ព្រឹទ្ធសភាអនុម័តច្បាប់ថវិកាឆ្នាំ ២០១៤ ដោយគ្មានព្រឹទ្ធសមាជិកគណបក្សសម រង្ស៊ី
ដូចការគ្រោងទុក ព្រឹទ្ធសភាបានអនុម័តជាឯកច្ឆ័ន្ទសេចក្តីព្រាងច្បាប់ថវិកាជាតិឆ្នាំ ២០១៤ នៅថ្ងៃព្រហស្បតិ៍នេះដោយគ្មានព្រឹទ្ធសមាជិកមកពីគណបក្សសម រង្ស៊ីទេ។ សមាជិកព្រឹទ្ធសភាចំនួន ១១រូបរបស់បក្សប្រឆាំងបានធ្វើពហិការមិនចូលប្រជុំអនុម័តសេចក្តីព្រាងច្បាប់ដែលបញ្ជូនពីរដ្ឋសភាមកទេ ក្រោមហេតុផលថា រដ្ឋសភាឯកបក្សរបស់គណបក្សប្រជាជនកម្ពុជាត្រូវបានបង្កើតឡើងដោយមិនស្របច្បាប់ ។ ប៉ុន្តែ គណបក្សកាន់អំណាចយល់ឃើញថា រដ្ឋសភានិងរដ្ឋាភិបាលត្រូវបានបង្កើតឡើងដោយអនុលោមតាមរដ្ឋធម្មនុញ្ញកម្ពុជា។
ចុះផ្សាយនៅថ្ងៃ៖
ព្រឹទ្ធសភាដែលជាស្ថាប័ននីតិបញ្ញត្តិកំពូលបានបើកកិច្ចប្រជុំនៅព្រឹកថ្ងៃព្រហស្បតិ៍នេះដើម្បីពិភាក្សានិងអនុម័តជាឯកច្ឆ័ន្ទសេចក្តីព្រាងច្បាប់ចំនួន៤ដែលរដ្ឋសភាទើបតែបានអនុម័តកាលពីថ្ងៃទី១២ វិច្ចិកា។ សេចក្តីព្រាងច្បាប់ទាំង៤នោះរួមមាន សេចក្តីព្រាងច្បាប់ស្តីពីការបង្កើតក្រសួងចំនួន៣គឺក្រសួងមុខងារសាធារណៈ ក្រសួងឧស្សាហកម្មនិងសិប្បកម្ម និងក្រសួងរ៉ែ និងថាមពល។ ចំណែកឯសេចក្តីព្រាងច្បាប់ទី៤គឺស្តីពីថវិកាជាតិឆ្នាំ ២០១៤ ។
សមាជិកព្រឹទ្ធសភា ៤០ នាក់បានចូលរួមពិភាក្សានិងអនុម័តសេចក្តីព្រាងច្បាប់ទាំងនោះក្រោមការដឹកនាំកិច្ចប្រជុំដោយលោក សាយ ឈុំ អនុប្រធានទី១នៃព្រឹទ្ធសភា។ គ្មានទេវត្តមាន សមាជិកព្រឹទ្ធសភាគណបក្ស សម រង្ស៊ី ទាំង១១រូបនៅក្នុងកិច្ចប្រជុំនេះ។ ពួកគេបានប្រកាសធ្វើពហិការមិនចូលរួមប្រជុំក្នុងហេតុផលនយោបាយ។
នៅក្នុងសេចក្តីថ្លែងការណ៍មួយដែលចេញផ្សាយកាលពីថ្ងៃពុធ ក្រុមសមាជិកព្រឹទ្ធសភាគណបក្សសម រង្ស៊ី បានលើកហេតុផលថា ការបង្កើតរដ្ឋសភា និងរដ្ឋាភិបាលដោយគណបក្សប្រជាជនកម្ពុជាជាឯកបក្សបានល្មើសទៅនឹងរដ្ឋធម្មនុញ្ញនិងមិនស្របច្បាប់ឡើយ។
ដូច្នេះ ពួកគេមិនចូលប្រជុំព្រឹទ្ធសភាដើម្បីអនុម័តសេចក្តីព្រាងច្បាប់ដែលរដ្ឋសភាឯកបក្សបានអនុម័តនោះទេ។
គួរបញ្ជាក់ថា គណបក្ស សម រង្ស៊ី មានសមាជិកព្រឹទ្ធសភា១១រូបដោយពួកគេមិនបានប្រកាសចូលទៅគណបក្សសង្គ្រោះជាតិទេដោយសារតែចង់រក្សាតំណែងនៅក្នុងស្ថាប័នកំពូលនេះ។ ប៉ុន្តែ វិបត្តិនយោបាយក្រោយការបោះឆ្នោតបានធ្វើឲ្យសមាជិកសភាជាប់ឆ្នោតទាំង ៥៥ រូបរបស់គណបក្សសង្គ្រោះជាតិមិនចូលប្រជុំសភាទេ។ ដូច្នេះ សមាជិកព្រឹទ្ធសភាគណបក្ស សម រង្ស៊ី ក៏ធ្វើពហិការមិនចូលប្រជុំដូចគ្នាដែរ។
ប៉ុន្តែ ពហិការនេះមិនបានបង្កការរាំងស្ទះដល់ដំណើរការកិច្ចប្រជុំឡើយ។ គណបក្សប្រជាជនកម្ពុជាដែលសម្អាងលើការបកស្រាយរបស់ក្រុមប្រឹក្សាធម្មនុញ្ញ និងក្រោមព្រះរាជវត្តមានរបស់ព្រះមហាក្សត្រ បានចាត់ទុកការបង្កើតរដ្ឋសភា និងរដ្ឋាភិបាលរបស់ខ្លួនថាបានធ្វើឡើងដោយគោរពតាមរដ្ឋធម្មនុញ្ញទាំងស្រុង។ សេចក្តីព្រាងច្បាប់ទាំង៤ដែលព្រឹទ្ធសភាអនុម័តនៅថ្ងនេះ ក៏ត្រូវបានរដ្ឋសភាអនុម័តដោយគ្មានវត្តមានតំណាងរាស្ត្រគណបក្សសង្រោះជាតិដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ