ព្រះបរមរាជវាំងបញ្ជាក់អំពីតួនាទីរបស់លោក អ៊ុំ ដារ៉ាវុធ
ការិយាល័យនាយកនៃព្រះរាជខុទ្ទកាល័យព្រះមហាក្សត្រ បានបញ្ជាក់នៅថ្ងៃពុធទី៩មេសានេះថា លោក អ៊ុំ ដារ៉ាវុធ មានតួនាទីជាទីប្រឹក្សាអមព្រះរាជលេខាធិការដ្ឋានសម្តេចម៉ែ នរោត្តម មុនីនាថសីហនុ។ សេចក្តីបញ្ជាក់ដោយមានទាំងព្រះរាជ្យក្រឹត្យអមជាមួយផងនេះបានធ្វើឡើងក្រោយពីលោក អ៊ុំ ដារ៉ាវុធ បានចេញលិខិតជាលក្ខណៈឯកជនមួយ កាលពីថ្ងៃទី៧មេសាដើម្បីបង្ហាញពីការយល់ឃើញរបស់ខ្លួន ចំពោះលិខិតរបស់លោក សម រង្ស៊ីថ្វាយព្រះមហាក្សត្រ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
លោក អ៊ុំ ដារ៉ាវុធ មានតួនាទីជាទីប្រឹក្សាអមព្រះរាជលេខាធិការដ្ឋានសម្តេចព្រះមហាក្សត្រី នរោត្តម មុនីនាថសីហនុ។ តួនាទីនេះត្រូវបានតែងតាំងដោយព្រះរាជក្រឹត្យចុះថ្ងៃទី ១៣ មីនាឆ្នាំ ២០១៣ ដោយផ្ទេរពីទីប្រឹក្សាអមព្រះរាជលេខាធិការដ្ឋានព្រះមហាវីរក្សត្រ សម្តេចឪ នរោត្តម សីហនុ។ នេះជាការបញ្ជាក់របស់ការិយាល័យនាយកនៃព្រះរាជខុទ្ទកាល័យព្រះមហាក្សត្រនៅថ្ងៃពុធទី៩ មេសានេះ។
ការបញ្ជាក់នេះបានធ្វើឡើងតាមរយៈសារអេឡិចត្រូនិកមួយដោយមានភ្ជាប់មកជាមួយនូវព្រះរាជក្រឹត្យពីរស្តីពីតួនាទីរបស់លោក អ៊ុំ ដារ៉ាវុធ ផងដែរ។ គ្មានការពន្យល់ណាផ្សេងក្រៅពីការបញ្ជាក់អំពីតួនាទីរបស់លោក អ៊ុំ ដារ៉ាវុធ នោះទេ។ ប៉ុន្តែ ការបញ្ជាក់អំពីបញ្ហានេះបានកើតឡើងក្រោយពីលោក អ៊ុំ ដារ៉ាវុធ បានចេញលិខិតជាលក្ខណៈឯកជនមួយកាលពីថ្ងៃទី ៧ មេសា ដើម្បីបង្ហាញពីការយល់ឃើញរបស់ខ្លួនចំពោះលិខិតរបស់លោក សម រង្ស៊ី ប្រធានគណបក្សសង្គ្រោះជាតិទូលថ្វាយព្រះមហាក្សត្រកាលពីថ្ងៃទី២មេសា។
ក្នុងលិខិតនោះ លោក សម រង្ស៊ី បានទូលថ្វាយព្រះមហាក្សត្រថា រដ្ឋសភាបច្ចុប្បន្នជាសភាឯកបក្សរបស់គណបក្សប្រជាជនកម្ពុជាដែលមិនតំណាងឲ្យពលរដ្ឋខ្មែរទាំងមូលទេ។ មេដឹកនាំបក្សប្រឆាំងក៏បានរម្លឹកថា កាលពីឆ្នាំ ២០០៣ សម្តេចឪ នរោត្តម សីហនុ មិនយាងចូលធ្វើជាព្រះរាជអធិបតីក្នុងកិច្ចប្រជុំសភាដំបូងទេដោយសារតែគ្មានវត្តមានតំណាងរាស្ត្រមកពីគ្រប់គណបក្សចូលរួម។
លិខិតនេះបានធ្វើឲ្យរដ្ឋាភិបាលគណបក្សកាន់អំណាចបញ្ចេញប្រតិកម្មយ៉ាងកងរំពងដោយបានចោទលោកសម រង្ស៊ីថាបានប្រមាថព្រះមហាក្សត្រ។ លោក អ៊ុំ ដារ៉ាវុធ បានចេញមុខបកស្រាយបញ្ហានេះដោយបញ្ជាក់ថា ការយល់ឃើញរបស់លោក សម រង្ស៊ី ថារដ្ឋសភាបច្ចុប្បន្នជាសភាឯកបក្សនោះគឺមិនត្រឹមត្រូវទេ ប៉ុន្តែ លិខិតរបស់មេបក្សប្រឆាំងរូបនេះក៏មិនបានធ្វើឲ្យប៉ះពាល់ធ្ងន់ធ្ងរដល់ព្រះរាជកិត្តិយសនិងកិត្តិនាមរបស់ព្រះមហាក្សត្រដែរ។
ដោយហេតុថា លិខិតរបស់លោក អ៊ុំ ដារ៉ាវុធ មានលក្ខណៈឯកជននិងគ្មានបញ្ជាក់ពីតួនាទី បណ្តាញផ្សាយព័ត៌មានបានប្រើតួនាទីរបស់លោកខុសៗគ្នា។ ទំនងជាហេតុផលនេះហើយបានជាការិយាល័យនាយកនៃព្រះរាជខុទ្ទកាល័យព្រះមហាក្សត្រចេញសេចក្តីបញ្ជាក់នេះ។ យ៉ាងណាក៏ដោយ គេនៅតែមិនទាន់ដឹងច្បាស់ថា តើលិខិតរបស់លោក អ៊ុំ ដារ៉ាវុធ ជាជំហររបស់រាជវាំងដែរឬយ៉ាងណានោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ