ក្រុមយុវជនស្នើរដ្ឋាភិបាលកែប្រែតំបន់អារ៉ែងទៅជាតំបន់អេកូទេសចរណ៍
តំបន់អារ៉ែងនៅក្នុងខេត្តកោះកុង ដែលកំពុងរងការគម្រាមកំហែងពីគម្រោងសាងសង់ទំនប់វារីអគ្គិសនី ត្រូវបានក្រុមយុវជនលើកមកពិភាក្សាគ្នានៅក្នុងសិក្ខាសាលាមួយនៅព្រឹកថ្ងៃ អាទិត្យ ទី៣១ សីហានេះ ដែលរៀបចំដោយសមាគមចលនានិស្សិតបញ្ញវន្តខ្មែរ។ ក្រុមយុវជនបានស្នើដល់រដ្ឋាភិបាលកម្ពុជាលុបចោលគម្រោងសាងសង់ទំនប់វារីអគ្គិសនីនៅក្នុងតំបន់អារ៉ែង និងកែប្រែតំបន់នេះឲ្យទៅជាតំបន់អេកូទេសចរណ៍វិញ។
ចុះផ្សាយនៅថ្ងៃ៖
ស្តាប់ - ០១:៥៥
ដើម្បីឲ្យតំបន់អារ៉ែងរួចផុតពីការបំផ្លាញដោយទំនប់វារីអគ្គិសនីរបស់ក្រុមហ៊ុនចិននោះ ក្រុមយុវជនដែលស្រឡាញ់ធនធានធម្មជាតិ បានស្នើដល់រដ្ឋាភិបាលកម្ពុជាប្រែក្លាយតំបន់នេះឲ្យទៅជាតំបន់អេកូទេសចរណ៍វិញ។
លោក ចារ សីហាក់ ប្រធានសមាគមចលនានិស្សិតបញ្ញវន្តខ្មែរបានលើកឡើងនៅចំពោះមុខក្រុមយុវជន សកម្មជនការពារព្រៃឈើ រួមទាំងព្រះសង្ឃប្រមាណជិត ១០០នាក់ និង អង្គថា ការកែប្រែតំបន់អារ៉ែងឲ្យទៅជាតំបន់អេកូទេសចរណ៍ គឺផ្តល់ផលប្រយោជន៍ច្រើនដល់កម្ពុជា ពិសេសប្រជាពលរដ្ឋដែលកំពុងរស់នៅក្នុងតំបន់នោះ។
លោក ពន្យល់ថា តំបន់អេកូទេសចរណ៍ នឹងជួយការពារធនធានធម្មជាតិ ផ្តល់ការងារដល់ប្រជាពលរដ្ឋ បង្កើនប្រាក់ចំណូល និង ធ្វើឲ្យមានការអភិវឌ្ឈន៍ផ្សេងៗក្នុងតំបន់នោះ។ ផ្ទុយទៅវិញ ប្រសិនបើសាងសង់ទំនប់វារីអគ្គិសនីនៅក្នុងតំបន់អារ៉ែង នោះវានឹងធ្វើហិនហោចតំបន់ព្រៃឈើជាង ២ ម៉ឺនហិកតា សត្វកម្រ ជាង ៣១ ប្រភេទ និង តំបន់ទេសចរណ៍ធម្មជាតិដទៃទៀត។ បន្ថែមលើនេះ ប្រជាពលរដ្ឋដែលកំពុងរស់នៅក្នុងតំបន់នោះ ក៏រងផលប៉ះពាល់ខ្លាំងផងដែរ។
លោកបណ្ឌិត កែម ឡី អ្នកសិក្សាស្រាវជ្រាវសង្គម ដែលបានចូលរួមសិក្ខាសាលានោះ បានគាំទ្រចំពោះសំណើរបស់ក្រុមយុវជននេះ ។ លោក លើកឡើងថា តំបន់អារ៉ែងមានអំណោយផលក្នុងការប្រែក្លាយទៅជាតំបន់អេកូទេសចរណ៍ ព្រោះតំបន់នេះ សម្បូរធនធានធម្មជាតិ និង ធនធានរ៉ែជាដើម។ លោកបញ្ជាក់ថាកម្ពុជាត្រូវការ ថាមពលអគ្គិសនីជាចាំបាច់មែន ប៉ុន្តែការសាងសង់តំបន់វារីអគ្គិសនីនៅក្នុងតំបន់នេះ វាផ្តល់ផលប៉ះពាល់ច្រើន។ លោក កែម ឡី សង្ឈឹមថា រដ្ឋាភិបាលកម្ពុជានឹងពិចារណាសិក្សាបន្ថែមទៀតពីគម្រោងសាងសង់ទំនប់វារីអគ្គិសនីក្នុងតំបន់អារ៉ែងនេះ។
យ៉ាងណាក៏ដោយ ក្រុមយុវជនមិនទាន់បានដាក់សំណើនេះទៅកាន់រដ្ឋាភិបាលនៅឡើយទេ ប៉ុន្តែ លោក ចារ សីហាក់ បានគូសបញ្ជាក់ថា សមាគមរបស់លោកគ្រោងដាក់ញត្តិទៅកាន់រដ្ឋសភានៅពេលឆាប់ៗខាងមុខនេះ ដើម្បីស្នើឲ្យរដ្ឋសភាលុបចោលគម្រោងសាងសង់ទំនប់វារីអគ្គិសនីនៅតំនប់អារ៉ែង និង កែប្រែតំបន់នេះទៅជាតំបន់អេកូទេសចរណ៍វិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ