សហជីពចង់ឲ្យពលករខ្មែរធ្វើការក្នុងស្រុកច្រើនជាងចំណាកស្រុកទៅថៃ
មេដឹកនាំសហជីព ទាំងគាំទ្រនិងមិនគាំទ្ររដ្ឋាភិបាលបានបញ្ចេញប្រតិកម្មតបទៅនឹងការបញ្ជូនពលករខុសច្បាប់ខ្មែរមកប្រទេសកំណើតរបស់ខ្លួនវិញ ថាជាសញ្ញាវិជ្ជមានមួយដែលកម្ពុជាមានធនធានមនុស្សក្នុងការអភិវឌ្ឍន៍សេដ្ឋកិច្ចជាតិ។ ក្រៅពីថ្លែងការណ៍ព្រួយបារម្ភពីសុវត្ថិភាពនៃការចាប់បញ្ជូនពលករខែ្មរដូចទឹកបាក់ទំនប់មកកាន់កម្ពុជា មេដឹកនាំសហជីពក៏បានទទូច ឲ្យរដ្ឋាភិបាលកម្ពុជាជួយដោះស្រាយ រកការងារសមស្របនៅក្នុងប្រទេស។
ចុះផ្សាយនៅថ្ងៃ៖
ស្តាប់ - ០២:០៩
ក្រុមមេដឹកនាំសហជីពបានសម្តែងនូវសុទិដ្ឋិនិយមថា ការវិលត្រលប់របស់ពលករខុសច្បាប់ខ្មែររាប់ម៉ឺននាក់មកប្រទេសកំណើតវិញ គឺជាសញ្ញាល្អមួយ មិនមែនជាសុបិនអាក្រក់ដូចដែលបានគិតនោះទេ។
លោក ជួន មុំថុល ប្រធានសហភាពសហម្ព័ន្ធសហជីពជាតិកម្ពុជាថ្លែងថា ការបញ្ចូនពលករកម្ពុជាខុសច្បាប់មកវិញនាពេលនេះ គឺជាឱកាសមួយដ៏ល្អរបស់កម្ពុជាសម្រាប់អភិវឌ្ឍន៍សេដ្ឋកិច្ចជាតិរបស់ខ្លួន។ លោក ជួន មុំថុល បន្តថាការដែលពួកគេមកធ្វើការនៅក្នុងស្រុកវិញនេះគឺទទួលប្រាក់ខែមិនចាញ់នៅប្រទេសថៃនោះទេ ជាពិសេសលើវិស័យសំណង់ ដែលកម្មករម្នាក់មានចំណូលពី ២៥០០០ទៅ៣០០០០រៀលក្នុងមួយថ្ងៃប្រហាក់ប្រហែលនៅស្រុកថៃដែរ។
លោក អាត់ ធន់ ប្រធានសហភាពការងារកម្ពុជាឲ្យដឹងដែរថា កំលាំងពលកម្មដែលហូរចូលមកស្រុកខ្មែរវិញនាពេលនេះ ជាកំលាំងជំនាញ។ ប្រសិនបើពួកគេនៅនឹង ហើយមិនធ្វើចំណាកស្រុកទៅប្រទេសថៃវិញនោះ គឺកម្ពុជាអាចទាក់ទាញអ្នកវិនិយោគបានច្រើនបន្ថែមទៀតមកបណ្តាក់ទុននៅក្នុងប្រទេស។
ជាមួយគ្នានេះមេសហជីពលោក អាត់ ធន់ បញ្ជាក់ថារដ្ឋាភិបាលត្រូវតែដោះស្រាយនូវ
លក្ខខណ្ឌការងារ ប្រាក់ឈ្នួល និងបរិយាកាសវិនិយោគនៅស្រុកខ្មែរឲ្យបានល្អ បើពុំដូច្នោះទេ
មិនអាចទាក់ទាញអ្នកវិនិយោគបានទេ។
តាមការឲ្យដឹងពីមន្ត្រីសហជីពនានា គ្រាន់តែវិស័យកាត់ដេរមួយប៉ុណ្ណោះ កម្ពុជាត្រូវការកំលាំង
ពលកម្មរហូតទៅដល់កន្លះលាននាក់ឯណោះ ដោយសារកន្លងមកក៏ដូចជាពេលថ្មីៗនេះ មានរោងចក្រជាច្រើនបានប្រកាសជ្រើសរើសកម្មករ ក៏ប៉ុន្តែមិនបានគ្រប់គ្រាន់ឡើយ។
សូមរំម្លឹកថាពលករខ្មែរខុសច្បាប់ដែលធ្វើចំណាកស្រុកទៅធ្វើការនៅប្រទេសថៃត្រូវបាន
មេដឹកនាំរដ្ឋប្រហារយោធាថៃ ចាប់បញ្ជូនឲ្យត្រលប់មកស្រុកខ្មែរវិញចាប់តាំងពីថ្ងៃទី០១ខែ
មិថុនា មកម្ល៉េះ។ រហូតមកដល់ពេលនេះ មានពលករជាង១០ ម៉ឺននាក់ហើយត្រូវថៃដឹកមកប្រទេសខ្មែរវិញ។ ជាមួយគ្នានេះរដ្ឋាភិបាលកម្ពុជាក៏បានរៀបចំរថយន្តយោធាធំៗជាងមួយរយគ្រឿង ចាំទទួលនិងដឹកពលករចំណាកស្រុកនេះទៅកាន់លំនៅឋានរបស់ពួកគេនៅតាមបណ្តាខេត្តនានា ដោយមានជូនដំណឹងពីការផ្តល់សេវាការងារផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ