កម្ពុជា-ថៃ -

អត្ថបទចុះផ្សាយនៅថ្ងៃ ពុធ 08 កុម្ភៈ 2012 - ព័ត៌មានទើបកែប្រើលើកចុងក្រោយ ថ្ងៃ ពុធ 08 កុម្ភៈ 2012

កម្ពុជាជូនដំណឹងទៅតុលាការឡាអេអំពីសកម្មភាពយោធាថៃនៅភ្នំទ្រព្យ

តុលាការក្រុងឡាអេបានចេញដីកាបង្គាប់ឲ្យកម្ពុជានិងថៃដកទ័ពជាបណ្តោះអាសន្នចេញពីតំបន់ព្រះវិហារ

សុវណ្ណារ៉ា/RFI

ដោយ លាង ដឺលុច

កម្ពុជាបានធ្វើកំណត់ទូតផ្ញើទៅរដ្ឋាភិបាលថៃហើយ នៅថ្ងៃពុធទី៨កុម្ភៈនេះ ដើម្បីតវ៉ាប្រឆាំងនឹងសកម្មភាពរបស់យោធាថៃ ដែលដឹកជញ្ជូនគ្រឿងសំណង់ ដើម្បីសាងសង់ព្រះវិហារ នៅលើកំពូលភ្នំទ្រព្យ។ កំណត់ទូតតវ៉ានេះក៏ត្រូវបានចម្លងជូនទៅតុលាកាឡាអេផងដែរ ដើម្បីបង្ហាញថា យោធាថៃកំពុងរំលោភបូរណភាពទឹកដីកម្ពុជា និងរំលោភដីកាបញ្ជារបស់តុលាការក្រុងឡាអេ ថ្ងៃទី១៨កក្កដា ឆ្នាំ២០១១។

សេចក្តីរាយការណ៍របស់លាង ដឺលុច ពីភ្នំពេញ

ស្តាប់ (01:29)

08/02/2012

រដ្ឋាភិបាលក្រុងភ្នំពេញបានផ្ញើកំណត់ទូតតវ៉ាប្រឆាំងសកម្មភាពយោធាថៃ នៅថ្ងៃពុធទី៨កុម្ភៈនេះ ទៅរដ្ឋាភិបាលក្រុងបាងកកហើយ។ កំណត់ទូតស្តីបន្ទោសយោធាថៃនេះក៏ត្រូវបានថតចម្លង និងផ្ញើទៅតុលាការយុត្តិធម៌អន្តរជាតិទីក្រុងឡាអេដូចគ្នាដែរ។

អ្នកនាំពាក្យក្រសួងការបរទេសកម្ពុជាលោក កុយ គួង បានអះអាងប្រាប់វិទ្យុបារាំងអន្តរជាតិ នៅល្ងាចថ្ងៃពុធនេះ អំពីខ្លឹមសារនៃកំណត់ទូត ដែលពិពណ៌នាអំពីការរំលោភបំពានរបស់យោធាថៃ ដែលកាលពីថ្ងៃអង្គារ បានដឹកជញ្ជូនគ្រឿងសំណង់ឡើងលើភ្នំទ្រព្យដែលកម្ពុជាអះអាងថាស្ថិតនៅក្នុងបូរណភាពទឹកដីខ្លួន។

យោងតាមការបញ្ជាក់របស់មន្ត្រីជាន់ខ្ពស់នៃក្រសួងការបទេសរូបនេះ នៅក្នុងកំណត់ទូតនោះ រដ្ឋាភិបាលកម្ពុជាបានវាយតម្លៃថា សកម្មភាពរបស់យោធាថៃបានរំលោភទៅលើបូរណភាពទឹកដីរបស់កម្ពុជា ហើយក៏កំពុងរំលោភដីការបស់តុលាការយុត្តិធម៌អន្តរជាតិទីក្រុងឡាអេ ថ្ងៃទី១៨កក្កដាឆ្នាំ២០១១ ដែលចែងអំពីតំបន់គ្មានកងទ័ពបណ្តោះអាសន្ននោះដែរ។

បើយោងតាមការបញ្ជាក់របស់មេបញ្ជាកងពលធំអន្តរាគមន៍លេខ៣ លោកឧត្តមសេនីយឯក ស្រី ឌឹក ស្ថានភាពនៅតំបន់ភ្នំទ្រព្យនៅថ្ងៃនេះ ស្ងប់ស្ងាត់ធម្មតាទេ បន្ទាប់ពីកម្ពុជាបានហាមប្រាមមិនអោយកងទ័ពថៃឡើងទៅកាន់កំពូលភ្នំទ្រព្យ។

កាលពីថ្ងៃអង្គារ ក្រោយពីវិលត្រឡប់ពីប្រទេសចិនមកដល់កម្ពុជាវិញ លោករដ្ឋមន្ត្រីការបរទេសហោ ណាំហុង បានថ្លែងប្រាប់អ្នកសារព័ត៌មានដែលសួរលោកអំពីសកម្មភាពរបស់យោធាថៃនេះថា ភ្នំទ្រព្យគឺស្ថិតនៅក្នុងបូរណភាពទឹកដីកម្ពុជា ដែលកម្ពុជាត្រូវការពារ៕