សមាគមនាវាយុវជនអាស៊ីអាគ្នេយ៍ ស្វែងរកក្រុមគ្រួសារស្ម័គ្រចិត្ត ដើម្បីទទួលប្រតិភូយុវជនអាស៊ាន និងជប៉ុន
សមាគមនាវាយុវជនអាស៊ីអាគ្នេយ៍ នៅព្រឹកថ្ងៃអាទិត្យនេះ បានរៀបចំពិធីជួបជុំមួយជាមួយយុវជន និងក្រុមគ្រួសារស្ម័គ្រចិត្ត ដើម្បីទទួលប្រតិភូយុវជនអាស៊ាន និងជប៉ុន។ ប្រតិភូយុវជនអាស៊ាន និងជប៉ុនជាង៣រយនាក់ ដែលនឹងត្រូវមកធ្វើទស្សនកិច្ចនៅកម្ពុជា នៅពាក់កណ្ដាលខែវិច្ឆិកាខាងមុខ។ ទន្ទឹមគ្នានេះ សមាគមនាវាយុវជនអាស៊ីអាគ្នេយ៍ ក៏បានអំពាវនាវរកក្រុមគ្រួសារស្ម័គ្រចិត្តបន្ថែមទៀតផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៤
សមាគមនាវាយុវជនអាស៊ីអាគ្នេយ៍ អំពាវនាវស្វែងរកក្រុមគ្រួសារស្ម័គ្រចិត្តចំនួន៧០បន្ថែមទៀត ដើម្បីទទួលប្រតិភូយុវជនអាស៊ាន និងជប៉ុន។ ប្រតិភូយុវជនអាស៊ាននិងជប៉ុនជាង៣រយនាក់ ដែលនឹងត្រូវមកធ្វើទស្សនកិច្ចនៅកម្ពុជា នៅពាក់កណ្ដាលខែវិច្ឆិកាខាងមុខ។ ជាដំណើរទស្សនកិច្ច ដែលធ្វើឡើងក្នុងក្របខណ្ឌកម្មវិធីនាវាយុវជនអាស៊ីអាគ្នេយ៍របស់ជប៉ុន។
ក្រៅពីផ្លាស់ប្ដូរបទពិសោធជាមួយយុវជនកម្ពុជា និងជួបសម្ដែងការគួរសមជាមួយថ្នាក់ដឹកនាំសំខាន់ៗនៅកម្ពុជា ប្រតិភូយុវជនអាស៊ាននិងជប៉ុន តម្រូវឲ្យចំណាយពេលពីរយប់ជាមួយក្រុមគ្រួសារកម្ពុជា។ ក្នុងអំឡុងពេលស្នាក់នៅនោះ ក្រុមគ្រួសារដែលស្ម័គ្រចិត្តទទួលយុវជន ត្រូវបានលើកទឹកចិត្តឲ្យផ្សព្វផ្សាយពីប្រពៃណី វប្បធម៌ និងទំនៀមទម្លាប់ខ្មែរដល់ប្រតិភូយុវជន។
លោកស៊្រាង គឹមលី អនុប្រធានទី១នៃសមាគមនាវាយុវជនអាស៊ីអាគ្នេយ៍ មានប្រសាសន៍វិទ្យុបារាំងអន្ដរជាតិនៅថ្ងៃអាទិត្យនេះថា សមាគមត្រូវការក្រុមគ្រួសារចំនួន១៦០ ដើម្បីទទួលប្រតិភូយុវជន។ លោកបន្តថា បច្ចុប្បន្ន មានក្រុមគ្រួសារប្រហែល៩០ប៉ុណ្ណោះ ដែលបានចុះឈ្មោះទទួលប្រតិភូយុវជន។
អនុប្រធានសមាគមរូបនេះ បានអំពាវនាវដល់ក្រុមគ្រួសារខ្មែរដែលមានទីលំនៅនៅភ្នំពេញ ឲ្យចូលរួមទទួលប្រតិភូយុវជនអាស៊ាន និងជប៉ុន។ លោកថា នេះជាព្រឹត្តិការណ៍ប្រវត្តិសាស្ត្រ និងជាលើកទី១ ដែលនាវាយុវជនអាស៊ីអាគ្នេយ៍ចូលមកប្រទសកម្ពុជា។ ហើយក្រុមគ្រួសារដែលស្ម័គ្រចិត្តទទួលប្រតិភូយុវជន នឹងទទួលបានបទពិសោធមួយដែលមិនអាចបំភ្លេចបាន។
សម្រាប់ក្រុមគ្រួសារដែលចាប់អារម្មណ៍ទទួលប្រតិភូយុវជនឲ្យស្នាក់នៅជាមួយ ឬចង់ជ្រាប់ព័ត៌មានបន្ថែម សូមទាក់ទងទៅកាន់សមាគមនាវាយុវជនអាស៊ីអាគ្នេយ៍ តាមរយៈទូរសព្ទលេខ ០៧៧ ៨៤ ៣៣ ៣៨៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ