កម្ពុជា-តុលាការខ្មែរក្រហម -

អត្ថបទចុះផ្សាយនៅថ្ងៃ សុក្រ 03 កុម្ភៈ 2012 - ព័ត៌មានទើបកែប្រើលើកចុងក្រោយ ថ្ងៃ សុក្រ 03 កុម្ភៈ 2012

ជនរងគ្រោះរបបខ្មែរក្រហមផ្តើមទទួលបានយុត្តិធម៌ហើយ

អតីតមេគុកទួលស្លែងកាំង ហ្គេចអ៊ាវហៅឌុច

ដោយ តាន់ ហ្សង់-ហ្វ្រង់ស្វ័រ

សាលក្រមរបស់តុលាការកំពូលនៅថ្ងៃសុក្រទី៣កុម្ភៈនេះ ដែលកាត់ទោសឲ្យឌុចជាប់គុកមួយជីវិត គឺជាជោគជ័យមួយរបស់ជនរងគ្រោះនៃរបបខ្មែរក្រហម ពីព្រោះនៅទីបំផុត ពួកគេបានទទួលយុត្តិធម៌មួយសមរម្យ។

សេចក្តីរាយការណ៍របស់ តាន់ ហ្សង់-ហ្វ្រង់ស្វ័រ

ស្តាប់ (02:06)

03/02/2012 by តាន់ ហ្សង់-ហ្វ្រង់ស្វ័រ

អ្វីដែលជាក់ច្បាស់ គឺកាលពីព្រឹកមិញនេះ ជាទូទៅជនរងគ្រោះសប្បាយចិត្ត ជនរងគ្រោះពេញចិត្ត ពេញចិត្តនឹងសាលដីកាស្ថាពររបស់តុលាការកំពូលដែលបានកាត់ទោសឌុចឲ្យជាប់គុកអស់មួយជីវិត មិនដូចកាលពីជាងមួយឆ្នាំមុនទេ។

ម្នាក់ៗនៅចាំបានថា កាលពីខែកក្កដាឆ្នាំ២០១០ នៅពេលដែលអង្គជំនុំជម្រះតុលាការដំបូងបានកាត់ទោសឲ្យអតីតមេគុកទួលស្លែងជាប់គុកតែ៣៥ឆ្នាំ កាត់កងរួចដាច់ស្រេចអស់នៅសល់តែ១៩ឆ្នាំ ភាគីដើមបណ្តឹងរដ្ឋប្បវេណីមិនបានសុខចិត្តទេ ហើយគ្រួសារជនរងគ្រោះ ខ្លះបានទាំងស្រែកយំផង។ កាលណោះ អតីតអ្នកទោសនៃមន្ទីរស២១ខ្លះ ថែមទាំងបានជេរតុលាការដែលយោងទៅតាមសំដីពួកគេ មិនបានទទួលស្គាល់សោះឡើយការឈឺចាប់របស់ពួកគាត់ ការឈឺចាប់របស់ជនរងគ្រោះទាំងអស់ក្នុងរបបខ្មែរក្រហម។

ជាការពិតណាស់ដែលថា យុត្តិធម៌មិនមែនជាការសងសឹកទេ តែជាការស្វែងរកការដាក់ទោសមួយសមរម្យទៅលើឧក្រិដ្ឋជន ដោយសំអាងទៅលើតែច្បាប់ដែលកំពុងចូលជាធរមាន និងទៅលើតែយុត្តិសាស្រ្ត ពាក្យបារាំងគេថាJuriprudence ពោលគឺទម្លាប់នៃការកាត់ទោសដែលបន្សល់មកពីការកាត់ក្តីមុនៗក្នុងសំណុំរឿងស្រដៀងគ្នាឬដូចគ្នា។ ក៏ប៉ុន្តែ បើវាមិនមែនជាការសងសឹក យុត្តិធម៌ក៏មិនអាចមើលរំលងបានដែរ លក្ខណៈព្រៃផ្សៃហួសហេតុរកលេខដាក់គ្មាននៃឧក្រិដ្ឋកម្មរបស់ឌុច និងទម្ងន់នៃទុក្ខវេទនាផ្លូវចិត្តព្រមទាំងផ្លូវកាយរបស់ជនរងគ្រោះ។

កើតជាមនុស្ស អ្នកណាយល់ព្រម ជនរងគ្រោះណាសុខចិត្តឲ្យឌុចមិនទទួលទោសធ្ងន់បំផុត បើទោះបីជាកាលណោះ ចៅក្រមសាលាដំបូងបានពន្យល់ថា បានសម្រាលទោសឲ្យជនជាប់ចោទ ដ្បិតគាត់បានសហការជាមួយតុលាការ បានសារភាពនិងបានសម្តែងវិប្បដិសេរីក៏ដោយ? សម្រាប់ជនរងគ្រោះ កុំថាឡើយជាប់គុកមួយម៉ឺនឆ្នាំ សូម្បីតែបកស្បែកឌុចប្រឡាក់អំបិលម្ទេស រួចហើយព្យួរករគាត់ក៏មិនគ្រប់គ្រាន់ដែរ។

ម្ល៉ោះហើយ លើកនេះ ជាងមួយឆ្នាំក្រោយការប្រកាសសាលដីកាប្រកបដោយសង្គ្រាមប៉ាកការបស់សាលាដំបូង និងតាមរយៈការកាត់ទោសដោយតុលាការកំពូលកាលពីព្រឹកមិញឲ្យឌុចជាប់គុកអស់មួយជីវិត គេអាចនិយាយបានថាខ្មែររាប់រយម៉ឺននាក់ដែលស្លាប់ក្រោមរបបខ្មែរក្រហម ត្រូវបានតុលាការផ្តើមផ្តល់យុត្តិធម៌ឲ្យហើយ៕