កម្ពុជា-អាមេរិក -

អត្ថបទចុះផ្សាយនៅថ្ងៃ សុក្រ 21 កញ្ញា 2012 - ព័ត៌មានទើបកែប្រើលើកចុងក្រោយ ថ្ងៃ សុក្រ 21 កញ្ញា 2012

កម្ពុជាទទួលបានជំនួយអាមេរិកជាង៥២លានដុល្លារ

កម្ពុជាទទួលបានជំនួយអាមេរិកជាង៥២លានដុល្លារបន្ថែមទៀតនៅថ្ងៃសុក្រ២១កញ្ញានេះនៅក្នុងពិធីចុះហត្ថលេខា២ផ្សេងគ្នា

RFI/Siv Channa

ដោយ លាង ដឺលុច

កម្ពុជា បានទទួលជំនួយជាង៥២លានដុល្លារបន្ថែមទៀតពីសហរដ្ឋអាមេរិកនៅថ្ងៃសុក្រនេះ នៅក្នុងពិធីចុះហត្ថលេខា២ផ្សេងគ្នា។ ជំនួយទាំងនោះនឹងត្រូវប្រើប្រាស់ក្នុងវិស័យជាច្រើនដូចជា ផ្នែកសុខាភិបាល អប់រំ កសិកម្ម សន្តិសុខស្បៀង និងបរិស្ថាន។ យោងតាមសេចក្តីប្រកាសព័ត៌មានរបស់ស្ថានទូតអាមេរិក USAIDសង្ឃឹមថានឹងផ្ដល់ថវិកាសរុបចំនួន ៦៥ លានដុល្លារអាមេរិក ជាជំនួយឧបត្ថម្ភដល់ប្រទេសកម្ពុជាក្នុងឆ្នាំ២០១២នេះ៕

សេចក្តីរាយការណ៍របស់ លាង ដឺលុច ពីទីក្រុងភ្នំពេញ

ស្តាប់ (01:43)

21/09/2012 by លាង ដឺលុច

មន្ត្រីជាន់ខ្ពស់របស់រដ្ឋាភិបាលកម្ពុជា២រូបបានចុះហត្ថលេខាទទួលជំនួយហិរញ្ញវត្ថុពីរដ្ឋាភិបាលអាមេរិកចំនួន៥២លាន៥សែនដុល្លារនៅថ្ងៃសុក្រនេះ តាមរយៈទីភ្នាក់ងារសហរដ្ឋអាមេរិកដើម្បីអភិវឌ្ឍន៍អន្តរជាតិ។ នៅព្រឹកនេះ លោកឧបនាយករដ្ឋមន្ត្រីហោ ណាំហុង បានចុះហត្ថលេខាជាមួយលោកFlynn fuller នាយកបេសកកម្មនៃទីភ្នាក់ងារសហរដ្ឋអាមេរិកដើម្បីអភិវឌ្ឍន៍អន្ដរជាតិដើម្បីទទួលជំនួយ៣៤លានដុល្លារ។ ក្នុងចំណោមថវិកាទាំងនេះ ៣៣លានដុល្លារនឹងត្រូវប្រើនៅក្នុងគម្រោងសុខមាលភាពប្រជាពលរដ្ឋ។

សេចក្តីប្រកាសព័ត៌មានរបស់ស្ថានទូតអាមេរិកប្រចាំកម្ពុជាសរសេរថា ជំនួយថវិកានេះត្រូវប្រើសំរាប់គាំទ្រដល់សកម្មភាពនានាជាបន្ត ដើម្បីកែលំអសុខភាពមាតា សុខភាពបន្តពូជ និងសុខភាពកុមារ កាត់បន្ថយការឆ្លង និងផលប៉ះពាល់នៃជំងឺអេដស៍ ការពារ និងកំចាត់ជំងឺឆ្លងធំៗ ដូចជាជំងឺរបេងជាដើម។ ថវិកានេះក៏នឹងជួយពង្រឹងប្រព័ន្ធសុខាភិបាលនៃប្រទេសកម្ពុជាផងដែរ។

ចំណែកឯថវិកា១លានដុល្លារទៀតត្រូវប្រើសំរាប់ជួយក្នុងវិស័យអប់រំ ដូចជា ការកាត់បន្ថយអត្រាបោះបង់ចោលសាលារៀន និងអត្រារៀនត្រួតថ្នាក់ តាមរយៈការបង្កើនគុណភាពនៃការបង្រៀន ការបណ្ដុះបណ្ដាលលើការគ្រប់គ្រងសាលារៀន និងការវាយតំលៃលទ្ធផលនៃការសិក្សារបស់សិស្ស។

នៅរសៀលថ្ងៃសុក្រទី២១កញ្ញានេះដដែល លោកឧបនាយករដ្ឋមន្ត្រី សុខ អាន ក៏បានចុះហត្ថលេខាទទួលជំនួយ១៨,៥លានដុល្លារផ្សេងទៀតពីលោកFlynn Fuller នាយកបេសកម្មនៃទីភ្នាក់ងារសហរដ្ឋអាមេរិកដើម្បីអភិវឌ្ឍន៍អន្តរជាតិ។

ថវិកាចំនួន១៨,៥លានដុល្លារ នឹងត្រូវប្រើសំរាប់គំរោងពង្រឹងសមត្ថភាពរបស់សង្គមស៊ីវិល វិស័យឯកជន និងរដ្ឋាភិបាល ដើម្បីដោះស្រាយការប្រឈមស្តីពីសន្ដិសុខស្បៀង និង ការបំរែបំរួលអាកាសធាតុនៅកម្ពុជា៕