ជំងឺអាត្មានិយមក្នុងសង្គមខ្មែរកំពុងបន្សាបគំនិតជាតិនិយមឲ្យចុះខ្សោយ
ចុះផ្សាយនៅថ្ងៃ៖
ស្តាប់ - ០៥:០៧
នៅក្នុងសង្គមកម្ពុជាបច្ចុប្បន្ន មនុស្សហាក់ដូចជាមានជំងឺអាត្មានិយមកាន់តែខ្លាំងឡើងពោលគឺម្នាក់ៗគិតតែផលប្រយោជន៍ផ្ទាល់ខ្លួន ដោយមិនយកចិត្តទុកដាក់នឹងផលប្រយោជន៍សាធារណៈ ឬប្រយោជន៍អ្នកដទៃឡើយ។ ជំងឺអាត្មានិយមគឺជាប្រភពនៃគម្លាតកាន់តែខ្លាំងឡើងរវាងអ្នកមាននិងអ្នកក្រ និងធ្វើឲ្យសង្គមកាន់តែចាកឆា្ងយពីសាមគ្គីភាព និងឯកភាពជាតិ។ នៅពេលដែលជំងឺនេះកំពុងមានឥទ្ធិពលខ្លាំងវាបានធ្វើឲ្យគំនិតជាតិនិយមចុះខ្សោយរហូតស្ទើរតែបាត់បង់។ នេះជាស្ថានភាពដែលគួរតែកែប្រែ។
ការគិតគូរតែប្រយោជន៍ខ្លួនឯង ហើយមិនអើពើនឹងប្រយោជន៍សាធារណៈឬប្រយោជន៍អ្នកដទៃគឺជានិន្នាការដែលកំពុងកើតឡើងនិងហាក់ដូចជាកំពុងមានឥទ្ធិពលខ្លាំងគួរឲ្យកត់សម្គាល់ក្នុងសង្គមខ្មែរបច្ចុប្បន្ន។ អ្នកមានលុយ និងមានអំណាចខ្លះគិតតែពីបង្កើនទ្រព្យសម្បត្តិរបស់ខ្លួនតាមដែលអាចធ្វើបានដោយមិនខ្វល់ខ្វាយពីអ្នកតូចតាច និងអ្នកក្រខ្សត់។
នៅក្នុងវិស័យសាធារណៈ អ្នកដែលមានលទ្ធភាពអាចរកប្រាក់បានគិតតែរកប្រយោជន៍ផ្ទាល់ខ្លួនដោយមិនរវីរវល់ដល់សេដ្ឋកិច្ចជាតិឬជីវភាពអ្នកធ្វើការនៅក្រោមបង្គាប់។ អ្នកប្រកបវិជ្ជាជីវៈមួយចំនួនសម្លឹងឃើញប្រាក់ជាធំ ហើយសុខចិត្តបំភ្លេចក្រមសីលធម៌ និងអំពើមនុស្សធម៌។ អ្នកមានលុយគិតតែបង្កើនឱកាសប្រមូលប្រាក់តាមគ្រប់មធ្យោបាយដែលអាចធ្វើបានដោយមិនសូវគិតគូរពីជីវភាពរបស់បុគ្គលិកកម្មករឬផលប៉ះពាល់នៃអាជីវកម្មរបស់ខ្លួនទៅលើសង្គម និងទៅលើអ្នកអ្នកដទៃឡើយ។
អ្នកជួញដូរគិតតែពីផលចំណេញទោះបីជាត្រូវប្រើថ្នាំគីមីក្នុងចំណីអាហារ បន្លែ ផ្លែឈើ ធ្វើឲ្យអ្នកដទៃគ្រោះថ្នាក់ក៏មិនខ្វាយខ្វល់ដែរ។ ម្យ៉ាងទៀត មនុស្សជាច្រើនហាក់មិនសូវនឹកនាដល់ផលប្រយោជន៍សាធារណៈ ឬផលប្រយោជន៍ជាតិឲ្យដូចជាផលប្រយោជន៍ផ្ទាល់ខ្លួនឡើយ។ ឲ្យតែបានប្រាក់ចូលហោប៉ៅ គេមិនសូវគិតពីសីលធម៌ឡើយ។ ឥរិយាបថបែបនេះត្រូវគេកត់សម្គាល់ឃើញថា កំពុងកើតនៅលើមនុស្សខ្មែរកាន់តែច្រើនឡើង។
ក្រឡេកមើលទៅទីសាធារណៈវិញ សំរាម ឬកាកសំណល់ផ្សេងៗត្រូវគេបោះចោលពាសវាលពាសកាលពីព្រោះតែទីនោះមិនមែនជាផ្ទះសម្បែងរបស់ខ្លួន។ កៅអី អំពូលភ្លើងនៅតាមសួនច្បារឬតាមដងផ្លូវសាធារណៈច្រើនតែបែកបាក់ឬបាត់បង់ព្រោះតែគ្មានការថែទាំនិងការពារ។ ទាំងនេះជាឧទាហរណ៍ជាក់ស្តែងខ្លះៗក្នុងចំណោមបញ្ហារាប់រយជំពូកដែលកំពុងចាក់ស្រេះក្នុងសង្គមខ្មែរបច្ចុប្បន្ន។
ជាការពិតណាស់ សង្គមមួយអាចស្គាល់ការរីកចម្រើន និងស្គាល់ភាពស៊ីវិល័យទៅបាន ទាល់តែមនុស្សនៅក្នុងសង្គមនោះមានគំនិតជាតិនិយម និងចេះតម្កល់ផលប្រយោជន៍សាធារណៈជាធំ ឬយ៉ាងហោចណាស់ក៏ត្រូវចាត់ទុកទ្រព្យសម្បត្តិសាធារណៈឬក៏ទ្រព្យសម្បត្តិអ្នកដទៃឲ្យដូចជារបស់ខ្លួនឯងអ៊ីចឹងដែរ។ មិនត្រឹមតែអចលនទ្រព្យប៉ុណ្ណោះទេ មនុស្សក្នុងសង្គមគួរតែចេះគិតគូរដល់សុខទុក្ខគ្នាទៅវិញទៅមកឲ្យបានច្រើនផងដែរពោលគឺមនុស្សត្រូវចែករម្លែកគ្នារស់ជាជាងរស់ដោយគិតតែខ្លួនឯង។
គំនិតជាតិនិយមមានន័យថា ការចេះចែករម្លែកទុក្ខលំបាករបស់ជនរួមជាតិដែលមានឈាមជ័រជាដូចខ្លួនដែរ។ អារម្មណ៍បែបនេះពិតជាមានសារសំខាន់ណាស់សម្រាប់ខ្មែរគ្រប់គ្នា ជាពិសេសវារឹតតែសំខាន់ថែមទៀតសម្រាប់អ្នកនយោបាយ និងអ្នកដឹកនាំប្រទេស។ ក៏ប៉ុន្តែ គួរឲ្យសោកស្តាយ និន្នាការសង្គមកម្ពុជាបច្ចុប្បន្នហាក់ដូចជាកំពុងដើរបញ្ច្រាសទិសនេះទៅវិញ។
មនុស្សកាន់តែច្រើនឡើងៗហាក់ដូចកំពុងឆ្លងជំងឺអាត្មានិយមដ៏គួរឲ្យព្រួយបារម្ភ។ អ្នកមានខ្លះគិតតែពីចង់មានបន្ថែមទៀតទោះជាមធ្យោបាយដើម្បីមាននោះប៉ះពាល់ដល់សេដ្ឋកិច្ចជាតិ និងប៉ះពាល់ដល់អ្នកក្រីក្រយ៉ាងណាក៏ដោយ។ អំពើពុករលួយ ជម្លោះដីធ្លី ប្រាក់កម្រៃតិចតួចរបស់បុគ្គលិកកម្មករ ឬការកេងបន្លំថវិការដ្ឋតាមរបៀបត្រីងៀតឆ្លៀតពង។ល។ សុទ្ធសឹងជាលទ្ធផលនៃគំនិតអាត្មានិយម ដែលធ្វើឲ្យប្រទេសមិនងាយអភិវឌ្ឍន៍ទៅមុខបានឡើយ ហើយវាក៏ជាប្រភពនៃគម្លាតកាន់តែឆ្ងាយរវាងអ្នកមាន និងអ្នកក្រ។
ដូច្នេះ ពលរដ្ឋខ្មែរគួរតែនាំគ្នាព្យាបាលជំងឺនេះចេញ ហើយបែរមកបណ្តុះគំនិតជាតិនិយមឲ្យបានច្រើនតាមដែលអាចធ្វើទៅបាន។ ការគោរពផលប្រយោជន៍រួម និងប្រយោជន៍អ្នកដទៃគឺជាវប្បធម៌ដែលត្រូវបណ្តុះជាបឋម។ ក្នុងន័យនេះ រដ្ឋត្រូវគិតគូរដល់ជីវភាពមន្ត្រីរាជការឲ្យបានសមរម្យ ថៅកែឬនិយោជក់ក៏គួរតែចែករម្លែកភាគផលដល់បុគ្គលិកកម្មកររបស់ខ្លួនឲ្យបានសមស្របដែរ។ ទន្ទឹមនឹងនោះ គ្រប់គួរតែចេះការពារផលប្រយោជន៍សាធារណៈ និងប្រយោជន៍ឯកជនរបស់អ្នកដទៃឲ្យបានល្អឲ្យដូចជាទ្រព្យសម្បត្តិរបស់ខ្លួនដែរ។
ក្នុងស្ថានភាពដែលប្រទេសជាតិកំពុងត្រូវការអភិវឌ្ឍន៍ និងក្នុងកាលៈទេសៈដែលពលរដ្ឋខ្មែរជាច្រើនបន្តរស់នៅក្នុងភាពក្រីក្រតោកយ៉ាកយ៉ាងខ្លាំងនៅឡើយ វប្បធម៌ចែករម្លែកពិតជាមានតម្លៃណាស់។ ប៉ុន្តែ វប្បធម៌នេះអាចមានតម្លៃទាល់តែគ្រប់គ្នាយកឈ្នះជំងឺអាត្មានិយមឲ្យបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ