សកម្មជនការពារអ្នកក្រីក្រទាមទារអោយរដ្ឋាភិបាលបញ្ចុះតម្លៃទំនិញ
សកម្មជនការពារអ្នកមានប្រាក់ចំណូលតិចតួចទាមទារអោយរដ្ឋាភិបាលបញ្ចុះតម្លៃទំនិញនៅលើទីផ្សារ។ ការទាមទារនេះបានធ្វើឡើងចំពេលដែលទំនិញនៅលើទីផ្សារបន្តឡើងថ្លៃគ្មានទីបញ្ចប់។ ប៉ុន្តែ តំណាងរាជរដ្ឋាភិបាលបានបញ្ជាក់តបវិញថា រដ្ឋាភិបាលបាននិងកំពុងគិតគូរលើបញ្ហានេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៧
កម្មករនិយោជិតជាច្រើនរយនាក់គ្រោងនឹងជួបជុំគ្នានៅថ្ងៃស្អែកដើម្បីទាមទារអោយរដ្ឋាភិបាលបញ្ចុះតម្លៃទំនិញនៅលើផ្សារដែលបន្តឡើងថ្លៃគ្មានទីបញ្ចប់។
លោក សាត់ ឈាងហួរ ប្រធានសហភាពជាតិកម្ពុជាការពារកម្មករបានថ្លែងអោយដឹងតាមទូរស័ព្ទនៅថ្ងៃសៅរ៍នេះថា សមាជិករបស់លោកចំនួនប្រមាណជា៥០០នាក់នឹងជួបជុំគ្នានៅព្រឹកថ្ងៃអាទិត្យស្អែកនៅទីលានប្រជាធិបតេយ្យក្បែររមណីយដ្ឋានវត្តភ្នំ។
សមាគមគ្រោងនឹងទាមទារអោយបញ្ចុះតម្លៃទំនិញជាទូទៅប៉ុន្តែអ្វីដែលសមាគមទាមទារអោយចុះជាបន្ទាន់និងចាំបាច់បំផុតនោះគឺតម្លៃប្រេងសាំង។ ប្រេងសាំងឡើងថ្លៃគឺជាដើមចមដែលទាញអោយតម្លៃទំនិញផ្សេងទៀតឡើងថ្លៃតាម។ ស្ត្រីមេផ្ទះជាច្រើននាក់បានរអ៊ូរទាំថា ទំនិញហូបចុកប្រចាំថ្ងៃដូចជា៖ត្រី សាច់មាន់ សាច់គោនិងបន្លែមានការឡើងថ្លៃយ៉ាងខ្លាំង។
លោក សាត់ ឈាងហួរ ប្រធានសហភាពជាតិកម្ពុជាការពារកម្មករបានបន្ថែមទៀតថា ប្រាក់ចំណូលរបស់កម្មករនាពេលបច្ចុប្បន្នមិនមានតុល្យភាពនិងការចំណាយទេពីព្រោះតម្លៃជួលផ្ទះស្នាក់នៅឡើងថ្លៃ តម្លៃម្ហូបអាហារឡើងថ្លៃនិងតម្លៃធ្វើដំណើរឡើងថ្លៃ។
ឆ្លើយតបទៅនឹងការទាមទារនេះ លោក កែវ រ៉េមី ប្រធានក្រុមអ្នកនាំពាក្យនៃអង្គភាពប្រតិកម្មរហ័សនៃទីស្តីការគណៈរដ្ឋមន្ត្រីបានបញ្ជាក់នៅថ្ងៃសៅរ៍នេះថា រាជរដ្ឋាភិបាលបានព្យាយាមគ្រប់គ្រងស្ថានភាពអតិផរណាតម្លៃទំនិញហើយប៉ុន្តែតម្លៃប្រេងដែលផលិតដោយប្រទេសអារ៉ាប់បានបន្តឡើងថ្លៃគ្មានឈប់ឈរ។ កត្តាខាងក្រៅនេះបានជះឥទ្ធិពលតិចឬច្រើនមកលើសេដ្ឋកិច្ចនៃប្រទេសកម្ពុជា។
បើទោះបីជាយ៉ាងនេះក្តី លោក កែវ រ៉េមី បានពន្យល់ថា រាជរដ្ឋាភិបាលមិនឈរអោបដៃនៅស្ងៀមនោះទេ។ នាពេលកន្លងមក រដ្ឋាភិបាលបានប្រឹងប្រែងដំឡើងប្រាក់ខែជូនកម្មករនិងជូនគ្រូបង្រៀនស្របតាមគោលនយោបាយរបស់រដ្ឋ។ លោក កែវ រ៉េមី បានបន្តទៀតថា រដ្ឋាភិបាលយល់ច្បាស់ពីសុខទុក្ខរបស់ប្រជាជននិងពីផលប៉ះពាល់ធ្លាក់មកលើពួកគេ។
សូមបញ្ជាក់ថា ក្រោយពីមានវិបត្តិសេដ្ឋកិច្ចនៅឆ្នាំ២០០៩រួចមក ប្រទេសកម្ពុជាទទួលបានកំណើនសេដ្ឋកិច្ចល្អឡើងវិញនៅឆ្នាំ២០១០ឆ្នាំ២០១១និងឆ្នាំ២០១២។ កំណើនសេដ្ឋកិច្ចកើនឡើងវិញមែនប៉ុន្តែអត្រាអតិផរណាតម្លៃទំនិញក៏ទំនងជាចាប់ផ្ដើមកើនឡើងដែរ។
ការកើនឡើងតម្លៃទំនិញនឹងដាក់សម្ពាធកាន់តែខ្លាំងដល់អ្នកទទួលបានប្រាក់ចំណូលទាប។ ប្រទេសកម្ពុជានៅមានប្រជាជន៣០ភាគរយកំពុងរស់នៅក្រោមបន្ទាត់ភាពក្រីក្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ