អាជ្ញាធរចាប់ផ្តើមរឹតបន្តឹងសន្តិសុខ សុវត្ថិភាពខ្លាំងក្នុងអំឡុងបុណ្យចូលឆ្នាំខ្មែរ
នៅតែមួយថ្ងៃទៀតប៉ុណ្ណោះ ពោលគឺថ្ងៃចន្ទស្អែកនេះ បុណ្យចូលឆ្នាំថ្មីប្រពៃណីខ្មែរនឹងឈានចូលមកដល់។ ក្នុងខណៈនេះ ប្រជាពលរដ្ឋជាច្រើនបាន និង កំពុងសម្រុកធ្វើដំណើរទៅកាន់ស្រុកកំណើតរៀងៗខ្លួន ដើម្បីចូលរួមពិធីបុណ្យចូលឆ្នាំថ្មីនេះ។ ទន្ទឹមគ្នានេះដែរ កងកម្លាំងអាជ្ញាធរបានរឹតបន្តឹង និង កំពុងត្រៀមខ្លួនរួចជាស្រេចដើម្បីរក្សាសន្តិសុខ សណ្តាប់ធ្នាប់ និង ការពារសុវត្ថិភាពជូនប្រជាពលរដ្ឋក្នុងឱកាសដ៏សែនសប្បាយរីករាយនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៣
នៅថ្ងៃចន្ទ ទី ១៤ មេសា ស្អែកនេះ បុណ្យចូលឆ្នាំថ្មីប្រពៃណីខ្មែរនឹងឈានចូលមកដល់។ក្រុមអាជ្ញាធរមានសមត្ថកិច្ច និង កងរាជអាវុធហត្ថបានត្រៀមខ្លួនរូចជាស្រេច ដើម្បីរឹតបន្តឹងក្នុងការរក្សាសន្តិសុខ សណ្តាប់ធ្នាប់ និង ការពារសុវត្ថិភាពជូនប្រជាពលរដ្ឋឲ្យបានល្អក្នុងឱកាសដ៏រីករាយនេះ។
លោក ឧត្តមសេនីយ៍ឯក គៀត ច័ន្ទថារិទ្ធ អ្នកនាំពាក្យអគ្គស្នងការនគរបាលជាតិបានប្រាប់វិទ្យុបារាំងអន្តរជាតិ RFI នៅព្រឹកថ្ងៃអាទិត្យនេះ ថា កងកម្លាំងនគរបាលជាតិបានរឹតបន្តឹង និង បានត្រៀមខ្លួនរូចជាស្រេចដើម្បីរក្សាការពារសន្តិសុខទូទៅនៅទូទាំងប្រទេស។ អ្នកពាក្យរូបនេះ បានបន្តថា អាជ្ញាធរនឹងបង្កើនការយាមល្បាតតាមរមនីយដ្ឋាននានា ក៏ដូចទីវត្តអារាម និង បានយកចិត្តទុកដាក់ខ្ពស់ដល់ការសម្រួលចរាចរណ៍ផងដែរ។ បន្ថែមលើនេះ អាជ្ញាធរនឹងបន្តរឹតបន្តឹងខ្លាំងលើការការពារកុំឲ្យមានគ្រោះថ្នាក់ចរាចរណ៍ និង បញ្ហាអគ្គិភ័យ។
លោក គៀត ច័ន្ទថារិទ្ធ បានសង្កត់ធ្ងន់ថា គ្រប់ទីតាំង គ្រប់កន្លែងទាំងអស់អាជ្ញាធរមានសមត្ថកិច្ចនៅតែមានសកម្មភាពការពារសន្តិសុខជូនប្រជាពលរដ្ឋទាំងអស់ឲ្យបានល្អនៅឪកាសបុណ្យចូលឆ្នាំថ្មីនេះ។
ដូចគ្នានេះដែរ លោក ខេង ទីតូ អ្នកនាំពាក្យកងរាជអាវុធហត្ថលើផ្ទៃប្រទេសបានឲ្យដឹងដែរថា កងរាជអាវុធហត្ថទាំងអស់នឹងមិនឈប់សម្រាកនោះទេក្នុងអំឡុងបុណ្យចូលឆ្នាំនេះ គឺ ត្រូវការពារសន្តិសុខ សុវត្ថិភាព ឲ្យបានមួយរយភាគរយ និង ២៤ ម៉ោង លើ ២៤ម៉ោង ជូនប្រជាពលរដ្ឋ។
យ៉ាងណាក៏ដោយ អ្នកនាំពាក្យទាំងពីរបានអះអាងដូចគ្នាថា អាជ្ញាធរនឹងរឹតបន្តឹងខ្លាំងលើការរក្សាសន្តិសុខ សណ្តាប់ធ្នាប់ និង ការពារសុវត្ថិភាពជូនប្រជាពលរដ្ឋនៅក្នុងខេត្តសៀមរាប ពី ព្រោះក្នុងខេត្តនេះនឹងរៀបចំព្រឹត្តិការណ៍អង្គរសង្ក្រាន្តដែលមានមនុស្សចូលរួមច្រើន។
មុនថ្ងៃចូលឆ្នាំមកដល់ ជាបន្តបន្ទាប់ប្រមុខរាជរដ្ឋាភិបាលកម្ពុជា ក្រសួងមហាផ្ទៃ និង សាលារាជនីភ្នំពេញជាដើម បានអំពាវនាវដល់ប្រជាពលរដ្ឋទាំងអស់ឲ្យមានការប្រុងប្រយ័ត្នខ្ពស់ និង គោរពច្បាប់ចរាចរណ៍ឲ្យបានត្រឹមត្រូវនៅពេលធ្វើដំណើរ។
ងាកមករាជធានីភ្នំពេញវិញ នៅថ្ងៃអាទិត្យនេះហាក់មានភាពស្ងប់ស្ងាត់ខ្លាំងដោយសារប្រជាពលរដ្ឋជាច្រើនបាន និង កំពុងសម្រុកធ្វើដំណើរទៅស្រុកកំណើតដើម្បីចូលរួមពិធីបុណ្យចូលឆ្នាំថ្មីប្រពៃណីខ្មែរ។បណ្តាហាង ក៏ដូចជាភោជនីយដ្ឋានមួយចំនួនបានបិទទ្ធា រីឯតាមដងផ្លូវវិញមានភាពទូលាយជាងសព្វដងដែលធ្លាប់តែកកស្ទះ និង ពោរពេញដោយចរាចរណ៍ទៅមកនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ