នាយករដ្ឋមន្ត្រីបន្ទោសមន្ត្រីខ្លាំងៗពីការមិនអើពើដោះស្រាយវិវាទដីធ្លី
លោកនាយករដ្ឋមន្ត្រីបន្ទាប់ពីស្ងាត់ស្ងៀមទាក់ទងបញ្ហាដីធ្លីអស់មួយរយៈធំ បានធ្វើការស្តីបន្ទោសទៅលើមន្ត្រីរបស់លោក ចំពោះការអាក់ខានក្នុងការចាត់វិធានការដោះស្រាយវិវាទដីធ្លីដែលធ្វើឲ្យប្រជាពលរដ្ឋឡើងមករកអន្តរាគមន៍ពីលោកមិនចេះស្រាកស្រាន។លោកនាយករដ្ឋមន្ត្រីបានប្រើវេទិកាសិក្ខាសាលាយុទ្ធសាស្ត្រជាតិកាលពីព្រឹកមិញមិញថ្លែងទាក់ទងទៅនឹងបញ្ហាដីធ្លីនេះ។ ដោយមានការគ្រាំទ្រពីសង្គមស៊ីវិល លោកហ៊ុន សែន បានផ្ញើសារដល់អ្នកវិនិយោគទុន ឲ្យដកថយប្រសិនបើមិនមានសកម្មភាពវិនិយោគពិតប្រាកដលើដីសម្បទាននោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៨
លោកនាយករដ្ឋមន្ត្រី ហុន សែន បានធ្វើការស្តីបន្ទោសទៅលើអាជ្ញាធរដែនដីមួយចំនួន ជាពិសេសអាជ្ញាធរខេត្តក្រចេះ ដែលមិនព្រមដោះស្រាយបញ្ហាដីធ្លីជូនប្រជាពលរដ្ឋ ដោយពួកគេតែងតែឡើងមកស្វែងរកអន្តរាគមន៍ពីលោក នៅរាជធានីភ្នំពេញ។ ប្រតិកម្មរបស់លោកនាយករដ្ឋមន្ត្រី បានធ្វើឡើងខណៈដែលលោក ចូលរួមជាអធិបតីនៅក្នុងពិធីបើកសិក្ខាសាលាផ្សព្វផ្សាយយុទ្ធសាស្ត្រជាតិ នៅថ្ងៃចន្ទទី១៨ សីហានេះ ស្តីពីសន្តិសុខស្បៀង និងអាហារូបត្ថម្ភ ២០១៤-២០១៨ នៅវិមានសន្តិភាព។
នៅចំពោះមុខមន្ត្រីរដ្ឋាភិបាល ផ្នែកពាក់ព័ន្ធនិងអង្គទូតនានា លោកនាយករដ្ឋមន្ត្រី បានថ្លែងដំឡើងសម្លេងខ្លាំងៗថា បញ្ហាដីធ្លីទាំងឡាយដែលចេះតែកើតមានជាបន្តបន្ទាប់នោះគឺបណ្តាលមកពីគេមិនស្តាប់លោក។
ជាមួយគ្នានេះលោក ហ៊ុន សែន ក៏ព្រមានផងដែរដល់អ្នកវិនិយោគដែលប្រើប្រាស់ដីសម្បទានតាំងឡាយណា ឲ្យដកខ្លួនចេញ ប្រសិនបើមិនមានសកម្មភាពទេនោះ ដោយមូលហេតុដីមិនទាន់គ្រប់គ្រាន់។
លោក សៀ ភិរម្យ នាយកលេខាធិការដ្ឋាននៃអង្គការសិទ្ធិលំនៅឋានកម្ពុជា បានស្វាគមន៍ការថ្លែងរបស់លោកនាយករដ្ឋមន្ត្រី ក៏ប៉ុន្តែលោកចង់ឲ្យប្រមុខរដ្ឋាភិបាលដាក់ទោសទណ្ឌទៅលើមន្ត្រីរបស់លោកទៅតាមច្បាប់ដើម្បីឲ្យមានការទទួលខុសត្រូវពិតប្រាកដនិងជម្រុញឲ្យមាននីតិរដ្ឋផងដែរ។
ក្រៅពីនេះលោកនាយករដ្ឋមន្ត្រី ងាកទៅស្តីបន្ទោសមន្ត្រីរបស់លោក ជាបន្ថែមទៀតពីការភូតកុហកហើយលើកឡើងពីឈ្មោះលោកឧបនាយករដ្ឋមន្ត្រីសុក អាន និងលោក ចាន់ សារុន អតីតរដ្ឋមន្ត្រីក្រសួងកសិកម្មដែលមន្ត្រីជាន់ខ្ពស់ទាំងពីររូបនេះមានស្រុកកំណើតនៅទីនោះថាដីគ្របព្រៃឈើបើមើលនៅក្នុងផែនទី។តែដល់លោកទៅពិនិត្យជាក់ស្តែងគឺជាដីវាលស្រែសុទ្ធសាធ និងដំណាំស្វាយចន្ទី។
ជាមួយគ្នានេះលោក ហ៊ុន សែន ក៏បានហៅការធ្វើសម្បទានដល់អ្នកវិនិយោគថា អយុត្កិធម៌ចំពោះប្រជាជនខ្លួនឯង ដោយយកលេសថា ជាដីគម្របព្រៃឈើ មិនផ្តល់ឲ្យប្រជាពលរដ្ឋទេ។ប្រការនេះលោកនាយករដ្ឋមន្ត្រី បានលើកឡើងថា បើលោកជាបក្សប្រឆាំងលោកនឹងធ្វើការប្រឆាំងជំទាស់ទៅលើបញ្ហានេះដែរ។ កុំថាបក្សប្រឆាំងចេះតែប្រឆាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ