កម្ពុជា -

អត្ថបទចុះផ្សាយនៅថ្ងៃ សុក្រ 24 កុម្ភៈ 2012 - ព័ត៌មានទើបកែប្រើលើកចុងក្រោយ ថ្ងៃ សុក្រ 24 កុម្ភៈ 2012

តុលាការយោធាផ្តន្ទាទោសអតីតមេបញ្ជាការកងអង្គរក្សលោក ជា ស៊ីម ដាក់ពន្ធនាគារ២៦ឆ្នាំ

លោក ឈឿន ចាន់ថន អតីតមេបញ្ជាការកងអង្គរក្សរបស់លោក ជា ស៊ីម ប្រធានគណបក្សប្រជាជនកម្ពុជា

RFI/Siv Channa

ដោយ លី ម៉េងហួរ

នៅព្រឹកថ្ងៃសុក្រនេះ លោក ឈឿន ចាន់ថន ហៅ ម៉ៅ អតីតមេបញ្ជាការកងអង្គរក្សរបស់លោក ជា ស៊ីម ប្រធានគណបក្សប្រជាជនកម្ពុជា និងជាប្រធានព្រឹទ្ធសភា ត្រូវបានតុលាការយោធា ប្រកាសផ្តន្ទាទោសដាក់ពន្ធនាគាររយៈពេល ២៦ ឆ្នាំពិន័យប្រាក់ជិត ៤ លានដុល្លារអាមេរិក ព្រមទាំងរឹបអូសទ្រព្យសម្បត្តិជាច្រើនផ្សេងទៀត។ ការផ្តន្ទាទោសដូច្នេះ ត្រូវបានចៅក្រមតុលាការយោធា សំអាងលើបទចោទប្រកាន់ ៥ ករណី រួមមាន បទរំលោភលើទុកចិត្ត បំផ្លិចបំផ្លាញដោយចេតនា កេងបំបាត់ដោយទុច្ចរិតលក់ដូរ និងចែកចាយអាវុធ ជាដើម។ កាលពីថ្ងៃទី១៦កុម្ភៈ អតីតឧត្តមសេនីយ៍ផ្កាយបី លោក ឈឿន ចាន់ថន ក៏ត្រូវបានតុលាការរាជធានីភ្នំពេញ ផ្តន្ទាទោសដាក់ពន្ធនាគារ ១០ ឆ្នាំ ក្នុងបទចោទប្រកាន់ ៤ ករណីផ្សេងទៀត។

សេចក្តីរាយការណ៍របស់លី ម៉េងហួរ

ស្តាប់ (03:10)

24/02/2012 by លី ម៉េងហួរ

ការផ្តន្ទាទោសអតីតមេអង្គរក្សលោកជាស៊ីម នៅថ្ងៃសុក្រនេះ ប្រកាសដោយលោក ប៉ោក ប៉ន ប្រធានក្រុមប្រឹក្សាជំនុំជម្រះនៃតុលាការយោធា នៅចំពោះមុខជនជាប់ចោទ លោក ឈឿន ចាន់ថន និងមេធាវីការពារក្តី។ ប៉ុន្តែពុំមានវត្តមានដើមបណ្តឹង និងមេធាវី ណាច ទ្រី តំណាងអោយដើមបណ្តឹងទេ។ តុលាការយោធា បានបើកសវនាការកាត់ទោស លោក ឈឿន ចាន់ថន កាលពីថ្ងៃទី១៥ ខែកុម្ភៈ ឆ្នាំ២០១២។

ប្រធានក្រុមប្រឹក្សាជំនុំជម្រះ លោក ប៉ោក ប៉ន បានសម្រេចផ្តន្ទាទោសលោក ឈឿន ចាន់ថន ដាក់ពន្ធនាគារកំណត់ ២៦ ឆ្នាំ គិតពីថ្ងៃចាប់ខ្លួន កាលពីថ្ងៃទី១៣ ខែសីហា ឆ្នាំ២០១១ លើបទចោទប្រកាន់ ៥ ករណី រួមមាន បទរំលោភលើសេចក្តីទុកចិត្ត បំផ្លិចបំផ្លាញដោយចេតនា និងកេងបំបាត់ដោយទុច្ចរិត លក់ដូរចែកចាយអាវុធ បំផ្លិចបំផ្លាញនូវសម្ភារៈយោធាសម្រាប់បំរើការប្រយុទ្ធ និងខ្វះស្មារតីទទួលខុសត្រូវក្នុងការដឹកនាំគ្រប់គ្រងអង្គភាព។ បទល្មើសទាំងនោះ ប្រព្រឹត្តឡើងនៅរាជធានីភ្នំពេញ ក្នុងឆ្នាំ២០០៧។

លោកចៅក្រម ក៏បានបង្គាប់អោយអតីតមេអង្គរក្សលោកជាស៊ីម សងប្រាក់ទៅលោក យឹមលាង មេអង្គរក្សថ្មីរបស់លោកជាស៊ីម និងជាតំណាងដើមបណ្តឹងរដ្ឋប្បវេណី ចំនួន ២ លានដុលា្លរ ព្រមទាំងសងប្រាក់ទៅលោក មាស គឹមហេង ជាដើមបណ្តឹងរដ្ឋប្បវេណីម្នាក់ទៀត ចំនួន ៧៤៩.៨៣៦ ដុល្លារ។ ចៅក្រមក៏បង្គាប់ឲ្យលោក ឈឿន ចាន់ថន សងប្រាក់ចំនួន ៨៩៧.៧៥០ ដុលា្លរអាមេរិក ទៅអោយឈ្មោះ ង៉ែត ណារិន ជាដើមបណ្តឹងរដ្ឋប្បវេណី តំណាងឲ្យក្រសួងការពារជាតិ។

ចៅក្រមតុលាការយោធាក៏បានប្រកាសថា បើសិនជាលោក ឈឿន ចាន់ថន ពុំមានប្រាក់ ឬក៏ពុំព្រមសងប្រាក់សរុបជិត ៤ លានដុល្លារខាងលើនេះទេ តុលាការនឹងរឹបអូសទ្រព្យសម្បត្តិរបស់លោក ឈឿន ចាន់ថន ហៅ ម៉ៅ។ ក្នុងនោះ មានដីនៅព្រែកឯង ក្នុងស្រុកកៀនស្វាយ។ ចំណែកដីបីកន្លែងទៀត ជាអតីតឃ្លាំងប្រេងកន្ទោក ស្រុកអង្គស្នួល និងដីអតីតទីតាំងទីលានបាញ់ស៊ីប នៅកំបូល ខេត្តកណ្តាល ព្រមទាំងបន្ទាយអង្គរក្ស នៅក្រោយវត្តបទុម ក្រុងភ្នំពេញ ត្រូវរឹបអូស ប្រគល់អោយក្រសួងការពារជាតិ និងប្រគល់ឲ្យអង្គភាពអង្គរក្សលោក ជា ស៊ីម។

ចៅក្រមក៏បានបង្គាប់អោយលោក ឈឿន ចាន់ថន ហៅម៉ៅ បង់ប្រាក់ពិន័យចូលថវិការដ្ឋចំនួន ១០ លានរៀល ស្មើប្រមាណ ២.៥០០ ដុល្លារផ្សេងទៀត។ បន្ទាប់ពីស្តាប់សាលក្រមផ្តន្ទាទោសដូច្នេះ លោក ឈឿន ចាន់ថន និងមេធាវីបានប្រកាសប្តឹងឧទ្ធរណ៍ ប្រឆាំងនឹងការសម្រេចរបស់តុលាការយោធា។

កាលពីថ្ងៃទី១៦ ខែកុម្ភៈឆ្នាំ២០១២ លោក ឈឿន ចាន់ថន ត្រូវបានចៅក្រមសាលាដំបូងរាជធានីភ្នំពេញ ផ្តន្ទាទោសដាក់ពន្ធនាគារ ១០ ឆ្នាំ និងពិន័យជាប្រាក់ ៥ លានរៀល ក្នុងបទចោទ ៤ ករណី គឺកាន់កាប់អាវុធ និងគ្រាប់ ដោយគ្មានការអនុញ្ញាត ចេញអាជ្ញាប័ណ្ណឲ្យប្រើប្រាស់អាវុធ និងគ្រាប់ដល់បុគ្គលដែលមិនមែនជាសមត្ថកិច្ច ក្លែងលិខិតសាធារណៈ និងប្រើប្រាស់លិខិតក្លែងសាធារណៈ។ អតីតឧត្តមសេនីយ៍ឯក លោក ឈឿន ចាន់ថន អតីតមេបញ្ជាការកងអង្គរក្សលោកជាស៊ីម និងមេធាវីរបស់លោក ក៏បានប្រកាសប្តឹងឧទ្ធរណ៍ជំទាស់ទៅនឹងសាលក្រមរបស់តុលាការក្រុងភ្នំពេញផងដែរ៕