កម្ពុជា -

អត្ថបទចុះផ្សាយនៅថ្ងៃ អាទិត្យ 28 តុលា 2012 - ព័ត៌មានទើបកែប្រើលើកចុងក្រោយ ថ្ងៃ ចន្ទ 29 តុលា 2012

ក្រោយឆ្នាំ២០២៥ ព្រលានយន្តហោះអន្តរជាតិខ្មែរនឹងស្ថិតនៅក្នុងខេត្តកំពង់ឆ្នាំង

ប្រមុខរដ្ឋាភិបាលយល់ថា ព្រលានយន្តហោះអន្តរជាតិនៅភ្នំពេញបច្ចុប្បន្ននឹងមិនអាចទប់នឹងកំណើនអ្នកទេសចរទៅថ្ងៃអនាគតបាន

ដោយ គី សុខលីម

ក្រោយឆ្នាំ២០២៥ ព្រលានយន្តហោះអន្តរជាតិខ្មែរនឹងស្ថិតនៅក្នុងខេត្តកំពង់ឆ្នាំង។ អាកាសយានដ្ឋានអន្តរជាតិខ្មែរនៅក្នុងខេត្តកំពង់ឆ្នាំងនឹងក្លាយទៅជាព្រលានយន្តហោះសម្រាប់ដឹកអ្នកដំណើរផង ការដឹកជញ្ជូនទំនិញផង និងសម្រាប់ប្រតិបតិ្តការទ័ពអាកាសផង។

សេចក្តីរាយការណ៍របស់ គី សុខលីម ពីភ្នំពេញ

ស្តាប់ (03:17)

28/10/2012

នៅក្នុងអនាគតខាងមុខនេះ ប្រទេសកម្ពុជានឹងបង្កើតអាកាសយានដ្ឋានហោះហើរពីរបន្ថែមទៀត។ អាកាសយានដ្ឋានអន្តរជាតិមួយនឹងត្រូវបង្កើតនៅក្នុងខេត្តកំពង់ឆ្នាំង និងមួយទៀតនៅក្នុងខេត្តសៀមរាប។

លោកនាយករដ្ឋមន្រ្តី ហ៊ុន សែន បានថ្លែងជាធារណៈកាលពីថ្ងៃសៅរ៍មិ្សលមិញ ពីខេត្តកំពង់ឆ្នាំងមកថា៖ «អាកាសយានដ្ឋានអន្តរជាតិខ្មែរនៅត្រូវបង្កើតនៅក្នុងខេត្តកំពង់ឆ្នាំងនៅក្រោយឆ្នាំ២០២៥ ឬឆ្នាំ២០៣០»។

មូលហេតុនៃការបង្កើតព្រលានយន្តហោះអន្តរជាតិថ្មីមួយទៀតពីព្រោះថា នៅពេលអនាគត ព្រលានយន្តហោះអន្តរជាតិភ្នំពេញនឹងពិបាកទ្រទ្រង់កំណើនទេសចរបរទេសដែលចេះតែកើនឡើងពីមួយឆ្នាំទៅមួយឆ្នាំ។

តួលេខក្រសួងទេសចរណ៍បានបង្ហាញថា កាលពីឆ្នាំ២០១១ ប្រទេសកម្ពុជាទទួលបានភ្ញៀវទេសចរបរទេសចំនួន២លាន៨សែននាក់។ នៅឆ្នាំ២០១២នេះ ចំនួនភ្ញៀវទេសចរបរទេសអាចកើនដល់ចំនួន៣លាន៣សែននាក់។ នៅឆ្នាំ២០១៥ចំនួនភ្ញៀវទេសចរបរទេសនឹងកើនដល់៤លាន៥សែននាក់។ ហើយនៅឆ្នាំ២០២០ ចំនួនទេសចរនឹងកើនដល់៧លាននាក់។

ប្រមុខរាជរដ្ឋាភិបាលលោក ហ៊ុន សែន បានបញ្ជាក់ទៀតថា៖ «ព្រលានយន្តហោះនៅក្នុងខេត្តកំពង់ឆ្នាំងនឹងត្រូវប្រើប្រាស់មិនមែនសម្រាប់តែដឹកភ្ញៀវទេសចរប៉ុណ្ណោះទេ។ ប៉ុន្តែសម្រាប់ការដឹកជញ្ជូនទំនិញ និងសម្រាប់ប្រតិបត្តិកងទ័ពផង»។ សម្រាប់ព្រលានយន្តហោះខេត្តកំពង់ឆ្នាំងនេះ លោក ហ៊ុន សែន អំពាវនាវអោយអាជ្ញាធររក្សាទុកទំហំដី១ ៤៦៣ហិកតា។ ក្នុងទំហំដីនេះ ប្រជាជនអាចបន្តប្រកបរបរអាជីវកម្មរបស់ខ្លួនបាននៅពេលនេះ ប៉ុន្តែ ពួកគេគ្មានសិទ្ធិទទួលបានកម្មសិទ្ធិឡើយ។

សូមបញ្ជាក់ថា ក្រៅពីគម្រោងព្រលានយន្តហោះខេត្តកំពង់ឆ្នាំង ប្រទេសកម្ពុជាគ្រោងនឹងសាងសង់ព្រលានយន្តហោះខ្នាតអន្តរជាតិថ្មីមួយទៀតនៅក្នុងស្រុកសូត្រនិគមចម្ងាយប្រមាណ៤៥គីឡូម៉ែត្រពីទីក្រុងសៀមរាប។ គម្រោងនៅក្នុងខេត្តសៀមរាបនេះនឹងត្រូវចំណាយទឹកប្រាក់អស់ប្រមាណជា១ពាន់លានដុល្លារអាមេរិក៕