្បីសំដែងការដឹងគុណចំពោះបុព្វបុរសខ្មែរ ដែលបានបូជាជីវិតដើម្បីទឹកដីកម្ពុជាក្រោម និងដើម្បីរំលឹកដល់ប្រជាពលរដ្ឋខ្មែរអោយចងចាំពីប្រវត្តិនៃការបាត់បង់ទឹកដីកម្ពុជាក្រោមទៅអោយប្រទេសវៀតណាមគ្រប់គ្រងកាលពី៦៥ឆ្នាំមុន។
ប៉ុន្តែយ៉ាងណាក៍ដោយ ការប្រារព្ធខួបនៃការបាត់បង់ទឹកដីកម្ពុជាក្រោមរយៈពេលប៉ុន្មានឆ្នាំចុងក្រោយនេះ នៅតែមានរូបភាពពីរដដែល រូបភាពទីមួយ នោះគឺជាការប្រារព្ធខួបដែលដឹកនាំដោយអង្គការ-សមាគមខ្មែរកម្ពុជាទាំង១២ដែលមាននិន្នាការទៅរកបក្សប្រឆាំង និងរូបភាពទី២ ជាការប្រារព្ធខួប ដែលដឹកនាំដោយលោក គឹម វណ្ណឆេង ដែលមាននិន្នាការទៅរករដ្ឋាភិបាល។ ទឹកដីកម្ពុជាក្រោម ទំហំជិត៧ម៉ឺនម៉ែត្រការ៉េ (68,965) មាន 21ខេត្ត ត្រូវបានប្រទេសបារាំងកាត់ទៅអោយប្រទេសវៀតណាមគ្រប់គ្រងនៅថ្ងៃទី៤ខែមិថុនាឆ្នាំ១៩៤។
ជុំវិញសំណើសុំទីតាំងនៃការប្រារព្ធខួប នៅថ្ងៃទី៤មិថុនាខាងមុខនេះ អាជ្ញាធរក្រុងភ្នំពេញនៅមិនទាន់ឆ្លើយតបទៅនឹងសំណើរបស់អង្គការ-សមាគមទាំង១២ ដែលបានដាក់តាំងពីដើមខែឧសភានៅឡើយទេ។ ប៉ុន្តែយ៉ាងណាក៍ដោយ បើតាមការបញ្ជាក់ពីលោក ឡុង ឌីម៉ង់ អ្នកនាំពាក្យសាលាក្រុងភ្នំពេញ អាជ្ញាធរនឹងកោះអញ្ជើញតំណាងអង្គការ-សមាគមខ្មែរកម្ពុជាក្រោមទាំង១២ជួបប្រជុំគ្នានៅថ្ងៃសុក្រសប្តាហ៍ក្រោយនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ