កម្ពុជា -

អត្ថបទចុះផ្សាយនៅថ្ងៃ ព្រហស្បតិ៍ 07 កក្កដា 2011 - ព័ត៌មានទើបកែប្រើលើកចុងក្រោយ ថ្ងៃ សុក្រ 08 កក្កដា 2011

ផ្សារមូលបត្រកម្ពុជាចាប់បើកទ្វារនៅថ្ងៃទី១១កក្កដា២០១១

ទីផ្សារមូលបត្រកម្ពុជាមានទីតាំងនៅក្នុងអគារកាណាឌីយ៉ា

RFI/Channa Siv

ដោយ លាង ដឺលុច

រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុបានប្រកាសថា ផ្សារមូលបត្រកម្ពុជានឹងបើកទ្វារ នៅថ្ងៃទី១១កក្កដា២០០១នេះហើយ តាមការគ្រោងទុក ហើយថា នឹងមានភាគហ៊ុនក្រុមហ៊ុនរបស់រដ្ឋចំនួន២ ដែលនឹងចាប់ផ្តើមនៅក្នុងទីផ្សារនេះ។ លោកគាត ឈន់ថ្លែងយ៉ាងនេះ នៅក្នុងពិធីសម្ពោធក្រុមហ៊ុនមូលបត្រ SONATRA ដែលនឹងក្លាយជាក្រុមហ៊ុនឈ្មួញជើងសាមូលបត្រ។

សេចក្តីរាយការណ៍របស់លាង ដឺលុច ពីភ្នំពេញ

ស្តាប់ (01:25)

07/07/2011

នៅថ្ងៃចន្ទសប្តាហ៍ក្រោយនេះ ផ្សារមូលបត្រកម្ពុជានឹងត្រូវបើកទ្វារយ៉ាងពិតប្រាកដ។ ជាផ្សារហ៊ុនដែលរដ្ឋាភិបាលកម្ពុជាសង្ឃឹមថានឹងក្លាយជាប្រភពប្រមូលទុន និងជាចលករជំរុញកំណើនសេដ្ឋកិច្ចបន្ថែមទៀត។

នៅក្នុងពិធីសម្ពោធដាក់អោយដំណើរការក្រុមហ៊ុនឈ្មួញជើងសាមូលបត្រ SONATRA លោកគាត ឈន់ រដ្ឋមន្ត្រីក្រសួងសេដ្ឋកិច្ច បានបញ្ជាក់អោយដឹងថា ផ្សារមូលបត្រកម្ពុជានឹងចាប់ផ្តើមជាលើកដំបូងជាមួយវត្តមាននៃក្រុមហ៊ុនរដ្ឋចំនួន២ គឺទូរគមនាគមន៍កម្ពុជា និងរដ្ឋាករទឹកស្វយ័តភ្នំពេញ។

រហូតដល់ពេលនេះ មានក្រុមហ៊ុនឈ្មូញជើងសាមូលបត្រចំនួន៤ ដែលបានទទួលអាជ្ញាបណ្ណពីគណៈកម្មការមូលបត្រកម្ពុជា ដើម្បីប្រតិបត្តិការនៅក្នុងដំណើរការទីផ្សារហ៊ុន។ ក្រៅពីនោះ គណៈកម្មការមូលបត្រកម្ពុជាក៏បានប្រកាសទទួលស្គាល់ភ្នាក់ងារទូទាត់សាច់ប្រាក់ ភ្នាក់ងារបញ្ជីការមូលបត្រ ភ្នាក់ងារចុះបញ្ជីផ្ទេរមូលបត្រជាដើម ដែលភ្នាក់ងារទាំងនេះគឺជាសុទ្ធតែជាស្ថាប័នធនាគារធំៗនៅកម្ពុជា។

លោកគាត ឈន់បានបញ្ជាក់ប្រាប់អ្នកកាសែតថា លោកមានជំនឿចិត្តថា ផ្សារមូលបត្រនេះនឹងមានដំណើរការជោគជ័យ ជាមួយវត្តមាននៃតួអង្គដែលត្រូវមានសមត្ថភាពទាំងអស់នៅក្នុងប្រព័ន្ធទីផ្សារមូលបត្រនេះ។

ផ្សារមូលបត្រកម្ពុជានឹងបើកទ្វារជាលើកដំបូងសប្តាហ៍ក្រោយនេះហើយ ប៉ុន្តែសាធារណជនហាក់នៅមិនទាន់យល់ដឹងច្រើនអំពីសារៈប្រយោជន៍នៃទីផ្សារនេះ ហើយក៏ទំនងជាមិនទាន់ត្រៀមខ្លួនចូលរួមក្នុងផ្សារនេះនៅឡើយដែរ៕