កម្ពុជា -

អត្ថបទចុះផ្សាយនៅថ្ងៃ អង្គារ 31 មករា 2012 - ព័ត៌មានទើបកែប្រើលើកចុងក្រោយ ថ្ងៃ សុក្រ 03 កុម្ភៈ 2012

នាយករដ្ឋមន្ត្រីបញ្ជាឲ្យក្រុមហ៊ុនបញ្ជូនខ្លួនអ្នកបាញ់ប្រជាពលរដ្ឋនៅក្នុងជម្លោះដីនៅខេត្តក្រចេះ

លោកនាយករដ្ឋមន្ត្រី ហ៊ុន សែន ព្រមានឧកញ៉ា ណាម៉ារឌី ប្រធានក្រុមហ៊ុនធីធីវ៉ាយ

ដោយ លី ម៉េងហួរ

ក្នុងពិធីសម្ពោធផ្លូវនៅខេត្តមណ្ឌលគិរី នៅថ្ងៃអង្គារនេះ លោកនាយករដ្ឋមន្ត្រី ហ៊ុនសែន បានប្រកាសថ្កោលទោស ចំពោះទង្វើរបស់ទាហានការពារក្រុមហ៊ុន ធីធីវ៉ាយ ដែលបានបាញ់ប្រហារលើក្រុមពលរដ្ឋតវ៉ាដីធ្លី នៅខេត្តក្រចេះ កាលពីថ្ងៃទី១៨មករា។ លោកនាយករដ្ឋមន្ត្រី ហ៊ុន សែន ក៏បានព្រមានចំពោះមុខលោកឧកញ៉ា ណាម៉ារឌី ប្រធានក្រុមហ៊ុន ធីធីវ៉ាយ និងជាទីប្រឹក្សារបស់លោកនាយករដ្ឋមន្ត្រីផ្ទាល់ ដើម្បីបញ្ជូនជនដៃដល់ ឲ្យសមត្ថកិច្ចចាត់ការតាមផ្លូវច្បាប់ បើមិនដូច្នោះទេប្រធានក្រុមហ៊ុននោះ ត្រូវតែទទួលខុសត្រូវចំពោះមុខច្បាប់។

សេចក្តីរាយការណ៍របស់លី ម៉េងហួរ

ស្តាប់ (01:52)

31/01/2012 by លី ម៉េងហួរ

លោកនាយករដ្ឋមន្ត្រី ហ៊ុន សែន បានប្រកាសផ្ទាល់មាត់ នៅក្នុងពិធីសម្ពោធដាក់ឲ្យប្រើប្រាស់កំណាត់ផ្លូវជាតិលេខ ៧៦ ខេត្តមណ្ឌលគិរី នៅព្រឹកថ្ងៃអង្គារនេះ ដោយថ្កោលទោសផង និងដោយព្រមានផង ចំពោះទង្វើរបស់សន្តិសុខក្រុមហ៊ុនធីធីវ៉ាយ ដែលបានបាញ់រះ បណ្តាលឲ្យពលរដ្ឋ ៤ នាក់ រងរបួស ក្នុងជម្លោះដី នៅខេត្តក្រចេះ កាលពីថ្ងៃទី១៨ខែមករា។

នៅខេត្តមណ្ឌលគិរី ដែលស្ថិតនៅជិតតំបន់ដីមានជម្លោះ ក្នុងស្រុកស្នួល ខេត្តក្រចេះ លោកនាយករដ្ឋមន្ត្រី ហ៊ុន សែន បានប្រកាសសុំទោសដល់ប្រជាពលរដ្ឋ នៅស្រុកស្នួល ខេត្តក្រចេះ ពាក់ព័ន្ធនឹងជម្លោះដីធ្លី ហើយឈានដល់អំពើហិង្សា។

ជាមួយគ្នានោះ លោកនាយករដ្ឋមន្ត្រី បានព្រមាននៅចំពោះមុខលោកឧកញ៉ា ណាម៉ារឌី ប្រធានក្រុមហ៊ុន ធីធីវ៉ាយ និងជាទីប្រឹក្សានាយករដ្ឋមន្ត្រី ឲ្យបញ្ជូនខ្លួនជនដៃដល់បាញ់រះលើពលរដ្ឋតវ៉ាដីធ្លី ដើម្បីចាត់ការតាមច្បាប់។ លោកនាយករដ្ឋមន្ត្រី ក៏បានព្រមានដល់ទីប្រឹក្សារបស់លោក បើមិនបញ្ជូនជនដៃឲ្យសមត្ថកិច្ចទេ គឺត្រូវនាំខ្លួនលោកឧកញ៉ាប្រធានក្រុមហ៊ុនតែម្តង។

ជាមួយនឹងការលើកឡើងដូច្នេះ លោកនាយករដ្ឋមន្ត្រី ក៏បានដាក់ចេញដំណោះស្រាយក្នុងជម្លោះដីនោះ គឺក្រុមហ៊ុន និងអាជ្ញាធរមូលដ្ឋាន ត្រូវផ្តល់ដីរបស់ឲ្យពលរដ្ឋវិញ។ ហេតុការណ៍លើក្រុមហ៊ុនដីសម្បទាននេះ ក៏ត្រូវបានលោកនាយករដ្ឋមន្ត្រី ព្រមានដកហូតដីពីក្រុមហ៊ុនវិញ បើសិនជាមានហេតុការណ៍ប៉ះទង្គិចដោយហិង្សាជាមួយប្រជាពលរដ្ឋ កើតឡើង។

លោកនាយករដ្ឋមន្ត្រី ហ៊ុន សែន ប្រកាសពីដំណោះស្រាយបញ្ហាជម្លោះដីធ្លី នៅខេត្តក្រចេះ នៅថ្ងៃនេះ គឺធ្វើឡើងខណៈដែលជម្លោះដីធ្លី បានរាលដាលស្ទើរតែពេញផ្ទៃប្រទេស។ ជម្លោះដីធ្លី ក៏ជាប្រធានសំខាន់មួយ សម្រាប់យុទ្ធនាការបោះឆ្នោតឃុំសង្កាត់ នៅខែមិថុនាខាងមុខ៕

tags: កម្ពុជា - ជម្លោះដីធ្លី

ទាក់ទងនឹងប្រធានបទនេះដែរ :

អត្ថាធិប្បាយ (2)

ដូចអត់សូវស្រួល

Submitted by វីរះ (not verified) on Wed, 2012-02-01 04:11.

ម៉េចបានត្រូវនាយករដ្ឋមន្ត្រីបញ្ជាឲ្យក្រុមហ៊ុនបញ្ជូនខ្លួនជន់ល្មើស?? គឺចាប់ហ្មងនឹងណា៎! បើបញ្ជាចឹង មានតែនាយករដ្ឋមន្រ្តីបានដឹងហើយថាក្រុមហ៊ុន TTY នឹងខុបខឹតលាក់ជន់ល្មើស???

គ្រាន់តែឆ្ងល់!!!!