បិទប្លុក ki-media មិនឲ្យមើលឃើញនៅកម្ពុជា
នៅថ្ងៃពុធនេះ អ្នកប្រើប្រាស់អ៊ិនថឺណេតនៅកម្ពុជា មិនអាចមើលឃើញគេហទំព័រ ki-media ទៀតឡើយ។ ការបិទខ្ទប់គេហទំព័រ ដែលរិះគន់រដ្ឋាភិបាលនេះ ត្រូវបានអ្នកផ្តល់សេវាអ៊ិនថឺណេត អះអាងថា ជាបទបញ្ជារបស់ក្រសួងមហាផ្ទៃ ដែលបានដាក់ចេញ កាលពីល្ងាចថ្ងៃទី១៨មករាម្សិលមិញ។ ចំណែកមន្ត្រីរដ្ឋាភិបាល បានបដិសេធថា រដ្ឋាភិបាលកម្ពុជា មិនមានគោលការណ៍ បិទ ឬក៏ប្លុក មិនឲ្យអ្នកប្រើប្រាស់អ៊ិនថឺណេត មើលឃើញនូវគេហទំព័រ ki-media នោះឡើយ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ លី ម៉េងហូរពីភ្នំពេញ
បុគ្គលិកអ្នកផ្តល់ព័ត៌មានរបស់ក្រុមហ៊ុនផ្តល់សេវាអ៊ិនថឺណេត EZECOM បានថ្លែងនៅរសៀលថ្ងៃ១៩មករានេះថា ក្រសួងមហាផ្ទៃ បានប្រាប់មកខាងក្រុមហ៊ុន ឲ្យបិទ ( ប្លុក ) ចំពោះរាល់គេហទំព័រអ៊ិនថឺណេតទាំងឡាយណា ដែលមានអាសយដ្ឋាន blogspot។ ក្នុងនោះ ក៏មានវេបសាយ ki-media ផងដែរ។
blogspot ជាប្រព័ន្ធអ៊ិនថឺណេត ដែលអាចឲ្យមហាជនទូទៅ បង្កើតវេបសាយផ្ទាល់ខ្លួន ដោយឥតគិតថ្លៃ។ មួយវិញទៀត ការប្លុក មិនឲ្យមើលឃើញនូវវេបសាយ blogspot ជាពិសេសគេហទំព័រ ki-media នាពេលនេះ នាំឲ្យមហាជនរិះគន់ថា ជាការរារាំងនូវសិទ្ធិសេរីភាពក្នុងការបញ្ចេញមតិ និងទទួលព័ត៌មាន ហើយរដ្ឋាភិបាលគួរតែបិទតែគេហទំព័រ ki-media មួយបានហើយ ប្រសិនបើគេហទំព័រនោះ មានកំហុសឆ្គង។
យ៉ាងណាក៏ដោយ រដ្ឋមន្ត្រីក្រសួងព័ត៌មាន និងរដ្ឋមន្ត្រីក្រសួងប្រៃសណីយ៍ បានបដិសេធថា រដ្ឋាភិបាលមិនមានគោលការណ៍ បិទវេបសាយ ki-media ទេ ខណៈដែលអ្នកប្រើប្រាស់សេវាអ៊ិនថឺណេត របស់ក្រុមហ៊ុន EZECOM និង Metfone មិនអាចចូលមើលគេហទំព័រ ki-media និង blogspot បានទៀតឡើយ កាលពីថ្ងៃទី១៩មករាឆ្នាំ ២០១១។
លោកឧត្តមសេនីយ៍ឯក ខៀវ សុភ័គ អ្នកនាំពាក្យក្រសួងមហាផ្ទៃ បានបដិសេធមិនធ្វើអត្ថាធិប្បាយអ្វីឡើយ ជុំវិញបទបញ្ជាឲ្យបិទរាំងខ្ទប់គេហទំព័រ ki-media។
ចំណែកលោក ខៀវ កាញារីទ្ធ អ្នកនាំពាក្យរដ្ឋាភិបាល និងជារដ្ឋមន្ត្រីក្រសួងព័ត៌មាន បានថ្លែងយ៉ាងខ្លីថា ក្រសួងព័ត៌មាន មិនមានគោលការណ៍ប្លុកគេហទំព័រ ki-media នោះទេ។
ដោយឡែកនៅក្នុងសន្និសីទកាសែត ស្តីពី លទ្ធផលនៃកិច្ចប្រជុំថ្នាក់រដ្ឋមន្ត្រីទូរគមនាគមន៍ និងព័ត៌មានវិទ្យាអាស៊ាន លើកទី១០ កាលពីរសៀលថ្ងៃទី១៩មករានេះ លោក សូរ ឃុន រដ្ឋមន្ត្រីក្រសួងប្រៃសណីយ៍ និងទូរគមនាគមន៍ បានថ្លែងបដិសេធដោយខ្លីថា រដ្ឋាភិបាលមិនបានបិទគេហទំព័រ ki-media នោះឡើយ។ រីឯការបើកមើលមិនឃើញគេហទំព័រនោះ អាចមកពីបញ្ហាបច្ចេកទេស។
គេហទំព័រ ki-media បានធ្វើការរិះគន់ និងប្រមាថឥតសំចៃ ដល់ប្រមុខថ្នាក់ដឹកនាំប្រទេស។ ថ្មីៗនេះ ki-media ដែលមាននិន្នាការលំអៀងទៅខាងគណបក្សសមរង្ស៊ី បានប្រើពាក្យ ក្បត់ជាតិ ដោយភ្ជាប់ទាំងរូបថតប្រមុខដឹកនាំជាតិ ទាក់ទងនឹងសំណុំរឿងព្រំដែនកម្ពុជា-វៀតណាម។
ការបោះពុម្ពគេហទំព័រ ki-media ក៏នាំឲ្យបុរសបុគ្គលិកអង្គការ WFP លោក សេង គុណការ ត្រូវតុលាការផ្តន្ទាទោសដាក់ពន្ធនាគារ ៦ ខែ កាលពីថ្ងៃទី១៩ ខែធ្នូ ឆ្នាំ២០១០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ