កម្ពុជារៀបចំខ្លួនក្នុងការចាត់ចែងផលពីធនធានរ៉ែ
បន្ទាប់ពីសន្និសីទ អន្តរជាតិ ស្តីពី ធនធានរ៉ែ រយៈពេលពេលពីរថ្ងៃ ទើបតែបិទបញ្ចប់ នាថ្ងៃទី២៧ ឧសភា, នៅថ្ងៃនេះ វេទិកានិយាយពីប្រធានបទ ធនធានរ៉ែ ត្រូវបានធ្វើឡើងនៅចំពោះមុខសមាជិកសភា។ វេទិកាសភា ដែលរៀបចំដោយអង្គការសហប្រជាជាតិ នៅព្រឹកមិញ ដើម្បីផ្តល់ព័ត៌មានពីស្ថានភាពធនធានរ៉ែ នៅកម្ពុជា និងក៏ដើម្បីជម្រុញឲ្យសមាជិកសភា ចូលរួមតាមដានលើការស្រាវជ្រាវ រុករករ៉ែ ដែលកំពុងដំណើរការ នៅកម្ពុជា ពេលនេះ។
ចុះផ្សាយនៅថ្ងៃ៖
បទអន្តរាគមន៍របស់លី ម៉េងហួរពីទីក្រុងភ្នំពេញ
ការរៀបចំសន្និសីទអន្តរជាតិ និងការរៀបចំវេទិកាសភា រយៈពេលពីរ-បីថ្ងៃជាប់ៗគ្នា ដែលនិយាយពីធនធានរ៉ែ នៅកម្ពុជាពេលនេះ ជាការត្រៀមរៀបចំខ្លួន ក្នុងការចាត់ចែងផលពីធនធានរ៉ែ ដ៏មហាសាលរបស់ប្រទេសកម្ពុជា។
ទាំងរាជរដ្ឋាភិបាលកម្ពុជា និងទាំងអង្គការសហប្រជាជាតិ ដែលបានជួយកម្ពុជា លើការពិភាក្សា និងបង្ហាញបទពិសោធន៍ ពីការគ្រប់គ្រងធនធានធម្មជាតិ និងចាត់ចែងប្រាក់ចំណូល ប្រកបដោយតម្លាភាព កំពុងតែប្រឹងប្រែងគិតគូររួមគ្នា ធ្វើយ៉ាងណា ឲ្យប្រទេសកម្ពុជា ប្រើប្រាស់ការទាញយកផលពីធនធានរ៉ែ ប្រកបដោយពរជ័យ ដើម្បីអភិវឌ្ឍន៍សង្គមកម្ពុជា។
វេទិកាសភា នៅព្រឹកមិញ ក្រៅតែពីចំណាប់អារម្មណ៍សំខាន់ៗ ដើម្បីបង្ហាញដល់ស្ថាប័ននីតិបញ្ញតិ្ត ដែលជាអ្នកតាក់តែងច្បាប់ ស្តីពី ស្ថានភាពធនធានរ៉ែ នៅកម្ពុជា ក៏មានការលើកឡើងលើប្រធានបទ ស្តីពី បរិបទថ្មីៗនៃការរុករករ៉ែ នៅលើពិភពលោក, ហានិភ័យ និងផលតបស្នងនៃការរុករករ៉ែ, កត្តាបរិស្ថាន និងសង្គមនៃការរុករករ៉ែបែបទំនើប ព្រមទាំងបទបង្ហាញពីគំនិតផ្តួចផ្តើម ស្តីពី តម្លាភាពលើឧស្សាហកម្មនីស្សារណកម្ម។ ប្រធានបទសំខាន់ៗទាំងអស់នេះ ត្រូវបានអ្នកជំនាញការបរទេស លើកបង្ហាញជាបន្តបន្ទាប់។
ក្នុងវេទិកាសភា នៅព្រឹកមិញ, លោក ឌូក្លាស ប្រូដឺរិក ( Douglas Broderick ) អ្នកសម្របសម្រួលរបស់អង្គការសហប្រជាជាតិ ប្រចាំប្រទេសកម្ពុជា និងជាប្រធានកម្មវិធីអភិវឌ្ឍន៍អង្គការសហប្រជាជាតិ UNDP បានរម្លឹកពីការប្តេជ្ញារបស់លោកនាយករដ្ឋមន្ត្រី ហ៊ុន សែន លើការអភិវឌ្ឍន៍វិស័យរ៉ែ នៅក្នុងអង្គសន្និសីទអន្តរជាតិ កាលពី២ថ្ងៃមុន។ នោះគឺកិច្ចអភិវឌ្ឍន៍ប្រកបដោយការទទួលខុសត្រូវ ដោយគិតគូរពីផលប៉ះពាល់សង្គម បរិស្ថាន និងសេដ្ឋកិច្ច ព្រមទាំងការតាក់តែងក្របខណ្ឌច្បាប់ ជាដើម។
លោក ប្រូ ដឺរិក បានលើកជាយោបល់ថា អ្នកតំណាងរាស្ត្រ អាចរៀបចំដំណើរទស្សនកិច្ចដ៏ទៀងទាត់ ចុះទៅជួបជាមួយម្ចាស់ឆ្នោតរបស់ខ្លួន នៅតាមកន្លែង ដែលមានសកម្មភាពរុករករ៉ែ។ អ្នកតំណាងរាស្ត្រ ក៏អាចស្តាប់ពីការយល់ឃើញរបស់សហគមន៍ទាំងឡាយនោះ ហើយសិក្សាស្វែងយល់មើល ថាតើមានការគោរពតាមច្បាប់ និងបទប្បញ្ញត្តិ ដែលដាក់ចេញ ឬអត់? អ្នកតំណាងរាស្ត្រ ក៏អាចជម្រុញឲ្យមានការបើកបង្ហាញផ្នែកហិរញ្ញវត្ថុ ឲ្យបានកាន់តែទូលំទូលាយជាងមុនផងដែរ ពាក់ព័ន្ធនឹងរាល់សកម្មភាពទាំងឡាយ ផ្នែកការងាររ៉ែ និងឧស្សាហកម្មនិស្សារណកម្ម។
តាមលោក ប្រូដឺរិក តម្លាភាពកាន់តែទូលំទូលាយ គឺមានអត្ថន័យផ្នែកសេដ្ឋកិច្ច ពីព្រោះវាធ្វើឲ្យវិស័យរ៉ែនៅកម្ពុជា កាន់តែមានភាពទាក់ទាញចំពោះវិនិយោគិនអន្តរជាតិ និងការទទួលបានផលចំណេញផ្នែកសេដ្ឋកិច្ចដ៏ធំធេង សម្រាប់ប្រទេសកម្ពុជា។
ប្រធានរដ្ឋ លោក ហេង សំរិន បានធ្វើការក្រើនរម្លឹកថា ទោះបីជាកម្ពុជាទទួលបាននូវសញ្ញាវិជ្ជមាន ពីដំណើរការអភិវឌ្ឍន៍ និងវិនិយោគលើវិស័យរ៉ែនេះក៏ដោយ ក៏យើងចាំបាច់ត្រូវមានការប្រុងប្រយ័ត្នខ្ពស់ជានិច្ច ចំពោះហានិភ័យណាមួយ ដែលនឹងអាចកើតមានឡើង ដោយចៃដន្យ នៅក្នុងការធ្វើអាជីវកម្មធនធានរ៉ែ ព្រោះថា បទពិសោធន៍ពិភពលោក មានប្រទេសមួយចំនួន ទទួលបាននូវពរជ័យពីការទាញយកផលពីធនធានរ៉ែ ដើម្បីអភិវឌ្ឍន៍សង្គម។ រីឯប្រទេសខ្លះទៀត ក៏ត្រូវទទួលរងបណ្តាសារ ដោយសារការវិនិយោគ និងការធ្វើនិស្សារណកម្មរ៉ែនេះផងដែរ។
ក្នុងវិស័យរ៉ែនេះ លោក ហេង សំរិន បានអះអាងថា រដ្ឋសភាបានចូលរួមចំណែក លើការបង្កើតនូវក្របខណ្ឌច្បាប់ចាំបាច់មួយចំនួន ដូចជា ច្បាប់ស្តីពី ការគ្រប់គ្រង និងធ្វើអាជីវកម្មរ៉ែ និងច្បាប់ស្តីពី ការការពារបរិស្ថាន និងការគ្រប់គ្រងធនធានធម្មជាតិ ជាដើម ដើម្បីគ្រប់គ្រងធនធានរ៉ែ បរិស្ថាន និងធម្មជាតិ ឲ្យប្រកបដោយប្រសិទ្ធភាព និងចីរភាព សំដៅលើកម្ពស់កំណើនសេដ្ឋកិច្ច ឈានទៅកាត់បន្ថយភាពក្រីក្រ ជូនប្រជាពលរដ្ឋកម្ពុជា នាពេលអនាគត។
កម្ពុជា មានសក្តានុពលរ៉ែ ច្រើនប្រភេទ មានជាអាទិ៍ៈ រ៉ែទង់ដែង រ៉ែមាស និងរ៉ែដែក ជាដើម នៅទូទាំងប្រទេស ទាំងដែនទឹក និងដែនគោក សូម្បីតែនៅខេត្តស្វាយរៀង ក៏មានធនធានរ៉ែប្រេងកាតដែរ។ ក៏ប៉ុន្តែគេពុំទាន់វាយតម្លៃថា តើវាមានបរិមាណប៉ុន្មាន ហើយវាអាចមានលក្ខណៈសម្បត្តិគ្រប់គ្រាន់ ដែលអាចធ្វើអាជីវកម្មបានដែរ ឬទេ?
យ៉ាងណាក៏ដោយ ក្នុងវេទិកានៅព្រឹកមិញ លោក តាន់ គឹមវិន រដ្ឋលេខាធិការក្រសួងឧស្សាហម្ម រ៉ែ និងថាមពល បានលើកបញ្ជាក់ថា មកដល់ថ្ងៃនេះ លទ្ធផលនៃការសិក្សាស្រាវជ្រាវរុករករ៉ែរបស់ក្រុមហ៊ុនខ្លះ ក្នុងចំណោមក្រុមហ៊ុនជាង ៦០ ដែលកំពុងរុករករ៉ែនៅកម្ពុជា បានផ្តល់ក្តីសង្ឃឹមថា នឹងអាចធ្វើអាជីវកម្មក្នុងរូបភាពឧស្សាហកម្មនិស្សារណកម្មបាន ដូចជា ក្រុមហ៊ុន OZ Mineral, ក្រុមហ៊ុន Southern Gold ( Cambodia ) Co. Ltd និងក្រុមហ៊ុន Indochine Resources Ltd។ កាលពីពេលថ្មីៗនេះ ក្រុមហ៊ុនអូស្ត្រាលី OZ Mineral បានប្រកាសថា ខ្លួនបានរកឃើញរ៉ែមាស ប្រមាណ ៨,១ លានតោន នៅខេត្តមណ្ឌលគិរី ជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ