អាស៊ានរំលេចខ្លួនលើឆាកអន្តរជាតិ នៅពេលវិបត្តិសេដ្ឋកិច្ចវាយលុកអាស៊ី
ចុះផ្សាយនៅថ្ងៃ៖
ស្តាប់ - ០៤:១៦
ប្រទេសសមាជិកសមាគមប្រជាជាតិអាស៊ីប៉ែកអគ្នេយ៍ហៅកាត់ថាអាស៊ានទាំង១០ប្រទេស បាននាំគ្នាបង្ហូតទង់ជាតិអាស៊ាននៅក្នុងប្រទេសរៀងៗខ្លួន និងនៅទីណាដែលមានទីស្នាក់ការតំណាងសមាគមនេះ។ ការបង្ហូតទង់ជាតិអាស៊ានដែលបានធ្វើឡើងព្រមៗគ្នាកាលពីថ្ងៃចន្ទ ទី៨ សីហាត្រូវគេពន្យល់ថា ដើម្បីអបអរសាទរខួប៤៤ឆ្នាំនៃថ្ងៃបង្កើតសមាគមនេះ។ ក៏ប៉ុន្តែ អត្ថន័យពិតប្រាកដរបស់វា គឺសមាគមអាស៊ានកំពុងខិតខំរំលេចខ្លួននៅក្នុងឆាកអន្តរជាតិ។ ប៉ុន្តែ កិច្ចខិតខំប្រឹងប្រែងរបស់អាស៊ានបានកើតឡើង ចំពេលដែលទ្វីបអាស៊ីទាំងមូលកំពុងរងការបោកបក់ដោយចំហាយនៃវិបត្តិបំណុលអាមេរិក និងអឺរ៉ុប។
ចាប់តាំងពីថ្ងៃចន្ទមកម៉្លេះ ទង់ជាតិរបស់អាស៊ានត្រូវបានបង្ហូតឡើង និងបក់រវិចៗនៅក្បែរទន្ទឹមនឹងទង់ជាតិរបស់បណ្តាប្រទេសប្រជាជាតិអាស៊ីអាគ្នេយ៍ទាំង១០ នៅគ្រប់ទីស្តីការក្រសួងការបរទេស។ ពិធីបង្ហូតទង់ជាតិអាស៊ានត្រូវបានគេប្រារព្ធធ្វើឡើងព្រមៗគ្នាកាលពីថ្ងៃចន្ទទី៨សីហាក្នុងបណ្តាប្រទេសអាស៊ាន ក៏ដូចជានៅកន្លែងផ្សេងទៀតក្នុងពិភពលោកដែលមានការិយាល័យតំណាងអាស៊ានតាំងនៅ។
ការបង្ហូតទង់ជាតិអាស៊ាននេះ ត្រូវគេពន្យល់ថាដើម្បីសាទរខួបលើកទី៤៤ ថ្ងៃបង្កើតសមាគមអាស៊ានក៏ដូចជាដើម្បីឈានទៅបង្កើតសហគមន៍អាស៊ានតែមួយនៅឆ្នាំ២០១៥។ សម្រាប់ប្រទេសកម្ពុជា លោកប្រមុខការទូតហោ ណាំហុង បានហៅការបង្ហូតទង់ជាតិអាស៊ានលើទឹកដីរបស់ខ្លួនថា ជាព្រឹត្តិការណ៍ប្រវត្តិសាស្ត្រពីព្រោះថានេះជាលើកទី១ហើយដែលកម្ពុជាប្រារព្ធពិធីនេះ។ ជាទិដ្ឋភាពរួម គេអាចមើលឃើញទង់ជាតិរបស់អាស៊ានបក់រវិចៗមិនត្រឹមតែនៅក្នុងរង្វង់សមាគមរបស់ខ្លួនប៉ុណ្ណោះទេ តែវត្តមានរបស់អាស៊ានក៏មាននៅក្នុងទីតាំងជាច្រើនទៀតនៅទូទាំងពិភពលោក។ នេះសបញ្ជាក់ឲ្យឃើញថា សមាគមអាស៊ានកំពុងតែខិតខំពង្រីកឥទ្ធិពលរបស់ខ្លួននៅលើឆាកអន្តរជាតិ។
សម្រាប់ក្រុមអ្នកវិភាគព្រឹត្តិការណ៍អាស៊ី វាជាការចាំបាច់ណាស់ដែលអាស៊ានត្រូវបង្ហាញឥទ្ធិពលរបស់ខ្លួនក្នុងនាមជាសមាគមប្រជាជាតិដ៏ចំណាស់មួយនៅអាស៊ីពីព្រោះថា អាស៊ាន រហូតមកទល់ពេលនេះមិនទាន់បានបង្ហាញពីភាពខ្លាំងរបស់ខ្លួនឲ្យគេឃើញនៅឡើយទេ ផ្ទុយទៅវិញ សមាគមនេះមានតែបញ្ហាចាក់ស្រែះពិបាកដោះស្រាយៈ ភាពខុសគ្នានៃពណ៌សម្បុរនយោបាយ និងគម្លាតគ្នាយ៉ាងឆ្ងាយនៃសេដ្ឋកិច្ចរវាងបណ្តាប្រទេសសមាជិក ព្រមទាំងជម្លោះស្មុគស្មាញនៃបញ្ហាព្រំដែនដូចជាជម្លោះកម្ពុជា-ថៃ និងជម្លោះក្នុងដែនសមុទ្រចិនខាងត្បូង។ល។ និង។ល។ សុទ្ធតែជាចំណុចក្តៅដែលគំរាមកំហែងយ៉ាងខ្លាំងដល់សន្តិសុខក្នុងតំបន់។ ដើម្បីលុបបំបាត់រូបភាពទាំងនេះ អាស៊ានមានទស្សនវិស័យប្រកបដោយភាពវិជ្ជមានមួយ នោះគឺការបង្កើតសហគមន៍អាស៊ានប្រកបដោយភាពសុខដុមរមនាមួយឲ្យបាននៅឆ្នាំ២០១៥។ ការបង្ហូតទង់ជាតិអាស៊ាននៅពេលនេះក៏ស្ថិតនៅក្នុងបរិបទនៃកិច្ចខិតខំប្រឹងប្រែងនេះដែរ។
ប៉ុន្តែ អស់ពីបញ្ហាមួយ ឈានដល់បញ្ហាមួយទៀត។ នៅពេលដែលពន្លឺក្តីសង្ឃឹមអំពីដំណោះ ស្រាយជម្លោះព្រំដែនកម្ពុជាថៃបានចាំងស្រមោលឡើងក្រោយពេលដែលប្រទេសថៃមាននាយករដ្ឋមន្ត្រីថ្មី ទ្វីបអាស៊ីទាំងមូលក្នុងនោះក៏មានសមាគមអាស៊ានផងដែរកំពុងជ្រួលច្របល់អំពីវិបត្តិសេដ្ឋកិច្ចថ្មីដែលកើតចេញពីចំហាយនៃវិបត្តិបំណុលអាមេរិក និងអឺរ៉ុប។ វិបត្តិថ្មីនេះអាចនឹងធ្វើឲ្យគោលនយោបាយរបស់អាស៊ានជួបនឹងការខកបំណងជាថ្មី។ អ៊ីចឹងហើយបានជា រដ្ឋមន្ត្រីពាណិជ្ជកម្មអាស៊ានទាំង១០ប្រញាប់ប្រញាល់រកមធ្យោបាយទប់ស្កាត់។ ពួកគេគ្រោងជួបប្រជុំគ្នាក្នុងសប្តាហ៍នេះនៅក្នុងប្រទេសឥណ្ឌូនេស៊ី។ គោលដៅសំខាន់នៃជំនួបនោះគឺពន្លឿនផែនការមួយចំនួនសម្រាប់ការធ្វើសមាហរណកម្មអាស៊ានឆ្នាំ២០១៥។ អ្វីដែលអាស៊ានកំពុងខិតខំធ្វើគឺ ការលុបចោលពន្ធអាករ និងឧបសគ្គពាណិជ្ជកម្មទាំងឡាយ ការព្យាយាមប្រើប្រាស់ទិដ្ឋាការរួម និងការតភ្ជាប់បណ្តាញផ្លូវគមនាគមន៍ក្នុងតំបន់។
គួរបញ្ជាក់ថា សមាគមអាស៊ានដែលមានចំណាស់៤៤ឆ្នាំមួយនេះ មានប្រជាជនជាង៦០០លាននាក់ មានផលិតផលក្នុងស្រុកសរុបចំនួន ១ ៥០០ពាន់លានដុល្លារ និងជាតំបន់ដែលសម្បូរបែបដោយវត្ថុធាតុដើម ធនធានធម្មជាតិ និងមានកម្លាំងពលកម្មថោកទៀតផង។ ទាំងនេះជាអំណោយផលដែលជំរុញឲ្យអាស៊ានមានមហិច្ឆតាចង់សម្រេចគោលដៅរបស់ខ្លួនក្នុងការក្លាយជាសមាគមដ៏មានឥទ្ធិពលមួយនៅក្នុងលោក។ សមាគមនេះបានខិតខំប្រឹងប្រែងយ៉ាងខ្លាំងដើម្បីសម្រេចគោលដៅរបស់ខ្លួនក្នុងរយៈពេលចុងក្រោយនេះ។
ប៉ុន្តែ តើវិបត្តិថ្មីនឹងមានឥទ្ធិពលប៉ុណ្ណាទៅលើគោលដៅរបស់អាស៊ាន? ចម្លើយគឺវាអាស្រ័យលើទំហំនៃវិបត្តិ និងសមត្ថភាពទប់ទល់របស់សមាគមអាស៊ានទាំងមូល។ អ្វីដែលគួរឲ្យព្រួយបារម្ភនៅពេលនេះ គឺពីពេលនេះ ទៅឆ្នាំ២០១៥ នៅមិនយូរឡើយ។ ម្យ៉ាងទៀត ប្រសិនបើព្យុះវិបត្តិសេដ្ឋកិច្ចថ្មីបោកបក់មកលើអាស៊ានទៀត មានសង្ឃឹមតិចណាស់ ដែលអាស៊ានអាចសម្រេចគោលដៅរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ