១៧៧ ដុល្លា៖ សហជីពបន្តដាក់ញត្តិនៅគ្រប់ការិយាល័យក្រុមហ៊ុនបញ្ជាទិញអន្តរជាតិ
បន្ទាប់ពីធ្វើកូដកម្ម និងលើកបដាទាមទារប្រាក់ឈ្នួលអប្បបរមា ១៧៧ដុល្លា នៅតាមបណ្តារោងចក្រនានានៅទូទាំងប្រទេសរួចមក នៅថ្ងៃសុក្រ ទី ១៩ កញ្ញានេះ សហជីពទាំង ៨ បានចាប់ផ្តើមយុទ្ធនាការជាបន្តទៀត ដោយការដាក់ញត្តិនៅតាមបណ្តាស្ថានទូតសំខាន់ៗ និងការិយាល័យតំណាងរបស់ក្រុមហ៊ុនបញ្ជាទិញអន្តរជាតិនៅកម្ពុជា។ នេះជាយុទ្ធនាការជំហានបន្ទាប់ក្នុងចំណោមយុទ្ធនាការទាំង៤ដំណាក់កាលរបស់សហជីព។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
តំណាងសហជីពទាំង ៨ ដែលរួមមានសហជីពរបស់លោក អាត់ ធន់ លោករ៉ុង ឈុន លោកប៉ាវ ស៊ីណា និងអ្នកស្រីយ៉ាង សុភ័ណជាដើមនោះ បានសម្រចថា នឹងបន្តធ្វើយុទ្ធនាការចំនួន ៤ ជាបន្តទៀត ដើម្បីទាមទារឲ្យរដ្ឋាភិបាល និងក្រុមហ៊ុនបញ្ជាទិញអន្តរជាតិសម្រេចផ្តល់ប្រាក់ឈ្នួលអប្បបរមាដល់ កម្មកររោងចក្រកាត់ដេរកម្ពុជាឲ្យបានចំនួន ១៧៧ដុល្លា ក្នុងមួយខែ។
លោកអាត់ ធន់ ប្រធានសហជីពប្រជាធិបតេយ្យកម្មករកាត់ដេរកម្ពុជា ស៊ីខាវឌូ បានបញ្ជាក់ប្រាប់វិទ្យុបារាំងនៅព្រឹកថ្ងៃនេះថា បន្ទាប់ពីប្រជុំពិភាក្សាកាលពីល្ងាចថ្ងៃម្សិលមិញមក សហជីពទាំង ៨ បានសម្រេចថា ទី១ ចាប់ផ្តើមយកញត្តិទាមទារដំឡើងប្រាក់ឈ្នួលឲ្យកម្មករនេះ ទៅដាក់នៅតាមបណ្តាទូតសំខាន់ៗ និងការិយាល័យរបស់ក្រុមហ៊ុនបញ្ជាទិញអន្តរជាតិ ដែលមានដូចជា H&M , C&A, GAP, ADIDAS, LEVIS, ZARA, PUMA, និង WALMARTជាដើម ។
ទី២ បន្តចែកចាយខិតប័ណ្ឌ និងផ្សព្វផ្សាយពីគោលការនៃការទាមទារដំឡើងប្រាក់ឈ្នួលដល់កម្មករ នៅតាមរោងចក្រក្នុងតំបន់ដាច់ស្រយ៉ាលនានា ដែលមានដូចជាខេត្តស្វាយរៀង កំពង់ឆ្នាំង កំពត និងព្រះសីហនុជាដើម។ ទី៣ នៅថ្ងៃទី ២៦ កញ្ញាខាងមុខនេះ សហជីពនឹងចូលរួមប្រជុំកិច្ចពិភាក្សាត្រីភាគីជាបន្តទៀត ដើម្បីជជែកពីបញ្ហាប្រាក់ឈ្នួលនេះ ។ និងទី៤ សហជីពនឹងបន្តពិភាក្សាស្វែងរកដំណោះស្រាយជាបន្តទៀត នៅដើមសប្តាហ៍ទី១ នៃខែតុលាខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ