តំណាងរាស្ត្របក្ស សម រង្ស៊ីម្នាក់ទៀតត្រូវព្យួរអភ័យឯកសិទ្ធិ
គណៈកម្មាធិការអចិន្ត្រៃយ៍រដ្ឋសភាបានសម្រេចព្យួរអភ័យឯកសិទ្ធិអ្នកតំណាងរាស្ត្រគណបក្សសម រង្ស៊ី គឺលោកចាន់ ចេង នៅថ្ងៃព្រហស្បតិ៍ទី១៥ធ្នូនេះ។ ការសម្រេចព្យួរអភ័យឯកសិទ្ធិសភាតំណាងរាស្ត្រគណបក្សសម រង្ស៊ី មណ្ឌលខេត្តកណ្តាល ត្រូវធ្វើឡើង ដើម្បីបើកផ្លូវអោយតុលាការដំណើរការនីតិវិធីប្រឆាំងអ្នកតំណាងរាស្ត្ររូបនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣២
អភ័យឯកសិទ្ធិរបស់លោកចាន់ ចេង អ្នកតំណាងរាស្ត្រមណ្ឌលកណ្តាលមកពីគណបក្សសម រង្ស៊ីត្រូវបានគណៈកម្មាធិការអចិន្ត្រៃយ៍នៃរដ្ឋសភាសម្រេចព្យួរ នៅថ្ងៃព្រហស្បតិ៍ទី១៥ធ្នូនេះ។ ការសម្រេចព្យួរអភ័យឯកសិទ្ធិត្រូវបានធ្វើឡើងតាមសំណើរបស់រដ្ឋមន្ត្រីក្រសួងយុត្តិធម៌។ រដ្ឋមន្ត្រីក្រសួងយុត្តិធម៌លោកអង្គ វង្សវឌ្ឍនាដែលបានបញ្ជាក់នៅក្នុងលិខិតផ្ញើទៅប្រធានរដ្ឋសភាថា គឺដើម្បីបើកផ្លូវអោយតុលាការអាចដំណើការនីតិវិធីច្បាប់ចំពោះអ្នកតំណាងរាស្ត្ររូបនេះ។
លោកចាន់ ចេងអ្នកតំណាងរាស្ត្ររបស់គណបក្សសម រង្ស៊ីត្រូវបានតុលាការខេត្តកណ្តាលដាក់ការសង្ស័យថាបានផ្តល់មធ្យោបាយអោយជនត្រូវចោទម្នាក់ឈ្មោះមាស ប៉េង។ លោកមាស ប៉េងគឺជាជំទប់ទី២ ឃុំបន្ទាយដែក ខេត្តកណ្តាលដែលត្រូវតុលាការចោទប្រកាន់ហើយត្រូវកោះហៅសួរដេញដោល ក្នុងករណីហឹង្សាទៅលើម្ចាស់កាន់កាប់អចលនទ្រព្យម្នាក់។
ក្រោយការសួរដេញដោលនោះ ជំទប់ទី២ឃុំបន្ទាយដែកត្រូវនាំខ្លួនទៅឃុំឃាំងបណ្តោះអាសន្ន។ ប៉ុន្តែ មេធាវីបានថ្លែងថា ការសម្រេចឃុំខ្លួននេះធ្វើឡើងដោយគ្មានដីការត្រឹមត្រូវហើយមេធាវីក៏បានស្នើអោយលោកចាន់ ចេងអ្នកតំណាងរាស្ត្រដែលតាមដានការសួរដេញដោលសកម្មជនគណបក្សសម រង្ស៊ី ជូនលោកជំទប់ទី២ត្រឡប់មកផ្ទះ។ បញ្ហានៅត្រង់នេះហើយ។ តុលាការខេត្តកណ្តាលបានចោទប្រកាន់លោកចាន់ ចេងថា ផ្តល់មធ្យោបាយអោយជនជាប់ឃុំដើម្បីរត់គេចខ្លួន។
ប៉ុន្តែលោកចាន់ ចេង និងមេធាវីរបស់ជំទប់ទី២វិញបានចោទប្រកាន់ចៅក្រមស៊ើបសួរគឺលោកលឹម សុគន្ថា ថា បានរំលោភលើវិជ្ជាជីវៈចៅក្រមរបស់ខ្លួន ដូចជាបង្គាប់ការឃុំខ្លួនដោយគ្មានដីកា និងថា បានធ្វើដីកាតាមក្រោយ បន្ទាប់ពីបង្គាប់អោយឃុំខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ