UNICEF ៖ ប្រជាជនខ្មែរ ជាង៦លាននាក់ ខ្វះទឹកស្អាតប្រើប្រាស់
ប្រជាជនកម្ពុជា ៦លាន៣សែននាក់ កំពុងខ្វះទឹកស្អាតប្រើប្រាស់។ នេះបើតាមរបាយការណ៍របស់អង្គការយូនីសេហ្វ ( Unicef ) នៅក្នុងឱកាសទិវាទឹកពិភពលោក ឆ្នាំ ២០១៤។ ការបញ្ចេញរបាយការណ៍នេះ គឺស្របពេលដែលរដ្ឋាភិបាលកម្ពុជា ចាត់ទុកការផ្គត់ផ្គង់ទឹកស្អាតជាអាទិភាពមួយ ក្នុងយុទ្ធសាស្ត្ររបស់ខ្លួន។ យោងតាមរបាយការណ៍របស់រដ្ឋាភិបាល ការផ្គត់ផ្គង់ទឹកស្អាត សម្រេចបាន ៤៤ភាគរយ នៃគ្រួសារនៅទីជនបទ និង ៧៦ភាគរយ នៃគ្រួសារនៅទីប្រជុំជន។
ចុះផ្សាយនៅថ្ងៃ៖
ស្តាប់ - ០២:៣៣
អង្គការយូនីសេហ្វ បាននិយាយថា ប្រជាជនកម្ពុជា ៦លាន ៣សែននាក់ កំពុងតែខ្វះទឹកស្អាតប្រើប្រាស់ ក្នុងចំណោមនោះ មានមនុស្ស ៣លាន៩សែននាក់គឺជាប្រជាជនក្រីក្រ ដែលរស់នៅក្នុងតំបន់ជនបទ។ យោងតាមអង្គការយូនីសេហ្វដែលផ្សព្វផ្សាយ ក្នុង ឱកាសទិវាទឹកពិភពលោកថ្ងៃទី ២១ មីនានេះ បញ្ហាកង្វះទឹកស្អាតនេះ បានធ្វើឲ្យកុមារ ដែលមានចំនួន ៤១ភាគរយនៃប្រជាជនសរុប ប្រឈមនឹងការឆ្លងជំងឺផ្សេងៗ តាមរយៈទឹក ដូចជាជំងឺរាគជាដើម។ ជំងឺរាគ ដែលអង្គការអន្តរជាតិមួយនេះ បានអះអាងថា ជាជំងឺចម្បងទី២ ដែលបានសម្លាប់កុមារអាយុក្រោម ប្រាំឆ្នាំជាច្រើននាក់ ហើយថែមទាំងបានធ្វើឲ្យខាតបង់ទឹកប្រាក់ប្រមាណ ១៤៦លានដុល្លា នៃផលិតផលសរុបក្នុងស្រុក GDP របស់កម្ពុជា។
អង្គការយូនីសេហ្វ បានលើកឡើងបន្តថា ដើម្បីធានាថា ប្រជាជនកម្ពុជា អាចទទួលបានទឹកស្អាតប្រើប្រាស់ ល្គឹកណាមានការបង្កើនការបេ្តជ្ញាចិត្ត និងការវិនិយោគ លើការបង្កើនគុណភាពទឹកនៅជនបទ។ មួយវិញទៀត កម្ពុជាត្រូវតែពន្លឿនការអភិវឌ្ឍសេដ្ឋកិច្ច និងសង្គមបន្ថែមទៀត។ ដើម្បីលើកកម្ពស់សុខភាពនៅកម្ពុជា អង្គការយូនីសេហ្វបានជំរុញឲ្យស្ថាប័នសាធារណៈ និងប្រជាពលរដ្ឋតាមគ្រួសារ ត្រូវតែជំរុញឲ្យមានការប្រើប្រាស់ទឹកស្អាត បូករួមទាំងអនាម័យផង ប្រយោជន៍គឺដើម្បី កាត់បន្ថយអត្រាស្លាប់ និងអត្រាចំនាយថវិកាជាតិ។
របាយការណ៍ដដែលបង្ហាញថា បច្ចប្បន្ននេះ មានសាលាបឋមសិក្សា ប្រមាណ ៤០ភាគរយ និងមណ្ឌលសុខភាពប្រមាណ ៣៥ភាគរយ ពុំមានបរិក្ខាផ្គត់ផ្គង់ទឹកស្អាតបរិភោគឡើយ។ យ៉ាងណាក៏ដោយ អង្គការយូនីសេហ្វ សហការជាមួយនឹងរាជរដ្ឋាភិបាលកម្ពុជា និងដៃគូអភិវឌ្ឍនានា បាននឹងកំពុងតែបន្តគោលដៅរៀបចំ និងអនុវត្តគោលនយោបាជាតិ ស្តីពីការផ្គត់ផ្គង់ទឹកស្អាត និងសេវាអនាម័យ។
សូមរម្លឹកជូនថា នៅក្នុងយុទ្ធសាស្ត្រចតុកោណ នីតិកាលទី៤ របស់រដ្ឋាភិបាលកម្ពុជា ការផ្គត់ផ្គង់ទឹកស្អាត សម្រេចបាន ៤៤ភាគរយ នៃគ្រួសារនៅទីជនបទ និង ៧៦ភាគរយ នៃគ្រួសារនៅទីប្រជុំជន។ យ៉ាងណាក៏ដោយ នៅក្នុងយុទ្ធសាស្ត្រចតុកោណ នីតិកាលទី៥នេះ រដ្ឋាភិបាលកម្ពុជា បានបេ្តជ្ញាថានឹងបន្តពង្រីកវិសាលភាពនៃការផ្គត់ផ្គង់ទឹកស្អាត នៅតំបន់ជនបទ និងទីប្រជុំជន។ ការពង្រីកវិលាសភាពទឹកស្អាតធ្វើឡើងតាមរយៈ «យុទ្ធសាស្ត្រជាតិស្តីពីវិស័យផ្គត់ផ្គង់ទឹកស្អាត និងអនាម័យជនបទ ២០១១-២០២៥» ព្រមទាំងការរៀបចំផែនការជាក់លាក់ និងការលើកទឹកចិត្តឲ្យមានការចូលរួម ពីវិស័យឯកជន។
អង្គការយូនីសេហ្វ បានបន្ថែមថា កម្ពុជា នៅពុំទាន់មានទឹកស្អាតប្រើប្រាស់ និងអនាម័យមូលដ្ឋាននៅឡើយទេ បើទោះបីជាមហាសន្និបាតអង្គការសហប្រជាជាតិ បានប្រកាសរយៈពេលជិត៤ឆ្នាំ មកហើយថា ការទទួលបានទឹកស្អាត និងអនាម័យមូលដ្ឋាន គឺជាសិទ្ធរបស់មនុស្សគ្រប់រូបគួរទទួលបានក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ