សំណើប្តូរបេក្ខភាពលោក សម រង្ស៊ីទៅដល់គ.ជ.បនៅថ្ងៃនេះ
គណបក្សសង្គ្រោះជាតិនឹងបញ្ជូនសំណើផ្លាស់ប្តូរបេក្ខភាពរបស់លោក សម រង្ស៊ីប្រធានគណបក្សសង្គ្រោះជាតិ ទៅជំនួសលោក គួយ ប៊ុនរឿន តំណាងរាស្ត្រជាប់ឆ្នោតនៅមណ្ឌលកំពង់ចាមនៅថ្ងៃព្រហស្បតិ៍ទី២៤ កក្កដានេះហើយ។ ការផ្លាស់ប្តូរនេះ គឺដើម្បីអាចឲ្យលោក សម រង្ស៊ីទទួលបានតំណែងជាតំណាងរាស្ត្រ និងចូលអង្គុយក្នុងសភាបាន។
ចុះផ្សាយនៅថ្ងៃ៖
ស្តាប់ - ០២:០០
សំណើផ្លាស់ប្តូរបេក្ខភាពរបស់លោក សម រង្ស៊ីទៅជាតំណាងរាស្ត្រនឹងទៅដល់ស្នាក់ការគណៈកម្មាធិការជាតិរៀបចំការបោះឆ្នោតនៅរសៀលថ្ងៃព្រហស្បតិ៍នេះ។ នេះបើតាមការបញ្ជាក់ពីលោក យឹម សុវណ្ណអ្នកនាំពាក្យគណបក្សសង្គ្រោះជាតិ។ លោក យឹម សុវណ្ណ បានបន្ថែមថា គណបក្សកំពុងរៀបចំឯកសារផ្លាស់ប្តូរ។
សូមបញ្ជាក់ថា ការផ្លាស់ប្តូរបេក្ខភាពតំណាងរាស្ត្រគណបក្សសង្គ្រោះជាតិនេះ គឺធ្វើឡើងក្រោយកិច្ចចរចាថ្នាក់កំពូលដើម្បីបិទបញ្ចប់ជម្លោះដែលបានធ្វើឡើងកាលពីដើមសប្តាហ៍កន្លងទៅ។ គណបក្សសង្គ្រោះជាតិបានឲ្យដឹងថា ប្រធានគណបក្សសង្គ្រោះជាតិ លោក សម រង្ស៊ីដែលមិនមានឈ្មោះបេក្ខភាពតំណាងរាស្ត្រជាប់ឆ្នោតរបស់គណបក្សសង្គ្រោះជាតិក្នុងនីតិកាលទី៥នេះ បាននឹងទៅឈរនៅលេខរៀងទី២នៅមណ្ឌល់កំពង់ចាមជំនួសបេក្ខភាពជាប់ឆ្នោតលោក គួយ ប៊ុនរឿនវិញ។ លោកគួយ ប៊ុនរឿន ដែលនឹងត្រូវលាលែងពីតំណែងតំណាងរាស្ត្រទៅឈរឈ្មោះជាបេក្ខជនតំណាងសម្រាប់ក្បាលម៉ាស៊ីនដឹកនាំគណៈកម្មាធិការជាតិរៀបចំការបោះឆ្នោត ដែលមានសមាសភាព៤-៤-១ ជាមួយនឹងគណបក្សប្រជាជនកម្ពុជាវិញ។ នេះបើតាមការបញ្ជាក់ពីគណបក្សសង្គ្រោះជាតិដដែល។
បើតាមការបញ្ជាក់ពីលោក ទេព នីថា អគ្គលេខាធិការគ.ជ.ប នីតិវិធីនៃការផ្លាស់ប្តូរឈ្មោះបេក្ខជនតំណាងរាស្ត្រ គឺត្រូវការរយៈពេលមួយសប្តាហ៍។ ប៉ុន្តែលោកបានបញ្ជាក់ថា ដោយសារបេក្ខជនដែលត្រូវផ្លាស់ប្តូរឈ្មោះទាំងពីរ (លោក សម រង្ស៊ី និងលោក គួយ ប៊ុនរឿន) គឺជាបេក្ខជនចាស់ៗ និងធ្លាប់ឈរជាតំណាងរាស្ត្រហើយនោះ ដូចនេះ គណៈកម្មការវាយតម្លៃអាចទទួលស្គាល់និងផ្លាស់ប្តូរបានយ៉ាងឆាប់។ លោក ទេព នីថា ដដែលបានបញ្ជាក់ថា ការផ្លាស់ប្តូរនេះស្របទៅតាមច្បាប់នៃការបោះឆ្នោតដែលមានចែង។
សូមរំលឹកជូនថា ការផ្លាស់ប្តូរសមាសភាពតំណាងរាស្ត្រគណបក្សសង្គ្រោះជាតិ ទៅឲ្យលោក សម រង្ស៊ីនេះ ដើម្បីអាចឲ្យប្រធានគណបក្សសង្គ្រោះជាតិដែលមិនមានឈ្មោះជាតំណាងរាស្ត្រក្នុងអាណត្តិទី៥រូបនេះ អាចចូលស្បថកាន់តំណែងជាសមាជិកសភាស្របច្បាប់បាន។ យ៉ាងណាក៏ដោយ បើគ្មានអ្វីប្រែប្រួលនោះទេ ក្រោយគ.ជ.ប ផ្តល់សុពលភាពជាបេក្ខជនជាប់ឆ្នោតដល់លោក សម រង្ស៊ីនោះ គណបក្សសង្គ្រោះជាតិនឹងទៅស្បថសច្ចាប្រណិធានក្នុងព្រះបរមរាជវាំងនៅថ្ងៃសុក្រទី២៥កក្កដាស្អែកនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ