ស្ពានអាកាសស្ទឹងមានជ័យ បើកសម្ពោធជាផ្លូវការនៅថ្ងៃព្រហស្បតិ៍ សប្ដាហ៍ក្រោយ
ស្ពានអាកាសស្ទឹងមានជ័យ នឹងត្រូវបើកសម្ពោធដាក់ឲ្យដំណើរការជាផ្លូវការ នៅថ្ងៃព្រហស្បតិ៍ ទី៣១ កក្កដា សប្ដាហ៍ក្រោយនេះ។ អាជ្ញាធររាជធានីភ្នំពេញ សង្ឃឹមថា ស្ពានអាកាសនេះ នឹងជួយសម្រួលការកកស្ទះចរាចរណ៍នៅតំបន់ស្ទឹងមានជ័យឲ្យមានភាពប្រសើរឡើង។ទន្ទឹមនឹងការសម្ពោធឲ្យប្រើប្រាស់ស្ពានអាកាសនេះ អាជ្ញាធរក្រុង ក៏កំពុងតែសិក្សាពីលទ្ធភាពសាងសង់ស្ពានអាកាសមួយចំនួនទៀតផងដែរ។
ចុះផ្សាយនៅថ្ងៃ៖
ស្តាប់ - ០១:៤១
ស្ពានអាកាសស្ទឹងមានជ័យ ដែលជាស្ពានអាកាសទី៣នៅរាជធានីភ្នំពេញ ត្រូវបានសាងសង់រួចរាល់ជាស្ថាពរ និងត្រូវបើកសម្ពោធដាក់ឲ្យដំណើរការជាផ្លូវការ នៅថ្ងៃទី៣១កក្កដា ក្រោមអធិបតីភាពលោកនាយករដ្ឋមន្ដ្រី ហ៊ុន សែន។ នេះបើតាមការបញ្ជាក់ប្រាប់របស់លោក ឡុង ឌីម៉ង់ អ្នកនាំពាក្យសាលារាជធានីភ្នំពេញ។
អ្នកនាំពាក្យរូបនេះឲ្យដឹងថា អាជ្ញាធរក្រុងបានសិក្សារួចរាល់ហើយថា គម្រោងស្ពានអាកាសស្ទឹងមានជ័យ ដែលមានទាំងផ្លូវក្រោមដីផងនោះ ពិតជាអាចជួយសម្រួលការកកស្ទះចរាចរណ៍នៅតំបន់នេះបាន។ បើតាមលោកឡុង ឌីម៉ង់ គម្រោងស្ពានអាកាសស្ទឹងមានជ័យនេះ ជាគម្រោងធំ បើធៀបទៅនឹងស្ពានអាកាសមុន។ ម្ល៉ោះហើយ វានឹងជួយឲ្យចរាចរណ៍ដំណើរការល្អជាងគម្រោងស្ពានអាកាសដទៃទៀតយ៉ាងប្រាកដ។
គម្រោងស្ពានអាកាសមួយទើបតែបញ្ចប់ សាលារាជធានីភ្នំពេញបាន និងកំពុងតែសិក្សាពីលទ្ធភាពសាងសង់ស្ពានអាកាស និងផ្លូវក្រោមដីថ្មីមួយចំនួនទៀតរួចទៅហើយ។ គម្រោងដែលបាន និងកំពុងតែសិក្សានោះរួមមាន នៅផ្លូវសហព័ន្ធរុស្ស៊ីត្រង់ចំណុចស្តុបសាលាតិចណូ ស្តុបកាណាឌីយ៉ា និងស្តុបទឹកថ្លា។
បើតាមលោកឡុង ឌីម៉ង់ គម្រោងស្ពានអាកាសនៅផ្លូវសហព័ន្ធរុស្ស៊ី ត្រង់ស្តុបសាលាតិចណូ ជាគម្រោងអាទិភាព ដែលសាលារាជធានីគ្រោងបើកការដ្ឋាននាពេលខាងមុខនេះ។ ផ្លូវសហព័ន្ធរុស្ស៊ី ជាផ្លូវដែលប្រជាពលរដ្ឋប្រើប្រាស់ច្រើន មានចំណុចប្រសព្វច្រើន និងមានការកកស្ទះជារៀងរាល់ថ្ងៃផងដែរ។ ហើយប្រសិនជាត្រូវសាងសង់ស្ពានអាកាស និងផ្លូវក្រោមដី អ្នកនាំពាក្យរូបនេះគូសបញ្ជាក់បន្ថែមថា សាលារាជធានីភ្នំពេញ នឹងព្យាយាមធ្វើយ៉ាងណា ឲ្យមានការប៉ះពាល់តិចតួចបំផុត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ