បក្សប្រឆាំងបដិសេធលទ្ធផលបោះឆ្នោតនិងទាមទារឲ្យបង្កើតគណៈកម្មការចម្រុះដើម្បីស៊ើបអង្កេត
មួយថ្ងៃបន្ទាប់ពីការបោះឆ្នោត និងបន្ទាប់ពីលទ្ធផលបណ្តោះអាសន្នក្រៅផ្លូវការត្រូវបានប្រកាស គណបក្សសង្គ្រោះជាតិបានបដិសេធមិនទទួលយកលទ្ធផល និងទាមទារឲ្យបង្កើតគណៈកម្មការចម្រុះមួយដើម្បីស៊ើបអង្កេតភាពមិនប្រក្រតី។
ចុះផ្សាយនៅថ្ងៃ៖ កែប្រែថ្ងៃទី៖
នៅក្នុងសេចក្តីថ្លែងការណ៍មួយដែលចេញផ្សាយនៅព្រឹកថ្ងៃចន្ទទី២៩ កក្កដានេះ គណបក្សសង្គ្រោះជាតិបានប្រកាសថាខ្លួនមិនទទួលយកលទ្ធផលនៃការបោះឆ្នោតនេះទេពីព្រោះគណបក្សនេះបានសង្កេតឃើញថាមានភាពមិនប្រក្រតីជាច្រើន និងយ៉ាងធ្ងន់ធ្ងរ។ ទន្ទឹមនឹងនោះ គណបក្សសង្គ្រោះជាតិក៏បានទាមទារឲ្យបង្កើតគណៈកម្មការចម្រុះមួយជាបន្ទាន់ដើម្បីបើកការស៊ើបអង្កេតអំពីភាពមិនប្រក្រតីទាំងនោះ។
គណៈកម្មការចម្រុះនោះមានសមាសភាពមកពីគណបក្សសង្គ្រោះជាតិ គណបក្សប្រជាជនកម្ពុជា គណៈកម្មាធិការជាតិរៀបចំការបោះឆ្នោត តំណាងសហប្រជាជាតិ តំណាងសង្គមស៊ីវិលជាតិ និងអន្តរជាតិ ដែលធ្វើការពាក់ពន្ធ័នឹងការបោះឆ្នោត។ គណៈកម្មការចម្រុះនេះត្រូវធ្វើការស៊ើបអង្កេត និងផ្តល់របាយការណ៍ចុងក្រោយមិនឲ្យហួសពីថ្ងៃទី ៣១សីហាឡើយ។
សូមបញ្ជាក់ថា គណៈកម្មាធិការជាតិរៀបចំការបោះឆ្នោត(គ.ជ.ប) នៅមិនទាន់ប្រកាសលទ្ធផលនៃការបោះឆ្នោតតំណាងរាស្រ្ត សម្រាប់អាណត្តិទី៥ ឆ្នាំ២០១៣នេះនៅឡើយទេ ក៏ប៉ុន្តែ លោកខៀវ កាញារីទ្ធ រដ្ឋមន្ត្រីក្រសួងព័ត៌មាន និងជា អ្នក នាំពាក្យ រដ្ឋាភិបាល គណបក្ស កាន់អំណាច បានប្រកាសថា គេអាចនិយាយបានថា គណបក្សប្រជាជនកម្ពុជាទទួលជោគជ័យក្នុងការបោះឆ្នោតនេះ។ លោកបានសរសេរនៅលើទំព័រហ្វេសប៊ុករបស់លោកថា បើតាមការប៉ាន់ស្មាន គណបក្សប្រជាជនទទួលបាន ៦៨អាសនៈ ចំណែកឯគណបក្សសង្រ្គោះជាតិវិញទទួលបាន ៥៥អាសនៈ។
គណបក្សសង្គ្រោះជាតិនៅមិនទាន់ប្រកាសថាខ្លួនទទួលបានប៉ុន្មាននៅឡើយទេ។ កាលពីល្ងាចថ្ងៃអាទិត្យ គណបក្សនេះបានប្រកាសថា ខ្លួនទទួលបានជ័យជំនៈ ប៉ុន្តែ បន្តិចក្រោយមកក៏បានប្តូរសេចក្តីប្រកាសមកជាការថ្លែងអំណរគុណដល់អ្នកបោះឆ្នោត និងអំពាវនាវកុំឲ្យមានអំពើហិង្សាវិញ ដោយមិននិយាយថា ខ្លួនឈ្នះឆ្នោតទៀតឡើយ។ នៅព្រឹកនេះ គណបក្សប្រឆាំងក៏បានប្រកាសបដិសេធលទ្ធផលនៃការបោះឆ្នោត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ