រោងចក្រកាត់ដេរតៃវ៉ាន់ គ្រោងចុះបញ្ជីនៅផ្សារមូលបត្រកម្ពុជា នៅខែឧសភាខាងមុខ
រោងចក្រកាត់ដេរតៃវ៉ាន់ Grand Twins International នឹងចុះបញ្ជីនៅក្នុងទីផ្សារមូលបត្រកម្ពុជា នៅខែឧសភាខាងមុខ។ បច្ចុប្បន្ននេះ រដ្ឋាករទឹកស្វយ័តក្រុងភ្នំពេញ គឺជាសហគ្រាសរដ្ឋតែមួយគត់ ដែលបាន និងកំពុងធ្វើប្រតិបត្តិការជួញដូរភាគហ៊ុន តាំងពីខែមេសា ឆ្នាំ២០១២មក។ មន្ដ្រីក្រុមហ៊ុនផ្សារមូលបត្រកម្ពុជា បញ្ជាក់ថា ការចូលរួមរបស់ក្រុមហ៊ុនឯកជន នៅក្នុងផ្សារមូលបត្រកម្ពុជា គឺជាការវិវត្តន៍ដ៏ល្អ បើទោះបីវាមានលក្ខណៈយឺតយ៉ាវបន្តិចក្ដី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៣
បើតាមគម្រោង រោងចក្រកាត់ដេរតៃវ៉ាន់ Grand Twins International នឹងចុះបញ្ជីជាផ្លូវការ នៅក្នុងទីផ្សារមូលបត្រកម្ពុជា នៅខែឧសភាខាងមុខនេះ។ ក្រុមហ៊ុន Grand Twins International ដែលជាក្រុមហ៊ុនផលិតសម្លៀកបំពាក់សម្រាប់ផ្គត់ផ្គង់ឲ្យក្រុមហ៊ុនកីឡានៅអាមេរិក បានប្រកាសយ៉ាងដូច្នេះ នៅថ្ងៃព្រហស្បតិ៍ទី១៣មីនា។
ការចុះបញ្ជីនេះ បានធ្វើឲ្យក្រុមហ៊ុន Grand Twins International ក្លាយជាក្រុមហ៊ុនឯកជនដំបូងគេបង្អស់ ដែលមានវត្តមាននៅលើទីផ្សារភាគហ៊ុនកម្ពុជា បន្ទាប់ពីរដ្ឋាករទឹកស្វយ័ត ដែលជាសហគ្រាសរដ្ឋ បានចាប់ផ្ដើមប្រតិបត្តិការជួញដូរភាគហ៊ុនរបស់ខ្លួន នៅខែមេសា ឆ្នាំ២០១២។
លោកល្មុន សូឡី អនុប្រធាននាយកដ្ឋានប្រតិបត្តិការទីផ្សារ នៃក្រុមហ៊ុនមូលបត្រកម្ពុជា មានប្រសាសន៍ប្រាប់វិទ្យុបារាំងអន្ដរជាតិថា ក្រុមហ៊ុនផលិតសម្លៀកបំពាក់ Grand Twins International ជាក្រុមហ៊ុនដែលមានស្ថិរភាព និងមានប្រាក់ចំណេញ៣ឆ្នាំជាប់គ្នា។ ហើយបើតាមរបាយការណ៍របស់ក្រុមហ៊ុន Grand Twins International ប្រាក់ចំណូលរបស់ក្រុមហ៊ុននេះ រំពឹងថានឹងកើនឡើងជាង១២ភាគរយ គឺកើនរហូតដល់៤០លានដុល្លារ នៅឆ្នាំ២០១៥។
មន្ដ្រីក្រុមហ៊ុនផ្សារមូលបត្រកម្ពុជារូបនេះ បញ្ជាក់ប្រាប់វិទ្យុបារាំងថា ការចូលរួមរបស់ក្រុមហ៊ុនឯកជន នៅក្នុងផ្សារមូលបត្រកម្ពុជា គឺជាការវិវត្តន៍ដ៏ល្អ បើទោះបីវាមានលក្ខណៈយឺតយ៉ាវបន្តិចក្ដី។ បើតាមមន្ដ្រីដដែល មានក្រុមហ៊ុនជាង១០ទៀត ដែលកំពុងត្រៀមខ្លួនចូលប្រឡូកក្នុងទីផ្សារភាគហ៊ុននៅកម្ពុជា។ ប៉ុន្តែថា តើពេលណា យូរឬឆាប់ ទើបគេអាចឃើញវត្តមានក្រុមហ៊ុនទាំងនោះ នៅក្នុងទីផ្សារភាគហ៊ុនកម្ពុជា? លោកល្មុន សូឡី មានប្រសាសន៍ថា វាអាស្រ័យលើឆន្ទៈរបស់ក្រុមហ៊ុនទាំងនោះផ្ទាល់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ