វិស័យភោជនីយដ្ឋាននៅតែមានសន្ទុះ បើទោះជាមានការប្រកួតប្រជែងខ្លាំង
ចុងក្រោយនេះ វិស័យភោជនីយដ្ឋានកំពុងរីកដុះដាលនិងមានការប្រកួតប្រជែងគ្នាយ៉ាងខ្លាំងគួរឲ្យកត់សំគាល់ ជាពិសេសភោជនីយដ្ឋានដែលទិញសិទ្ធិអាជីវកម្មពីបរទេស។ វិស័យនេះត្រូវគេប៉ាន់ប្រមាណថានៅតែអាចបន្តការកើនឡើងខ្លាំងបន្ថែមនាប៉ុន្មានឆ្នាំខាងមុខនេះ។ នេះបើយោងតាមរបាយការណ៍ការស្ទង់មតិចំពោះថ្នាក់ដឹកនាំអាជីវកម្មភោជនីយដ្ឋាននៅទីក្រុងភ្នំពេញ ឆ្នាំ២០១៤ ដែលចេញផ្សាយដោយភោជនីយដ្ឋាន PARK CAFÉ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៨
នៅទីក្រុងភ្នំពេញ មានភោជនីយដ្ឋានចំនួនប្រមាណជាង ១៧០០ កន្លែង និងនៅទូទាំងប្រទេសមានភោជនីយដ្ឋានសរុបជិត ៣០០០ កន្លែង។ នេះបើយោងតាមតួលេខដែលបានចុះផ្សាយក្នុង Yellow Page Cambodia ដែលរបាយការណ៍ស្ទង់មតិបានស្រង់ឃើញ។
របាយការណ៍ការស្ទង់មតិអំពីវិស័យភោជនីយដ្ឋានបានបង្ហាញថា ថ្នាក់ដឹកនាំអាជីវកម្មភោជនីយដ្ឋានប្រមាណ ៦៥% យល់ឃើញថា ទីផ្សារនេះនឹងរឹតតែមានការប្រកួតប្រជែងកាន់តែខ្លាំងឡើងនៅពេលខាងមុខ។ យ៉ាងណាក៏ដោយ អ្នកគ្រប់គ្រងភោជនីយដ្ឋានប្រមាណ ៣៣% ទៀតគិតថា វិស័យនេះនៅមានការរីកដុះដាលខ្លាំងដដែល។
របាយការស្ទង់មតិដដែលនេះឲ្យដឹងទៀតថា នៅប៉ុន្មានឆ្នាំចុងក្រោយនេះ ចំនួនភោជនីយដ្ឋានបានកើនឡើងយ៉ាងខ្លាំងនៅទីក្រុងភ្នំពេញ។ កំណើននៃភោជនីយដ្ឋានគឺដោយសារតែចំនួនប្រជាជនកើនឡើងនិងដោយសាររំហូរនៃភ្ញៀវទេសចរបរទេសនិងទេសចរក្នុងស្រុក។ ក្រៅពីនោះ ការកើនឡើងនៃប្រាក់ចំណូលរបស់ប្រជាជននៅទីក្រុង និងការប្តូរឥរិយាបថរបស់មនុស្សដែលចូលចិត្តទទួលទានអាហារតាមភោជនីយដ្ឋានដែលមានបរិស្ថានល្អក៏ជាចំណែកធ្វើឲ្យចំនួនភោជនីយដ្ឋានបន្តកើនឡើងដែរ។
អ្នកគ្រប់គ្រងទូទៅនៃភោជនីយដ្ឋាន Park Café លោក ចាន់ ស៊ី បានមានប្រសាសន៍ថា ការកើនឡើងនៃវិស័យអាហារនិងភេសជ្ជៈដែលផ្គត់ផ្គង់ក្នុងភោជនីយដ្ឋានគឺសំដៅភាគច្រើនទៅលើ តែអ្នកដែលមានចំណូលមធ្យមនិងយុវវ័យ។ លោកក៏បានប្រាប់ទៀតថា ការបើកច្រកទ្វារក្នុងតំបន់អាស៊ានសម្រាប់សមាហរណកម្មសេដ្ឋកិច្ចដែលនឹងធ្វើឲ្យមានកំណើតនៃតម្រូវការនិងការប្រកួតប្រជែងកាន់តែខ្លាំងនោះក៏បញ្ជាក់ពីភាពវិជ្ជមាននៃទីផ្សាភោជនីយដ្ឋាននៅកម្ពុជាដែរ។
ទាំងនេះគឺជាសញ្ញាដ៏វិជ្ជមានបំផុតសម្រាប់អ្នកដែលមានបំណងចង់ប្រកបអាជីវកម្មក្នុងវិស័យភោជនីយដ្ឋានបើទោះបីជាមានការប្រកួតប្រជែងយ៉ាងខ្លាំងពីយីហោភោជនីយដ្ឋានល្បីៗមកពីបរទេសក៏ដោយ។ នេះបើយោងតាមការសន្និដ្ឋានរបស់អ្នកសរសេររបាយការណ៍ស្ទង់មតិខាងលើ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ