Delicious
Digg
Facebook
Twitter
Yahoo!
Technorati
កម្ពុជា -
អត្ថបទចុះផ្សាយនៅថ្ងៃ ព្រហស្បតិ៍ 20 មករា 2011 -
ព័ត៌មានទើបកែប្រើលើកចុងក្រោយ ថ្ងៃ ព្រហស្បតិ៍ 20 មករា 2011
នាយករដ្ឋមន្ត្រី គម្រាមកុំឲ្យក្រុមប្រឆាំង បះបោរដូចនៅប្រទេសទុយនីស៊ី
លោក ហ៊ុន សែន នាយករដ្ឋមន្ត្រីកម្ពុជា បានធ្វើការព្រមានមិនឲ្យក្រុមអ្នកប្រឆាំង ធ្វើការបះបោរដូចនៅប្រទេសទុយនីស៊ីឡើយ។
© សុវណ្ណារ៉ា
នៅថ្ងៃព្រហស្បតិ៍នេះ លោកនាយករដ្ឋមន្ត្រី ហ៊ុន សែន ដែលបានឡើងកាន់តំណែង ២៦ ឆ្នាំមកហើយ បានធ្វើការព្រមានជាថ្មី ដោយមិនឲ្យក្រុមអ្នកប្រឆាំង ធ្វើការបះបោរ ដូចនៅប្រទេសទុយនីស៊ីឡើយ។ ប្រទេសទុយនីស៊ី នៅអាហ្វ្រិកខាងជើង កំពុងកើតមានកុប្បកម្ម បង្កដោយកម្លាំងប្រជាជន ដើម្បីបណ្តេញលោក បិន អាលី ដែលកាន់អំណាច ២៣ ឆ្នាំមកហើយ ចេញពីតំណែងប្រធានាធិបតី។ ក្នុងពិធីសម្ពោធអាគារមន្ទីរពេទ្យខេត្តកំពង់ចាម នៅព្រឹកមិញ លោកនាយករដ្ឋមន្ត្រី ហ៊ុន សែន ក៏បានបញ្ជាក់ថា គណបក្សប្រឆាំង ចុះខ្សោយ ឬខ្លាំង គឺមិនចំណុះលើរូបលោកឡើយ។
|
ឆ្លើយតបទៅនឹងការលើកឡើងដែលថា កម្ពុជាគួរមើលគំរូនៃការធ្វើមហាបាតុកម្ម ក្នុងប្រទេសទុយនីស៊ី ដែលបានបណ្តេញប្រធានាធិបតីចេញពីអំណាច នៅថ្ងៃព្រហស្បតិ៍នេះ លោកនាយករដ្ឋមន្ត្រី ហ៊ុន សែន បានព្រមានទុកជាមុនថា បើចង់យកប្រធានបទនៅប្រទេសទុយនីស៊ី មកធ្វើនៅកម្ពុជា ដើម្បីបះបោរបណ្តេញប្រមុខដឹកនាំប្រទេស នោះលោកនឹងចាត់វិធានការក្តៅ ដើម្បីបង្ក្រាបយ៉ាងចាស់ដៃជាមិនខាន។
វិធានការបង្ក្រាប ត្រូវបានលោកនាយករដ្ឋមន្ត្រី ហ៊ុន សែន ដែលបានឡើងកាន់តំណែងជានាយករដ្ឋមន្ត្រី ចាប់តាំងពីថ្ងៃ១៤មករា ឆ្នាំ១៩៨៥ អះអាងថា ដើម្បីការពាររដ្ឋធម្មនុញ្ញ ក្នុងនាមជានាយករដ្ឋមន្ត្រី ដែលជ្រើសតាំងដោយការបោះឆ្នោត។
ប្រតិកម្មរបស់លោកនាយករដ្ឋមន្ត្រីយ៉ាងដូច្នេះ បានធ្វើឡើងក្នុងពិធីសម្ពោធអាគារមន្ទីរពេទ្យខេត្តកំពង់ចាម នៅព្រឹកថ្ងៃ២០មករានេះ។
មួយវិញទៀត លោកនាយករដ្ឋមន្ត្រី ហ៊ុន សែន បានលើកឡើងថា គណបក្សប្រឆាំង ដែលចុះខ្សោយសព្វថ្ងៃ មិនមែនមកពីរូបលោក ឬគណបក្សប្រជាជនទេ ប៉ុន្តែមកពីការដឹកនាំរបស់គណបក្សប្រឆាំងខ្លួនឯង។ តាមលោកនាយករដ្ឋមន្ត្រី លោកនឹងមិនត្រឹមតែធ្វើឲ្យគណបក្សប្រឆាំងនៅកម្ពុជាចុះខ្សោយប៉ុណ្ណោះទេ ប៉ុន្តែលោកក៏នឹងធ្វើឱ្យបក្សប្រឆាំងងាប់តែម្តង។
ប្រតិកម្មរបស់លោកនាយករដ្ឋមន្ត្រីដូច្នេះ បានសំដៅលើអ្នករិះគន់មួយចំនួន ជាពិសេសការរិះគន់របស់លោក ប្រេដ អាដាម នាយកអង្គការឃ្លាំមើលសិទ្ធិមនុស្សប្រចាំអាស៊ីប៉ាស៊ីហ្វិក ដែលអះអាងថា លោកនាយករដ្ឋមន្ត្រី បានប្រើវិធីបំបែក ដើម្បីគ្រប់គ្រងអំណាច និងធ្វើឲ្យបក្សប្រឆាំងចុះខ្សោយ។ រីឯអ្នកវិភាគនយោបាយខ្លះ ក៏បានលើកឡើងពីព្រឹត្តិការណ៍បះបោរ នៅប្រទេសទុយនីស៊ីសព្វថ្ងៃ ដែលបានបណ្តេញប្រធានាធិបតី កាន់អំណាចជាង ២៣ ឆ្នាំ ចេញពីតំណែង នាំឲ្យប្រទេសធ្លាក់ក្នុងវិបត្តិសង្គ្រាមស៊ីវិល។
យ៉ាងណាក៏ដោយ លោកនាយករដ្ឋមន្ត្រី បានបញ្ជាក់ថា ក្នុងការបោះឆ្នោត នៅឆ្នាំ២០១៣ ខាងមុខ បើសិនជាគណបក្សប្រជាជនកម្ពុជារបស់លោកចាញ់ឆ្នោត លោកនឹងចុះពីតំណែង និងប្រគល់អំណាចដល់គណបក្សឈ្នះឆ្នោត ដោយសន្តិវិធី៕
ស្តាប់ការផ្សាយមុនៗ
សេវា វិទ្យុបារាំងអន្តរជាតិ
អត្ថបទដែលពេញនិយមជាងគេ
