រដ្ឋាភិបាលពន្យាការបង់ពន្ធអចលនទ្រព្យម្តងទៀតដល់ចុងខែធ្នូ
ក្រសួងសេដ្ឋកិច្ចបានសម្រេចពន្យាពេលបង់ពន្ធលើអចលនទ្រព្យជាលើកទី២ដើម្បីសម្រួលអោយមានកំណើននៃការបង់ពន្ធលើអចលនទ្រព្យនេះ។ ការពន្យាពេលយ៉ាងដូច្នេះ ត្រូវបានក្រសួងសេដ្ឋកិច្ចពន្យល់ថា ដោយសារម្ចាស់អចលនទ្រព្យបានមកបង់ពន្ធយ៉ាងសស្រាក់សស្រាំ ខណៈដែលចំនួនមន្ត្រីពន្ធដានៅមានកម្រិតមិនអាចឆ្លើយតបតាមតម្រូវការទាន់ពេលវេលារបស់ម្ចាស់អចលនទ្រព្យ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៦
ក្រសួងសេដ្ឋកិច្ចបានប្រកាសពន្យាពេលការបង់ពន្ធលើអចលនទ្រព្យម្តងទៀតរហូតដល់ថ្ងៃទី៣១ខែធ្នូ។ នេះគឺជាពន្យាពេលជាលើកទី២ បន្ទាប់ពីក្រសួងសេដ្ឋកិច្ចបានប្រកាសពន្យាពេលនេះម្តងរួចហើយថាការបញ្ចប់ការបង់ពន្ធនឹងត្រូវចប់នៅចុងខែវិច្ឆិកានេះ។
ការសម្រេចពន្យាការបង់ពន្ធនៅពេលនេះត្រូវបានក្រសួងសេដ្ឋកិច្ចពន្យល់ថា ដោយសារចំនួនមន្ត្រីពន្ធដារបស់ខ្លួនមិនមានច្រើនគ្រប់គ្រាន់សម្រាប់ទទួល និងផ្តល់សេវាអោយទាន់ពេលវេលាដល់ម្ចាស់អចលនទ្រព្យដ៏ច្រើនដែលបាននិងកំពុងមកបង់ពន្ធ។
លើសពីនេះទៀត យោងតាមសេចក្តីប្រកាសព័ត៌មានរបស់ក្រសួងសេដ្ឋកិច្ចដដែល ក្រៅពីថ្ងៃធ្វើការធម្មតា សាខាពន្ធដាខេត្ត-ខណ្ឌទាំងអស់ នឹងទទួលការចុះបញ្ជីការដាក់លិខិតប្រកាសពន្ធ និងការបង់ពន្ធលើអចលនទ្រព្យ នៅរៀងរាល់ថ្ងៃសៅរ៍ និងថ្ងៃអាទិត្យបន្ថែមទៀតដែរ។
គួរបញ្ជាក់ថា ពន្ធលើអចលនទ្រព្យគឺជាពន្ធថ្មីមួយនៅកម្ពុជា។ ពីដំបូងឡើយប្រជាពលរដ្ឋមិនបានយល់ និងចូលរួមអនុវត្តកាតព្វកិច្ចនេះឡើយ រហូតដល់លោកនាយករដ្ឋមន្ត្រីបានណែនាំអោយក្រសួងសេដ្ឋកិច្ចរៀបចំវេទិកាពន្យល់អំពីនីតិវិធីនៃការបង់ពន្ធនិងជំរុញអោយពលរដ្ឋអនុវត្តកាតព្វកិច្ចនេះទៀតផង។
តម្លៃនៃការបង់ពន្ធត្រូវអនុលោមតាមតម្លៃលក់ដូរអចលនទ្រព្យនៅតាមតំបន់នីមួយៗ។ ការកំណត់តម្លៃលក់ដូរអចលនទ្រព្យដែលវាយតម្លៃដោយរដ្ឋ ពេលខ្លះហាក់មិនសមស្រប។ ប្រការនេះក៏បានក្លាយជាការរារាំងមួយសម្រាប់ម្ចាស់អចលនទ្រព្យមួយចំនួនមិនចង់ទៅបង់ពន្ធថ្មីមួយនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ