បទយកការណ៍
ក្រុងភ្នំពេញនាំស្មៅ និងត្រកួនទៅលក់តាមខេត្តបានច្រើនក្នុងរដូវប្រាំង
ចុះផ្សាយនៅថ្ងៃ៖
ស្តាប់ - ១០:២៥
បច្ចុប្បន្ន ពាណិជ្ជកម្មនាំស្មៅ និងត្រកួន ចេញពីរាជធានីភ្នំពេញទៅលក់នៅតាមខេត្ត កំពុងកាក់កប។ កាក់កប ព្រោះអតិថិជន ដែលរស់នៅតាមតំបន់ជាប់ផ្លូវជាតិលេខ៤ ផ្លូវជាតិលេខ៣ និងផ្លូវជាតិលេខ២ ត្រូវការទំនិញប្រភេទនេះច្រើនសម្រាប់គោ និងជ្រូក របស់ខ្លួន។ អ្នកផ្គត់ផ្គង់អាចឆក់ឱកាសប្រកបមុខរបរនេះបាន គឺចំពេលដែលដីស្រែដីចម្ការដ៏ទូលំទូលាយ នៅតាមបណ្តោយផ្លូវជាតិទាំងបីនេះ បាននិងកំពុងប្រែក្លាយជាតំបន់ឧស្សាហកម្ម។ ប៉ុន្តែ នីហរណកម្មស្មៅ និងត្រកួន ដែលកាក់កបតាមរដូវ និងដែលពឹងអាស្រ័យជាចម្បង លើប្រភពធនធានបឹងទំពន់ ត្រូវបានអ្នកផ្គត់ផ្គង់ព្យាករថានឹងក្ស័យធន យ៉ាងយូរប្រាំឆ្នាំទៀត។
