សំណើសុំបញ្ចូលបេក្ខភាពលោក សម រង្ស៊ីក្នុងបញ្ជីអ្នកតំណាងរាស្ត្រទៅដល់គ.ជ.ប
សំណើរបស់គណបក្សសង្គ្រោះជាតិដែលសុំបញ្ចូលបេក្ខភាពរបស់លោកសម រង្ស៊ីទៅក្នុងបញ្ជីអ្នកតំណាងរាស្ត្រ ជំនួសលោកគួយ ប៊ុនរឿន នៅមណ្ឌលកំពង់ចាម បានទៅដល់ គ.ជ.ប ហើយនៅថ្ងៃព្រហស្បតិ៍ទី២៤ កក្កដានេះ។ ស្ថាប័នរៀបចំការបោះឆ្នោតកំពុងពិនិត្យឯកសារហើយអាចនឹងចេញសេចក្តីសម្រេចនៅថ្ងៃសុក្រស្អែកនេះ។
ចុះផ្សាយនៅថ្ងៃ៖
ស្តាប់ - ០២:០១
គណៈកម្មាធិការជាតិរៀបចំការបោះឆ្នោត (គ.ជ.ប) បានទទួលឯកសារសុំផ្លាស់ប្តូរបេក្ខជនតំណាងរាស្ត្ររបស់គណបក្សសង្គ្រោះជាតិហើយនៅរសៀលថ្ងៃព្រហស្បតិ៍ទី ២៤ កក្កដានេះ។ នេះបើតាមការបញ្ជាក់ពីលោក ទេព នីថា អគ្គលេខាធិការ គ.ជ.ប ដែលបានប្រាប់វិទ្យុបារាំងអន្តរជាតិ។ បើតាមលោក ទេព នីថា គ.ជ.ប បានពិនិត្យឯកសាររបស់គណបក្សសង្គ្រោះជាតិនិងបានសុំឲ្យគណបក្សនេះបំពេញបន្ថែមចំណុចខ្វះខាតមុននឹងសម្រេច។ សេចក្តីសម្រេចដែលអាចធ្វើឡើងនៅថ្ងៃសុក្រទី២៥ កក្កដា។
ការផ្លាស់ប្តូរបេក្ខភាពតំណាងរាស្ត្រគណបក្សសង្គ្រោះជាតិនេះ បានធ្វើឡើងដើម្បីឲ្យលោក សម រង្ស៊ី អាចក្លាយជាបេក្ខជនតំណាងរាស្ត្រជាប់ឆ្នោតស្របច្បាប់ និងអាចចូលធ្វើសច្ចាប្រណិធានក្នុងព្រះបរមរាជវាំងជាមួយតំណាងរាស្ត្រជាប់ឆ្នោតទាំង ៥៤ នាក់ផ្សេងទៀត។ បើយោងតាមប្រភពព័ត៌មាន ពិធីសច្ចាប្រណិធានត្រូវគេគ្រោងធ្វើនៅថ្ងៃសុក្រ២៥កក្កដានេះដែរ។
ប្រភពពីគណបក្សសង្គ្រោះជាតិឲ្យដឹងថា ប្រធានគណបក្ស លោក សម រង្ស៊ីដែលគ្មានឈ្មោះជាបេក្ខភាពតំណាងរាស្ត្រជាប់ឆ្នោតរបស់គណបក្សសង្គ្រោះជាតិក្នុងនីតិកាលទី៥ទេនោះ នឹងក្លាយជាបេក្ខជនតំណាងរាស្ត្រជាប់ឆ្នោតលេខរៀងទី២នៅមណ្ឌលកំពង់ចាមជំនួសលោកគួយ ប៊ុនរឿន។ លោក គួយ ប៊ុនរឿន ដែលនឹងត្រូវលាលែងពីតំណែងតំណាងរាស្ត្រទៅឈរឈ្មោះជាបេក្ខជនសម្រាប់ក្បាលម៉ាស៊ីនដឹកនាំ គ.ជ.ប វិញតាមសមាសភាព ៤-៤-១ ដែលបានព្រមព្រៀងជាមួយគណបក្សប្រជាជនកម្ពុជា។
លោក ទេព នីថា បានពន្យល់ថា នីតិវិធីនៃការផ្លាស់ប្តូរឈ្មោះបេក្ខជនតំណាងរាស្ត្រត្រូវការរយៈពេលមួយសប្តាហ៍ ប៉ុន្តែ ដោយសារបេក្ខជនដែលត្រូវផ្លាស់ប្តូរទាំងពីរ គឺលោក សម រង្ស៊ី និងលោក គួយ ប៊ុនរឿន គឺជាបេក្ខជនចាស់និងធ្លាប់ឈរឈ្មោះជាតំណាងរាស្ត្រហើយនោះ ដូចនេះ គណៈកម្មការវាយតម្លៃអាចទទួលស្គាល់និងផ្លាស់ប្តូរបានយ៉ាងឆាប់រហ័ស។ លោកបញ្ជាក់ថា ការផ្លាស់ប្តូរនេះធ្វើឡើងស្របទៅតាមច្បាប់បោះឆ្នោត។
បើគ្មានអ្វីប្រែប្រួលនោះទេនោះ ក្រោយពី គ.ជ.ប ផ្តល់សុពលភាពជាបេក្ខជនតំណាងរាស្ត្រជាប់ឆ្នោតដល់លោក សម រង្ស៊ីហើយនោះ តំណាងរាស្ត្រជាប់ឆ្នោតរបស់គណបក្សសង្គ្រោះជាតិទាំង ៥៥ នាក់នឹងទៅស្បថសច្ចាប្រណិធានក្នុងព្រះបរមរាជវាំងមុននឹងចូលទៅបំពេញកៅអីក្នុងរដ្ឋសភាឲ្យគ្រប់ ១២៣ នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ