សវនាការលើសំណុំរឿងលោកវន់ ពៅ និងជនជាប់ចោទ២២នាក់ផ្សេងទៀតបានវិវត្តទៅមុខ ប៉ុន្តែរងការរិះគន់
សវនាការលើកទីបីលើករណីលោក វន់ ពៅ និងកម្មករ២២នាក់ផ្សេងទៀត បានដំណើរការប្រកបដោយភាពតានតឹង នៅព្រឹកថ្ងៃអង្គារនេះ។ សង្គមស៊ីវិលនិងមន្ត្រីនៃអង្គការការពារសិទ្ធិមនុស្សនានា មើលឃើញបន្ទាប់ពីសំរាកនៅថ្ងៃត្រង់នេះថា មិនមានអ្វីប្លែកពីសវនាការមុនៗនោះទេ គឺសវនាការនេះនៅតែមានលក្ខណៈលម្អៀង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
សាលាដំបូងរាជធានីភ្នំពេញបានបើកសវនាការជាបន្តទៀត នៅថ្ងៃអង្គារនេះលើសំណុំរឿងលោក វន់ ពៅ និងអ្នកជាប់សង្ស័យ ២២នាក់ផ្សេងទៀត ដែលសវនាការនាពេលនេះគឺជាលើក
ទីបីហើយបន្ទាប់ពីសវនាការលើកទី១កាលពីថ្ងៃទី ២៥មេសា និងលើកទី២នៅថ្ងៃទី៦ឧសភា។
ស្ថានភាពទូទៅនៅមុខសាលាដំបូងរាជធានីភ្នំពេញ មានសភាពដូចជាសវនាការពីរលើកកន្លងមកដែរ ដោយសមត្ថកិច្ចបានដាក់របាំងបិទផ្លូវចេញចូលទៅកាន់តុលាការដើម្បីទប់ស្កាត់មិនឲ្យមានការរំខានពីក្រុមអ្នកតវ៉ា។ បរិយាកាសនៅខាងមុខតុលាការមានសភាពស្ងប់ស្ងាត់ ក៏ប៉ុន្តែមានស្ថានភាពខុសពីលើកទី១និងលើកទី២បន្តិច ដោយសារ មានការប៉ះទង្គិចគ្នារវាងក្រុមអ្នកតវ៉ានិងក្រុមសន្តិសុខនៅខាងក្រៅរបាំងការពារ បណ្តាលឲ្យមនុស្សយ៉ាងហោច៤នាក់រងរបួសក្នុងនោះមានទាំងកងសន្តិសុខខណ្ឌ៧មករាផងដែរ។
នៅខាងក្នុងអគារតុលាការឯណោះវិញ សវនាការនៅថ្ងៃនេះត្រូវគេពិព៌ណនាថាមានសភាពតានតឹង ដោយសវនាការបានបើកធ្វើពីរបន្ទុក ទាក់ទងករណីនៅផ្លូវវ៉េងស្រេង និងករណីមុខរោងចក្រយ៉ាកជិញ។ សាក្សី និងជនជាប់ចោទត្រូវបានសាកសួរជាបន្តបន្ទាប់ដោយមានការបង្ហាញភស្តុតាងនានាផងដែរ។
បន្ទាប់ពីផ្អាកសវនាការនៅវេលាថ្ងៃត្រង់ លោក នី ចរិយា មន្ត្រីស៊ើបអង្កេតជាន់ខ្ពស់សមាគមការពារសិទ្ធិមនុស្សអាដហុក បានថ្លែងថា គេមិនទាន់មានភាពជឿនលឿនអ្វីជាដុំកំភួននោះទេ។ លោកធ្វើការសន្និដ្ឋានថា លទ្ធផលនៃសវនាការមួយព្រឹកនេះ គឺមិនខុសប្លែកអ្វីពីសវនាការមុនៗនោះទេ គឺតុលាការមានភាពលម្អៀង ដោយពឹងផ្អែកតែទៅលើភស្តុតាង ដែលជារូបថតមិនឆ្លុះបញ្ចាំងនូវរូបភាពជនជាប់ចោទនៅក្នុងនោះឡើយ។ មន្ត្រីតុលាការមិនមានការពន្យល់អ្វីទេទាក់ទងទៅនឹងការរិះគន់ទាំងនេះ។
សូមបញ្ជាក់ថាលោក វន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ
និងមនុស្ស៩នាក់ផ្សេងទៀត ត្រូវបានចោទប្រកាន់ពីបទប្រព្រឹត្តិអំពើហិង្សាដោយចេតនា និងបទបំផ្លិចបំផ្លាញទ្រព្យសម្បត្តិសាធារណៈនិងឯកជន នៅក្នុងការប៉ះទង្គិចគ្នាមួយនៅរោងចក្រ
យ៉ាកជិញ រវាងកម្មករកាត់ដេរនិងកងទាហានឆ័ត្រយោង។ លោក វន់ ពៅ និងអ្នកតវ៉ាចំនួនជាង២០នាក់ទៀត ត្រូវបានអាជ្ញាធរដឹកបញ្ជូនទៅឃុំខ្លួននៅពន្ធនាគារត្រពាំងផ្លុង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ