សហជីពបន្តយុទ្ធនាការផ្សព្វផ្សាយឱ្យកម្មករធ្វើពហិការក្រោយចូលឆ្នាំ
ស្របពេលដែលពិធីបុណ្យចូលឆ្នាំនឹងមកដល់ ក្នុងពេលប៉ុន្មានថ្ងៃខាងមុខទៀតនេះ សហជីពធំៗមួយចំនួនកំពុងបន្តយុទ្ធនាការផ្សព្វផ្សាយពីការធ្វើពហិការមិនចូលធ្វើការរបស់កម្មកររោងចក្រនៅទូទាំងប្រទេសកម្ពុជា ចាប់ពីក្រោយចូលឆ្នាំរហូតដល់ ថ្ងៃទី២២មេសា។ ជាពហិការដើម្បីទាមទារដំឡើងប្រាក់ឈ្នួលអប្បរមា១៦០ដុល្លារក្នុងមួយខែ។ ប្រធានសហជីព បានសម្តែងពីភាពវិជ្ជមាននៃយុទ្ធនាការពហិការនេះ។ ប៉ុន្តែ សមាគមកាត់ដេរបានបញ្ជាក់ថា នឹងមិនមានការពិភាក្សាពីការដំឡើងប្រាក់ខែឡើយនៅឆ្នាំ២០១៤។ ដោយឡែកក្រសួងការងារ និងអង្គការជំនាញអះអាងថា នឹងមានការពិភាក្សាពីប្រាក់ឈ្នួលនៅចុងខែមេសានេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣១
សហជីពកម្មករចំនួន១៨នៅកម្ពុជាដែលមិនសុខចិត្តនឹងកម្រិតប្រាក់ឈ្នួលនាពេលបច្ចុប្បន្ន បានបន្តយុទ្ធនាការចែកខិតបណ្ណឱ្យកម្មករបន្តឈប់រយៈពេល៦ថ្ងៃបន្ថែម ក្រោយពិធីបុណ្យចូលឆ្នាំខ្មែរ។ ជាការធ្វើពហិការដែលប្រើប្រាស់សិទ្ធិឈប់សម្រាកប្រចាំឆ្នាំ ពីថ្ងៃទី១៧ មេសា ដល់ថ្ងៃទី២២មេសាខាងមុខ ដើម្បីដាក់សម្ពាធដល់រដ្ឋាភិបាល។ នៅថ្ងៃពុធទី៩ មេសានេះ យុទ្ធនាការផ្សព្វផ្សាយនេះ បានឈានមកដល់ថ្ងៃទី៥ហើយ ចាប់តាំងពីថ្ងៃទី៥មេសាចុងសប្តាហ៍មុនមក។
សហជីពទាំងអស់ដែលរួមមានសហជីពរបស់ លោក អាត់ ធន់ សហជីពរបស់លោកស្រីម៉ម ញឹម និងលោកស្រីយ៉ាង សុភ័ណ្ឌជាដើម បានប្រមូលផ្តុំគ្នាចែកឱ្យកម្មករនៅតំបន់ឧស្សាហកម្មសួនកាណាឌីយ៉ា ផ្លូវវេងស្រេង។ តំបន់សួនកាណាឌីយ៉ា ផ្លូវវ៉េងស្រេង ដែលកាលពីខែមករាកន្លងទៅ គឺជាតំបន់បាតុកម្មបង្ហូរឈាមរវាងកងកម្លាំងរដ្ឋាភិបាល និងក្រុមបាតុករដែលទាមទារដំឡើងប្រាក់ឈ្នួលអប្បរមារ១៦០ដុល្លារ។ បាតុកម្មក្តៅកណ្តាលទីក្រុងនេះ បានបណ្តាលឱ្យមានមនុស្សស្លាប់យ៉ាងហោចណាស់៤នាក់ និងមនុស្សជាច្រើននាក់ផ្សេងទៀតបានរងរបួសទាំងធ្ងន់នឹងស្រាល។
មានវត្តមាននៅទីតាំងចែកខិតបណ្ណផ្ទាល់នៅខាងមុខតំបន់ឧស្សាហកម្មកាណាឌីយ៉ា ទាំងលោកស្រីម៉ម ញឹម និងលោកស្រី យ៉ាង សុភណ្ឌ បានថ្លែងថា ការផ្សព្វផ្សាយដើម្បីឱ្យកម្មករបន្តឈប់រយៈពេល៦ថ្ងៃបន្ថែមទៀតនេះ គឺដើម្បីជម្រុញឱ្យរដ្ឋាភិបាល និងតំណាងរោងចក្រដោះស្រាយបញ្ហាចំនួន៧ចំណុច។ ក្នុងនោះមានបញ្ហាប្រាក់ឈ្នួលអប្បរមា១៦០ដុល្លារក្នុងមួយខែ ការស្នើឱ្យដោះលែងកម្មករ និងសកម្មជនសិទ្ធិមនុស្សចំនួន២១នាក់ដែលកំពុងជាប់ឃុំ និងលើកលែងការចោទប្រកាន់ទាំងស្រុង។ និងសំណើដកបម្រាមនៃការជួបជុំជាសាធារណៈដែលរដ្ឋាភិបាលបានហាមប្រាមតាំងពីក្រោយអំពើហិង្សាកាលពីដើមខែមករានោះមកជាដើម។ លោកស្រីម៉ម ញឹម ប្រធានសហព័ន្ធសហជីពជាតិ នៃឧស្សាហកម្មវាយនភ័ណ្ឌកាត់ដេរកម្ពុជា បានអះអាងថា ការអំពាវនាវនេះនឹងមានប្រសិទ្ធភាពព្រោះថា ទឹកចិត្តកម្មករទាំងអស់ចង់បានប្រាក់ឈ្នួល១៦០ដុល្លារដដែល។
សូមបញ្ជាក់ថា ជាការឆ្លើយតបចំពោះសេចក្តីអំពាវនាវរបស់សហជីព សមាគមរោងចក្រកាត់ដេរ កាលពីពេលថ្មីនេះបានអះអាងថា មិនមានឡើយការជជែកពីការឡើងប្រាក់ខែក្នុងឆ្នាំ២០១៤នេះ។ បើមានគឺនៅឆ្នាំ២០១៥ឆ្នាំក្រោយ។ ប្រធានសមាគមរោងចក្រកាត់ដេរ លោក វ៉ាន់ ស៊ូអៀង បានថ្លែងសេចក្តីអំពាវនាវរបស់សហជីពស្តីពីការបន្តឈប់សម្រាកក្រោយចូលឆ្នាំ គឺមិនមានកម្មករចូលរួមច្រើននោះទេ។
ប៉ុន្តែយ៉ាងណាក៏ដោយ ក្រោយការអំពាវនាវឱ្យរបស់សហជីពទៅកាន់កម្មករឱ្យបន្តឈប់នៅថ្ងៃក្រោយពិធីបុណ្យចូលឆ្នាំខាងមុខនេះ ក្រសួងការងារ និងអង្គការអន្តរជាតិខាងការងារILO បានប្រកាសឱ្យមានសិក្សាតម្លៃឈ្នួលអប្បបរមា នៅចុងខែមេសានេះផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ