សាលាក្រុងភ្នំពេញយកហ្វេសប៊ុកដើម្បីទទួលការរិះគន់ និងសំណូមពរពីពលរដ្ឋ
ដើម្បីពិភាក្សាពីទុកកង្វល់និងសំណូមពរ រួមទាំងដំណោះស្រាយរបស់ប្រជាពលរដ្ឋសាលារាជធានីភ្នំពេញបានបង្កើតទំព័រហ្វេសប៊ុកមួយដែលមាឈ្មោះថា រាជធានីភ្នំពេញ។ ទំព័រក្នុងបណ្តាញសង្គមហ្វេសប៊ុកនេះជាវេទិការឆ្លើយឆ្លងគ្នារវាងប្រជាពលរដ្ឋក្នុងទីក្រុងភ្នំពេញ និងមន្ត្រីអាជ្ញាធរក្រុង។ ប៉ុន្តែអ្នកស្រាវជ្រាវសង្គម បានលើកឡើងថា សាលារាជធានីគួរតែចុះជួបប្រជាពលរដ្ឋនិងជួបប្រជុំនោះ នឹងអាចដោះស្រាយបានបញ្ហាច្រើនជាង។
ចុះផ្សាយនៅថ្ងៃ៖
ស្តាប់ - ០១:៤៥
សាលារាជធានីភ្នំពេញបានបង្កើតវេទិការពិភាក្សាជាមួយប្រជាពលរដ្ឋក្នុងក្រុងតាមរយៈការបង្កើតទំព័រក្នុងបណ្តាញសង្គមហ្វេសប៊ុក ឬហៅថា Page។ លោកឡុង ឌីម៉ង់ អ្នកនាំពាក្យសាលារាជធានីភ្នំពេញបាននិយាយពីគោលបំណងនៃទំព័រដែលមានឈ្មោះថា រាជធានីភ្នំពេញនេះ ដើម្បីបង្ហាញពីសកម្មភាពរបស់សាលារាជធានីភ្នំពេញ ការសំណូមពរ និងទុកកង្វល់របស់ប្រជាពលរដ្ឋ។ ក្រៅពីនោះ អ្នកនាំពាក្យដដែលនេះ បានលើកឡើងថា ទំព័រដែលបានបង្កើតតាំងពីដើមឆ្នាំ២០១៤មក ក៏ជាកញ្ចក់ឆ្លុះបញ្ចាំងពីចំណុចខ្វះខាតរបស់សាលារាជធានីភ្នំពេញក្នុងការបម្រើសេវាជួនប្រជាពលរដ្ឋផងដែរ។
តាមរយៈការបង្កើតទំព័រក្នុងហ្វេសប៊ុកនេះ លោកឡុងឌីម៉ង់ បានលើកឡើងថា សាលារាជធានី បានយល់កាន់តែច្បាស់ពីបំណង និងតម្រូវការរបស់ប្រជាពលរដ្ឋដើម្បីចងក្រងចេញជារបាយការណ៍ដើម្បីដាក់ចេញនៅការអនុម័ត និងការអនុវត្តភ្លាម។ ប៉ុន្តែអ្នកនាំពាក្យដដែលនេះ បានលើកឡើងថា ទំព័រថ្មីរបស់សាលារាជធានីភ្នំពេញនេះ គឺមិនមែនជាការិយាល័យសម្រាប់ដើរតួនាទីជំនួសរដ្ឋបាលរបស់អាជ្ញាធរក្រុងនោះទេ។ សូមកត់សំគាល់ថា អាជ្ញាធរបស់រដ្ឋាភិបាលត្រូវបានគេកត់សំគាល់ឃើញថា មិនសូវមានទំនាក់ទំនងល្អប្រជាពលរដ្ឋដើម្បីស្វែងយល់ពីតម្រូវការរបស់រាស្ត្រនោះទេ។
អ្នកវិភាគការអភិវឌ្ឍសង្គម លោក បណ្ឌិតកែម ឡី បានលើកឡើងថាការបង្កើតទំព័រក្នុងហ្វេសប៊ុករបស់អាជ្ញាធរក្រុងភ្នំពេញគឺគ្រាន់តែជាអ្វីដែលធ្វើឱ្យល្អមើលតប៉ុណ្ណោះហើយយូរៗទៅ ប្រជាពលរដ្ឋនឹងលែងផ្តល់យោបល់។ ព្រោះថាសាលារាជធានីភ្នំពេញត្រូវតែបង្ហាញពីយន្តការដោះស្រាយជូនប្រជាពលរដ្ឋឱ្យមានប្រសិទ្ធភាពបំផុត។ ហើយដើម្បីឱ្យសំណូមពររបស់ពលរដ្ឋកាន់តែមានប្រសិទ្ធភាពទៀតនោះ គឺសាលាក្រុងត្រូវតែផ្តល់ព័ត៌មានឱ្យបានគ្រប់ជ្រុងជ្រោយ។ ពោលគឺអាចឱ្យពលរដ្ឋមានសិទ្ធទទួលបានព័ត៌មានគ្រប់គ្រាន់។
លោកកែម ឡីអ្នកវិភាគបញ្ហាសង្គម បានអះអាងថា សាលារាជធានីភ្នំពេញ គួរតែចុះជួបប្រជាពលរដ្ឋនិងបង្កើតវេទិការសួរដេញដោលវិញ ប្រសើរជាជាងការបង្កើតទំព័រតាមរយៈហ្វេសប៊ុកដែលត្រឹមតែផ្តល់នូវប្រសិទ្ធភាពតិចតួចនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ